ច្បាប់អាកាសធាតុ៖ បារាំងលុបចោលជើងហោះហើរក្នុងស្រុកណា ដែលអាចជំនួសដោយរថភ្លើង
នៅប្រទេសបារាំង ក្រឹត្យស្តីពីការលុបចោលជើងហោះហើរក្នុងស្រុក បានចូលជាធរមានជាផ្លូវការ នៅថ្ងៃអង្គារទី ២៤ឧសភា។ តាមក្រឹត្យដែលរដ្ឋាភិបាលបារាំងចុះផ្សាយ នៅថ្ងៃម្សិលមិញ ជើងហោះហើរក្នុងស្រុកដែលគេត្រូវលុបចោល លែងឲ្យមានតទៅទៀត ជាជើងហោហើរ ដែលត្រូវការចំណាយពេលតិចជាង ២ម៉ោងកន្លះ និងអាចជំនួសដោយការធ្វើដំណើរតាមផ្លូវរថភ្លើង។ ការលុបចោលជើងហោះហើរក្នុងស្រុកជាផ្នែកមួយនៃនយោបាយរបស់រដ្ឋាភិបាលបារាំង ក្នុងការកាត់បន្ថយការបញ្ចេញឧស្ម័នកាបូនិក ឧស្ម័នផ្ទះកញ្ចក់។
ចុះផ្សាយនៅថ្ងៃ៖ កែប្រែថ្ងៃទី៖
ទៅតាមច្បាប់អាកាសធាតុឆ្នាំ២០២១ ដែលមានគោលដៅកាត់បន្ថយការបញ្ចេញឧស្ម័នផ្ទះកញ្ចក់ ដើមហេតុនៃការឡើងកំដៅលើផែនដី រដ្ឋាភិបាលបារាំងធ្លាប់បានចេញបម្រាម ហាមឃាត់រាល់ការហោះហើរក្នុងស្រុក ដែលមានរយៈពេលតិចជាង២ម៉ោងកន្លះ។ ប៉ុន្តែ ការអនុវត្តត្រូវបានផ្អាកទៅវិញ ក្នុងពេលរង់ចាំការស៊ើបអង្កេតរបស់គណៈកម្មការអឺរ៉ុប នៅក្រោយមានបណ្តឹងតវ៉ាពីក្រុមហ៊ុនហោះហើរ នៅអឺរ៉ុប។ សម្រាប់ក្រុមហ៊ុនដឹកជញ្ជូនផ្លូវអាកាស ដែលជាដើមបណ្តឹង បម្រាមរបស់រដ្ឋាភិបាលបារាំងប្រាសចាកនឹងគោលការណ៍នៃសេរីភាពធ្វើដំណើរ និងគ្មានប្រសិទ្ធិភាពប្រយុទ្ធប្រឆាំងនឹងការប្រែប្រួលអាកាសធាតុ។
ប៉ុន្តែ នៅទីបំផុត ក្រឹត្យរដ្ឋាភិបាលស្តីពីការហាមមិនឲ្យមានការហោះហើរក្នុងស្រុក ដែលមានរយៈពេលតិចជាង ២ម៉ោងកន្លះ ក៏បានចូលជាធរមាន កាលពីថ្ងៃអង្គារម្សិលមិញ។ តាមក្រឹត្យ ដែលចុះផ្សាយក្នុងកាសែតផ្លូវការរបស់រដ្ឋាភិបាល រាល់ការហោះហើរក្នុងស្រុក រយៈពេលតិចជាង ២ម៉ោងកន្លះ ដែលអាចជំនួសដោយការធ្វើដំណើរតាមរថយន្តភ្លើង ត្រូវលុបចោល លែងឲ្យមានតទៅទៀត។ តាមរយៈវិធានការនេះ រដ្ឋាភិបាលចង់លើកទឹកចិត្តឲ្យគេជ្រើសរើសយកការធ្វើដំណើរតាមរថភ្លើង អគ្គិសនី ដែលមិនបញ្ចេញឧស្ម័នកាបូនិកច្រើនដូចយន្តហោះ។
នៅក្នុងការអនុវត្តជាក់ស្តែង ព្រលានយន្តហោះតូចដូចជា Orly និងជើងហោះហើរពីទីក្រុងចំនួន៣ប៉ុណ្ណោះ របស់បារាំងដែលជាប់ក្នុងបម្រាមរបស់រដ្ឋាភិបាល នោះគឺជើងហោះហើរ ប៉ារីសព្រលានយន្តហោះ Orly និងទីក្រុង Nantes ព្រលានយន្តហោះOrly និងទីក្រុងLyon និងចុងក្រោយ Orly Bordeaux។ សម្រាប់អ្នកជំនាញអាកាសធាតុ ក្រឹត្យលុបចោលការហោះហើរក្នុងស្រុក គ្រាន់តែជានិមិត្តរូប គ្មានគោលដៅកាត់បន្ថយការបញ្ចេញឧស្ម័នផ្ទះកញ្ចក់ ដូចការសន្យារបស់រដ្ឋាភិបាល។ អ្នកជំនាញធ្លាប់ទាមទារឲ្យរដ្ឋាភិបាលចាត់វិធានការដ៏មានមហិច្ឆតា ដើម្បីកាត់បន្ថយការបញ្ចេញឧស្ម័នកាបូនិក ក្នុងវិស័យអាកាសចរណ៍ តាមរយៈ ការលុបចោល រាល់ការហោះហើរ ដែលមានរយៈពេលតិចជាង ៤ម៉ោង។ ប៉ុន្តែ រដ្ឋាភិបាលបារាំងបានសម្រេចហាមការហោះហើរ ដែលមានរយៈពេល តិចជាង ២ម៉ោងកន្លះ។ ជាលទ្ធផល រាល់ការហោះហើរ ក្នុងស្រុកបារាំង នៅតែអាចប្រព្រឹត្តទៅតាមធម្មតា បើសិនការធ្វើដំណើរតាមយន្តហោះ មានរយៈពេលវែង ជាង ២ម៉ោងកន្លះ និងមិនអាចជំនួសបានដោយការធ្វើដំណើរតាមរថភ្លើង។
នៅថ្ងៃអង្គារ សមាគមក្រុមហ៊ុនដឹកជញ្ជូនតាមផ្លូវអាកាសអឺរ៉ុប ប្រតិកម្មរិះគន់ក្រឹត្យរបស់រដ្ឋាភិបាលបារាំង និងបានទាមទារឲ្យរដ្ឋាភិបាលចាត់វិធានការ ដើម្បីកាត់បន្ថយការបញ្ចេញឧស្ម័នផ្ទះកញ្ចក់ពិតប្រាកដ តាមរយៈការជំរុញលើកទឹកចិត្តឲ្យវិស័យអាកាសចរណ៍ងាកទៅប្រើថាមពលស្អាតស្អំ ថាមពលដែលមិនបញ្ចេញឧស្ម័នកាបូនិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ