តាំងខ្លួនជាអន្តរការីឱ្យសង្គ្រាមអ៊ុយក្រែន ចិនបញ្ជូនប្រមុខការទូត មកធ្វើទស្សនកិច្ច នៅអឺរ៉ុប
រដ្ឋមន្ត្រីក្រសួងការបរទេសចិន លោក ឈីង កង កំពុងបំពេញទស្សនកិច្ចនៅអឺរ៉ុប ចាប់ពីថ្ងៃចន្ទទី ៨ ឧសភានេះទៅ ដោយផ្តើមពីប្រទេសអាល្លឺម៉ង់ រួចបន្តមកប្រទេសបារាំង និងបញ្ចប់នៅក្នុងប្រទេសន័រវែស។ ទស្សនកិច្ចនេះប្រព្រឹត្តទៅក្នុងខណៈដែលចិនបាននិងកំពុងប្រឹងដើរតួនាទីជាអន្តរការី ដោះស្រាយបញ្ហាសង្គ្រាមនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:០៦
បើទោះបីស្និទ្ធនឹងរុស្ស៊ីក៏ដោយ ក៏ចិនបានតាំងខ្លួនជាអន្តរការីអព្យាក្រិត្យ ក្នុងជម្លោះនៅអ៊ុយក្រែន ដោយបានចេញផ្សាយជាសាធារណៈកាលពីខែកុម្ភៈ២០២៣ នូវ ផែនការ១២ចំណុចបញ្ជាក់អំពីជំហររបស់ខ្លួន តែមានទម្រង់ជាផែនការសន្តិភាពជំរុញឱ្យរុស្ស៊ីនិងអ៊ុយក្រែនចូលចរចាគ្នា។ នៅខែមីនា លោកស៊ីជីនពីង បានធ្វើដំណើរទៅជួបលោកពូទីន នៅទីក្រុងម៉ូស្គូ ដើម្បីរឹតចំណងទំនាក់ទំនងគ្នា។ ហើយគេត្រូវរង់ចាំរហូតដល់ចុងខែមេសាទើបឃើញប្រធានាធិបតីចិន លោកស៊ីជីនពីង ទូរស័ព្ទទៅនិយាយដោយផ្ទាល់ជាលើកទីមួយ ជាមួយនឹងប្រធានាធិបតីអ៊ុយក្រែន លោក ហ្សេឡេនស្គី។
មានន័យថា សំណើ១២ចំណុចរបស់ចិនកំពុងចាប់ដំណើរការ។ ហេតុដូច្នេះហើយបានជានៅសប្តាហ៍នេះ រដ្ឋមន្ត្រីការបរទេសចិន លោក ឈីង គ័ង ត្រូវជួបសន្ទនាជាមួយសមភាគីអាល្លឺម៉ង់ ប្រមុខការទូតបារាំង និងរដ្ឋមន្ត្រីការបរទេសន័រវែស។ នេះបើតាមការគូសបញ្ជាក់របស់អ្នកនាំពាក្យក្រសួងការបរទេសចិន ទៅកាន់អ្នកសារព័ត៌មាន។ ប៉ុន្តែពុំមានការលម្អិតព័ត៌មានជុំវិញប្រធានបទនេះ ក្នុងអំឡុងទស្សនកិច្ចរបស់លោក ឈីង កង ទេ។
ពេលអញ្ជើញទៅប៉េកាំង កាលពីពាក់កណ្តាលខែមេសា រដ្ឋមន្ត្រីការបទេសអាល្លឺម៉ង់ បានស្នើសុំឱ្យចិនជួយប្រាប់រុស្ស៊ីឱ្យឈប់ធ្វើសង្គ្រាមនៅអ៊ុយក្រែន។ កាលពីខែមេសាដែរ ក្នុងដំណើរទស្សនកិច្ចផ្លូវការនៅប្រទេសចិន លោកប្រធានាធិបតីបារាំង បានអំពាវនាវឱ្យប្រធានាធិបតីចិន លោកស៊ីជីនពីង ជួយនាំរុស្ស៊ីឱ្យក្លាយជាប្រទេសមានហេតុផលវិញជាមួយអ៊ុយក្រែន។
ទស្សនកិច្ចរបស់ប្រមុខការទូត ប្រព្រឹត្តទៅតែប៉ុន្មានថ្ងៃក្រោយពីមានសំដីមិនសមរម្យរបស់ឯកអគ្គរដ្ឋទូតចិនប្រចាំក្រុងប៉ារីសជុំវិញប្រវត្តិសាស្ត្រតំបន់គ្រីមេ ដែលក្រសួងការបរទេសចិនចេញសេចក្តីថ្លែងការណ៍កែតម្រូវ ដោយធានាគោរពអធិបតេយ្យភាព ឯករាជ្យភាព និងបូរណភាពដែនដី គ្រប់ប្រទេសទាំងអស់។
ចិន មិនដែលថ្កោលទោសជាសាធារណៈទង្វើឈ្លានពានរបស់រុស្ស៊ីលើអ៊ុយក្រែនទេ តែបានពង្រឹងពង្រីកកិច្ចសហប្រតិបត្តិការនយោបាយនិងសេដ្ឋកិច្ចកាន់តែខ្លាំងឡើងជាមួយរុស្ស៊ី នារយៈពេលចុងក្រោយមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ