អ៊ីតាលីទាមទារឲ្យរដ្ឋមន្ត្រីមហាផ្ទៃបារាំងសុំទោស ដែលបាននិយាយរិះគន់នាយករដ្ឋមន្ត្រីអ៊ីតាលីក្នុងសំណុំរឿងអន្តោប្រវេសន៍
បញ្ហាជនអន្តោប្រវេសន៍ កំពុងតែបានផ្ទុះក្លាយជាវិបត្តិការទូតសាជាថ្មី រវាងបារាំងនិងអ៊ីតាលី។ កាលពីព្រឹកថ្ងៃព្រហស្បតិ៍ទី៤ឧសភា លោករដ្ឋមន្ត្រីក្រសួងមហាផ្ទៃបារាំង បាននិយាយរិះគន់ទៅលើលោកស្រីម៉េឡូនី ប្រមុខរដ្ឋាភិបាលបក្សស្តាំនិយមអ៊ីតាលី ថាបានតែសន្យាខ្យល់ តែមិនអាចដោះស្រាយបញ្ហាជនអន្តោប្រវេសន៍បាននោះទេ។ សំដីរបស់លោករដ្ឋមន្ត្រីបារាំងនេះ ត្រូវបានភាគីរដ្ឋាភិបាលអ៊ីតាលី ថ្កោលទោស និងបានទាមទារឲ្យសុំទោស។
ចុះផ្សាយនៅថ្ងៃ៖
ស្តាប់ - ០២:៣៨
លោក Antonio Tajani ប្រមុខការទូតអ៊ីតាលី ដែលមានគម្រោងមកប្រជុំជាមួយលោកស្រីរដ្ឋមន្ត្រីការពារជាតិបារាំង នៅល្ងាចថ្ងៃព្រហស្បតិ៍ បានលុបចោលដំណើរវិញ ដើម្បីបង្ហាញថាអ៊ីតាលីមិនសប្បាយចិត្ត។ លោករដ្ឋមន្ត្រីការបរទេសអ៊ីតាលីបានលើកឡើងថា សំដីរបស់រដ្ឋមន្ត្រីមហាផ្ទៃបារាំង គឺជាសំដីមាក់ងាយ ខ្វះការគោរពមកលើរដ្ឋាភិបាលអ៊ីតាលី មិនខុសពីកាំបិតចាក់ក្រោយខ្នង។ សម្តីមាក់ងាយគ្មានហេតុផលនេះ ត្រូវតែលុបលាងវិញ ដោយការសុំទោសជាសាធារណៈ។
លោករដ្ឋមន្ត្រីក្រសួងការបរទេសអ៊ីតាលី បានបញ្ជាក់ឲ្យដឹងដែរថា លោកស្រីCatherine Colonna រដ្ឋមន្ត្រីការពារជាតិបារាំង បានទូរស័ព្ទទៅនិយាយជាមួយលោកចំនួន២ដង ដើម្បីបន្ធូរបន្ថយស្ថានការណ៍ ដោយលោកស្រីបានសំដែងការសោកស្តាយចំពោះរឿងដែលបានកើតឡើង។
សូមបញ្ជាក់ថា វិបត្តិការទូតរវាងបារាំងនិងអ៊ីតាលី បានផ្ទុះឡើងបន្ទាប់ពីលោក Gérald Darmanin រដ្ឋមន្ត្រីក្រសួងមហាផ្ទៃបារាំង បាននិយាយនៅក្នុងបទសម្ភាសន៍តាមវិទ្យុ កាលពីព្រឹកថ្ងៃព្រហស្បតិ៍ទី៤ឧសភា ថាលោកស្រី ចកចាម៉េឡូនី នាយករដ្ឋមន្ត្រីមកពីបក្សស្តាំនិយមជ្រុលអ៊ីតាលី បានត្រឹមតែសន្យា តែធាតុពិត គឺបានបរជ័យ មិនអាចដោះស្រាយវិបត្តិជនអន្តោប្រវេសន៍បានទេ។ សំដីនេះ គឺស្ថិតក្នុងបរិបទ ដែលលោករដ្ឋមន្ត្រីបារាំង ចង់លើកឡើងប្រៀបធៀបជាមួយការសន្យាខ្យល់មួយចំនួន របស់អ្នកនយោបាយបក្សស្តាំនិយមជ្រុលបារាំង។
គិតត្រឹមពេលនេះ មិនទាន់មានការពន្យល់ណាមួយ ពីលោករដ្ឋមន្ត្រីមហាផ្ទៃបារាំង ដែលជាម្ចាស់សំដីនេះទេ។ ក្រោយការខឹងច្រឡោតរបស់ភាគីអ៊ីតាលី រដ្ឋាភិបាលបារាំងបានព្យាយាមពន្លត់ភ្លើង ដោយលោកស្រី Catherine Colonna បានសរសេរសារជាភាសាអ៊ីតាលី នៅលើទំព័រTwitter ថា ទំនាក់ទំនងរវាងបារាំង និងអ៊ីតាលី វាផ្អែកលើការគោរពគ្នាទៅវិញទៅមកដោយស្មោះត្រង់ រវាងថ្នាក់ដឹកនាំប្រទេសទាំង២។ លោក Olivier Véran អ្នកនាំពាក្យរដ្ឋាភិបាលបារាំង បានលើកឡើងក្នុងន័យបន្ធូរបន្ថយបញ្ហា ដោយអះអាងថាសម្តីរបស់រដ្ឋមន្ត្រីមហាផ្ទៃបារាំង មិនបានសំដៅមាក់ងាយស្តីបន្ទោសទៅលើអ៊ីតាលីឡើយ។ ផ្ទុយទៅវិញបារាំង គាំទ្រចំពោះការសម្រេច និងជម្រើសរបស់រដ្ឋាភិបាលអ៊ីតាលី នៅក្នុងសំណុំរឿងជនអន្តោប្រវេសន៍។
គួររំលឹកថា លោកស្រីចកចា ម៉េឡូនី បានជាប់ឆ្នោតដឹកនាំរដ្ឋាភិបាលអ៊ីតាលី ដោយសារតែពាក្យឃោសនាថានឹងដោះស្រាយវិបត្តិជនអន្តោប្រវេសសន៍ខុសច្បាប់ឲ្យបាន។ យោងតាមក្រសួងមហាផ្ទៃអ៊ីតាលី គិតពីដើមឆ្នាំ២០២៣មក មានជនអន្តោប្រវេសន៍ខុសច្បាប់ចំនួន ៤២០០០នាក់បានចូលមកដល់អ៊ីតាលី ខណៈដែលរយៈពេលដូចគ្នានេះនៅឆ្នាំមុន មាន១១០០០នាក់។
ក្រោយផ្ទុះវិបត្តិការទូតរវាងបារាំង អ៊ីតាលីនេះ លោក Josep Borrell ប្រមុខការទូតអឺរ៉ុបបានលើកឡើងថា បញ្ហាជនអន្តោប្រវេសន៍ គឺជាបញ្ហារួមរបស់អឺរ៉ុប ហើយលោកជឿថាអឺរ៉ុបនឹងអាចរួមគ្នាដោះស្រាយ ដោយការសាមគ្គីគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ