មជ្ឈមណ្ឌលនុយក្លេអ៊ែរតួកគីទទួលគ្រឿងចំហេះដំបូង ក្រោមសម្រែករិះគន់របស់អ្នកការពារបរិស្ថាន
នៅថ្ងៃព្រហស្បតិ៍ទី ២៧ មេសា ប្រធានាធិបតីតួកគី ដឹកនាំបើកកម្មវិធីទទួលគ្រឿងចំហេះ សម្រាប់មជ្ឈមណ្ឌលនុយក្លេអ៊ែរ ទីមួយរបស់ខ្លួន។ មជ្ឈមណ្ឌលនុយក្លេអ៊ែរនេះត្រូវបានសាងសង់និងគ្រប់គ្រងផលិតកម្មដោយក្រុមហ៊ុនរុស្ស៊ី Rosatom។ សម្រាប់លោក អ៊ែរដូហ្កាន នេះជាគម្រោងថាមពលជាតិដ៏ធំ ដែលអាចកើតចេញជារូបរាងបានដោយសារមានកិច្ចព្រមព្រៀងរវាងរដ្ឋាភិបាលតួកគីនិងរដ្ឋាភិបាលរុស្ស៊ី។ ប៉ុន្តែអង្គការក្រៅរដ្ឋាភិបាលផ្នែកការពារបរិស្ថានបានរិះគន់យ៉ាងខ្លាំង។
ចុះផ្សាយនៅថ្ងៃ៖
ស្តាប់ - ០១:៥៧
លោកប្រធានាធិបតីតួកគី អ៊ែរដូហ្កាន បានចាត់ទុកមជ្ឈមណ្ឌលនុយក្លេអ៊ែរ Akkuyuជាគ្រឹះនាំទៅរកឯករាជភាពថាមពល ព្រោះអនាគតទៅ មជ្ឈមណ្ឌលនឹងផ្គត់ផ្គង់ថាមពលបាន១០%នៃសេចក្តីត្រូវការរបស់ប្រទេស។ ប៉ុន្តែក្រុមអ្នកប្រឆាំង យល់ថា គម្រោងដែលអាជ្ញាធរតួកគីនិងក្រុមហ៊ុនរុស្ស៊ី ផ្តល់ហិរញ្ញវត្ថុរួមនិងសាងសង់តាំងពី៥មកហើយនេះ គ្មានតម្លាភាពទេ។
“រុស្ស៊ីអ្នកកាន់គម្រោង ឯតួកគីគ្មានរចនាសម្ព័ន្ធស្របច្បាប់ទាក់ទងនឹងនុយក្លេអ៊ែរទេ តើមានន័យយ៉ាងដូចម្តេចទៅ ? គឺរុស្ស៊ីធ្វើអ្វីស្រេចតែនឹងចិត្ត ដោយគ្មានការត្រួតពិនិត្យឯករាជ្យ និងទំនួលខុសត្រូវហិរញ្ញវត្ថុទេ។ នេះបើតាមនាយកអង្គការក្រៅរដ្ឋាភិបាលនៃសង្គមស៊ីវិលតួកគី Ekosfer ដោយរំលើកអំពីក្តីព្រួយបារម្ភនិងការសង្ស័យជុំវិញហានិភ័យរញ្ជួយដី និងហានិភ័យសម្រាប់សាធារណជន ដែលពួកគេពុំបានទទួលព័ត៌មានអ្វីទាំងអស់ ព្រោះនៅពេលចង់ដឹងអ្វីត្រូវទៅរកក្រុមហ៊ុនរុស្ស៊ី មិនមែនក្រសួងថាមពលតួកគីទេ។
ក្រោយគ្រោះរញ្ជួយដីមរណៈកាលពីថ្ងៃទី ៦កុម្ភៈ២០២៣ នៅភាគអាគ្នេយ៍នៃប្រទេសតួកគី គឺក្រុមហ៊ុនរុស្ស៊ី Rosatom ជាអ្នកចេញមុខមកធានាអះអាងថាមជ្ឈមណ្ឌលកំពុងសាងសងគ្មានរងការខូតខាតអ្វីទាំងអស់។ ហេតុដូច្នេះហើយបានជាសម្រាប់អង្គការក្រៅរដ្ឋាភិបាលតួកគី មជ្ឈមណ្ឌលAkkuyu មិនមែនជាមណ្ឌលនុយក្លេអ៊ែរតួកគីទេ។ ម្ចាស់របស់វា គឺ រុស្ស៊ី។ មជ្ឈមណ្ឌលនុយក្លេអ៊ែរសាងសង់លើទឹកដីតួកគី ឯគ្រឿងចំហេះក៏បញ្ជូនមកពីរុស្ស៊ី ហើយរុស្ស៊ីជាអ្នកទទួលលុយ តែហានិភ័យត្រូវធ្លាក់មកលើ តួកគី។
នៅពេលសាងសង់ហើយ តួកគីត្រូវទិញថាមពលពីរុស្ស៊ី ក្នុងតម្លៃកំណត់ស្រេច ប្រមាណ៧០%នៃថាមពលអគ្គីសនីផលិតដោយម៉ាស៊ីនប្រតិករពីរដំបូងរយៈពេល១៥% និង៣០%ដោយម៉ាស៊ីនប្រតិករពីរផ្សេងទៀត ក្នុងរយៈពេល១៥ឆ្នាំដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ