បារាំង៖ លោកម៉ាក្រុងប្តេជ្ញាអនុវត្តកំណែទម្រង់ច្បាប់ចូលនិវត្ត ដោយសន្យាពង្រឹងសេដ្ឋកិច្ច និងយុត្តិធម៌សង្គម
ប្រឈមនឹងចលនាបាតុកម្មរបស់ប្រជាជនបារាំង ជាច្រើនខែមកនេះ ដើម្បីប្រឆាំងនឹងការអនុម័តច្បាប់កំណែទម្រង់ប្រព័ន្ធចូលនិវត្ត លោកម៉ាក្រុងប្រធានាធិបតីបារាំង បានថ្លែងសារទៅកាន់ប្រជាជាតិ កាលពីល្ងាចថ្ងៃចន្ទ ទី ១៧មេសា។ ក្នុងសុន្ទរកថា ប្រមាណជិត១៥នាទី លោកម៉ាក្រុងបានអះអាងសារជាថ្មីថា ការធ្វើកំណែតម្រង់ប្រព័ន្ធចូលនិវត្តដោយដំឡើងអាយុចូលនិវត្តដល់៦៤ឆ្នាំ គឺជារឿងចាំបាច់ដែលត្រូវតែធ្វើ។
ចុះផ្សាយនៅថ្ងៃ៖
ស្តាប់ - ០១:៥៣
ទន្ទឹមគ្នានេះ លោកម៉ាក្រុងអះអាងថា លោកយល់ពីកំហឹងរបស់ប្រជាជនបារាំង ដែលមានជីវភាពកាន់តែលំបាក។ តែយ៉ាងណា លោកបានអំពាវនាវ ឲ្យប្រជាជនបារាំងមានទំនុកចិត្តលើលោក ហើយងាកមករួមកម្លាំងគ្នា ដើម្បីផ្តល់សន្ទុះដល់ការប្រឹងប្រែងជំរុញសេដ្ឋកិច្ច។ លោកម៉ាក្រុងបានប្រកាសផងដែរ នូវផែនការកែលំអធំៗទាំង៣ដែលរដ្ឋាភិបាលបារាំង នឹងចាប់ផ្តើមអនុវត្តក្នុងរយៈពេលឆាប់ៗខាងមុខ៖ ទីមួយគឺផ្នែកសេដ្ឋកិច្ច និងការងារ ទី២គឺផ្នែកយុត្តិធម៌សណ្តាប់សង្គម ហើយទី៣គឺផ្នែកសង្គម អប់រំ និងសុខាភិបាលជាដើម។
សម្រង់សុន្ទរកថារបស់លោកម៉ាក្រុង ថ្ងៃទី១៧មេសា ២០២៣
"ដូចយើងគ្រប់គ្នាបានដឹងហើយ នៅថ្ងៃសុក្រកន្លងទៅនេះ ក្រុមប្រឹក្សាធម្មនុញ្ញ បានអនុម័តទទួលយកនូវខ្លឹមសារមួយផ្នែកធំ នៃច្បាប់កំណែទម្រង់ប្រព័ន្ធចូលនិវត្ត ហើយភ្លាមៗនោះ ខ្ញុំក៏បានប្រកាសដាក់ឲ្យអនុវត្តច្បាប់ថ្មីនេះដែរ។ ការផ្លាស់ប្តូរជាក់ស្តែង ដោយយោងលើច្បាប់ថ្មីនេះ នឹងចាប់ផ្តើមចូលជាធរមានបន្តិចម្តងៗ ចាប់ពីខែកញ្ញាខាងមុខ។
ច្បាប់ថ្មី ដែលត្រូវបានអនុម័ត ដោយអនុឡោមតាមរដ្ឋធម្មនុញ្ញនេះ វាគឺជាការធ្វើកំណែទម្រង់ដ៏ចាំបាច់ ចាំបាច់ដើម្បីធានាឲ្យគ្រប់គ្នាបានទទួលប្រាក់សោធននិវត្ត ហើយចាំបាច់ដើម្បីផ្តល់សន្ទុះដល់ការរីកចម្រើនរបស់ជាតិយើង។
ក៏ប៉ុន្តែ អ្វីដែលយើងបានសង្កេតឃើញ គឺកំណែទម្រង់ថ្មីនេះ មិនត្រូវបានប្រជាជនយើងភាគច្រើនទទួលយកទេ។ ទោះបីឆ្លងកាត់ការចរចាគ្នាជាច្រើនខែមកនេះ ការស្រុះស្រួលយោបល់គ្នា នៅតែមិនអាចមានលទ្ធផល ហើយដែលធ្វើឲ្យខ្ញុំមានការសោកស្តាយ។ ដូច្នេះ យើងត្រូវតែដកស្រង់បទពិសោធន៍ ពីមេរៀននេះ។
ចម្លើយរបស់យើង គឺមិនអាចជាការនៅស្ងៀមមិនធ្វើអ្វីសោះ ហើយក៏មិនមែនជាការធ្លាក់ផុងទៅក្នុងអំពើជ្រុលនិយមនោះដែរ។ ចំពោះមុខទឹកចិត្តក្រេវក្រោធ កំហឹងតវ៉ារបស់ពលរដ្ឋ ដែលអស់សង្ឃឹមគិតថារដ្ឋបោះបង់ពួកគេចោលជាដើមនេះ គឺយើងត្រូវតែរួបរួមគ្នាដោះស្រាយបញ្ហា ដូចដែលខ្ញុំតែងតែប្រឹងប្រែងកន្លងមក ជាជាងការបាក់បែកគ្នា។ យើងត្រូវតែផ្តល់អាទិភាពដល់ទិសដៅដ៏ច្បាស់លាស់ ដែលជាការពង្រឹងឯករាជ្យភាពរបស់ជាតិយើង និងការផ្តល់យុត្តិធម៌សង្គម"។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ