ប្រធានាធិបតីបារាំងរងការរិះគន់ពីសម្ព័ន្ធមិត្ត ក្រោយបង្ហាញជំហរទាក់ទងនឹងតៃវ៉ាន់
ក្រោយបញ្ចប់ទស្សនកិច្ចនៅប្រទេសចិន និងនៅពេលធ្វើដំណើរត្រលប់មកមាតុប្រទេសវិញ លោកប្រធានាធិបតីបារាំងបានអះអាងនៅក្នុងបទសម្ភាសន៍ជាមួយអ្នកសារព័ត៌មាន ថា គ្មានប្រយោជន៍អ្វីដែលត្រូវបំបោងវិបត្តិតៃវ៉ាន់ទេ។ អឺរ៉ុប មិនត្រូវដើរតាមតែអាមេរិក និងចិនឡើយ តែគួរមានស្វ័យភាពយុទ្ធសាស្ត្ររបស់ខ្លួន ដើម្បីក្លាយជាប៉ូលទីបី។ ជំហរបែបនេះបានទទួលការរិះគន់ជាបន្តបន្ទាប់ ពីសំណាក់សម្ព័ន្ធមិត្តចាស់ៗរបស់បារាំង មានជាអាទិ៍ អាមេរិក និងអាល្លឺម៉ង់។
ចុះផ្សាយនៅថ្ងៃ៖
ស្តាប់ - ០២:០៣
បង្ហើបជំហរ ក្រោយបញ្ចប់ទស្សនកិច្ចនៅប្រទេសចិន ដែលទើបធ្វើសមយុទ្ធបែបឡោមព័ទ្ធតៃវ៉ាន់ បានបង្កឱ្យសម្ព័ន្ធមិត្តងើយឆ្ងល់យ៉ាងខ្លាំង។ ថ្វីបើអ្នកនាំពាក្យរបស់ទីប្រឹក្សាសន្តិសុខជាតិអាមេរិក បានអះអាងជាថ្មី កាលពីម្សិលមិញ អំពីទំនាក់ទំនងទ្វេភាគីដ៏ល្អប្រពៃរវាងបារាំងអាមេរិកមែន ប៉ុន្តែ អ្នកជំនាញជាតិ-អន្តរជាតិ និងតំណាងសភា-ព្រឹទ្ធសភាអាមេរិក អឺរ៉ុប ឃ្នើសចិត្តនឹងសំដីរបស់ប្រធានាធិបតីបារាំងខ្លាំងណាស់។
អ្នកវិភាគតៃវ៉ាន់ យល់ថាបារាំងនិងអឺរ៉ុបកំពុងតែឈានទៅបោះបង់មនសិការគ្រឹះរបស់ខ្លួន ដោយងាកទៅរកចិន។ សម្រាប់អាមេរិក សំដីលោកម៉ាក្រុង ប្រៀបដូចជាការទម្លាក់កំហុសលើវ៉ាស៊ីនតោនថាចង់បង្កសង្គ្រាម និងជាសំដីរមិលគុណ ចំពោះមិត្តដែលបានចំណាយលុយរាប់ពាន់លានជួយទ្រទ្រង់យោធាអ៊ុយក្រែន ទាំងខ្លួនគ្មានប៉ះពាល់ដល់ជីវិតផង។ សូម្បីតែសម្ព័ន្ធមិត្តក្នុងរង្វង់អឺរ៉ុបដូចគ្នា ក៏ភ្ញាក់ផ្អើលខ្លាំងនិងបានរិះគន់ថា នយោបាយបោះដៃរកលោកស៊ីជីនពីងរបស់លោកម៉ាក្រុង ដូចនយោបាយហុចដៃរកលោកពូទីន កាលពីមុនសង្គ្រាមអ៊ុយក្រែន។ ករណីទាំងពីរសុទ្ធតែនឹងត្រូវបរាជ័យទាំងអស់ និងធ្វើឱ្យអឺរ៉ុបកាន់តែប្រេះឆាជាមួយអាមេរិក។ នេះបើតាមទស្សនៈតំណាងរាស្ត្រអាល្លឺម៉ង់ម្នាក់៕
សូមបញ្ជាក់ថា លោកម៉ាក្រុង ធ្លាប់ពោលពាក្យឆ្គងបំផុសរឿងអាស្រូវ ជុំវិញចេតនាបង្កើតស្វ័យភាពយោធាអឺរ៉ុប ជំនួសភាពគាំងស្លាប់របស់អូតង់ម្តងហើយ។ នៅពេលនេះលោកម៉ាក្រុងបំផ្ទុះប្រតិកម្មថ្មីមួយទៀតទាក់ទងនឹងសំណុំរឿងតៃវ៉ាន់។ នៅក្នុងបទសម្ភាសន៍ជាមួយអ្នកសារព័ត៌មានបារាំង លោកប្រធានាធិបតី ព្រមានអំពីហានិភ័យនៃជំហរអឺរ៉ុបដែលដើរតាមអាមេរិក ដោយជំរុញអឺរ៉ុបឱ្យបង្កើនឯករាជ្យកាត់បន្ថយភាពរំពឹងលើសហរដ្ឋអាមេរិក ពង្រឹងឧស្សាហកម្មការពារជាតិ មានស្វ័យភាពយុទ្ធសាស្ត្រ។ សម្រាប់លោកម៉ាក្រុង អាទិភាពរបស់អឺរ៉ុបមិនមែនត្រូវតែសម្រប តាមមហាអំណាចផ្សេង គឺអាមេរិក និងចិន ទេ។ ប្រសិនបើរវល់តែតាមគេ នោះអឺរ៉ុបគ្មានពេល គ្មានមធ្យោបាយផ្តល់ស្វ័យភាពយុទ្ធសាស្ត្រនិងក្លាយជាកម្លាំងទីបីពិភពលោកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ