តុលាការបារាំងបើកសវនាការ កាត់ទោសឧក្រិដ្ឋកម្មប្រឆាំងមនុស្សជាតិប្រព្រឹត្តិដោយរបបផ្តាច់ការស៊ីរី
តុលាការបារាំង បានបើកសវនាការ កាលពីថ្ងៃអង្គារ ទី៤មេសា ដើម្បីកាត់ទោសដោយកំបាំងមុខ ទៅលើមន្ត្រីមានអំណាចនៃរបបផ្តាច់ការស៊ីរី ដែលរងការចោទពីបទឧក្រិដ្ឋកម្មប្រឆាំងមនុស្សជាតិ។ បណ្តឹងចោទប្រកាន់ ដែលត្រូវបានដាក់នៅមុខតុលាការបារាំង ដោយក្រុមគ្រួសារជនរងគ្រោះ២នាក់ ជាជនជាតិបារាំងដើមកំណើតស៊ីរី ហើយដែលបានស្លាប់ដោយការធ្វើទារុណកម្ម នៅស៊ីរី។
ចុះផ្សាយនៅថ្ងៃ៖
ស្តាប់ - ០២:១៣
មន្ត្រីមានអំណាចនៃរបបផ្តាច់ការស៊ីរី ចំនួន៣នាក់ ត្រូវតុលាការបារាំង បើកសវនាការកត់ទោសកំបាំងមុខ ពីបទឧក្រិដ្ឋកម្មប្រឆាំងមនុស្សជាតិ ធ្វើទៅលើជនជាតិបារាំង ដើមកំណើត២នាក់ឪពុកកូន។ ជនជាប់ចោទទី១ ឈ្មោះ Ali Mamlouk ជាប្រធានការិយាល័យសន្តិសុខជាតិស៊ីរី ជនជាប់ចោទទី២ឈ្មោះ Jamil Hassan ប្រធានក្រុមចារកិច្ចសម្ងាត់នៃកងទ័ពអាកាសស៊ីរី។ ចំណែកជនជាប់ចោទទី៣ ឈ្មោះ Abdel Salam Mahmoud ជាប្រធានផ្នែកស៊ើបការណ៍នៃការិយាល័យចារកិច្ចកងទ័ពអាកាសស៊ីរី។
សូមបញ្ជាក់ថា ជនរងគ្រោះទាំង២នាក់ជាជនជាតិបារាំង ដើមកំណើតស៊ីរី ម្នាក់ជាឪពុកឈ្មោះ Mazzen Dabbagh ជាទីប្រឹក្សាអប់រំនៅសាលាបារាំងក្រុងដាម៉ាស ចំណែកជនរងគ្រោះទី២ ជាកូន ឈ្មោះPatrick Dabbagh ជានិស្សិតនៅមហាវិទ្យាល័យអក្សរសាស្ត្រមនុស្សសាស្ត្រក្រុងដាម៉ាស។ អ្នកទាំងពីរត្រូវបានចាប់ខ្លួន នៅខែវិច្ឆិកា ឆ្នាំ២០១៣ ដោយកម្លាំងសមត្ថកិច្ចដែលអះអាងថាជាក្រុមចារកិច្ចរបស់កងទ័ពអាកាសស៊ីរី។
បុរសម្នាក់ជាប្អូនថ្លៃរបស់លោក Mazzen Dabbagh ដែលត្រូវបានគេចាប់ខ្លួនជាមួយគ្នាដែរនោះ បានអះអាងថា ជនរងគ្រោះទាំង២ត្រូវបានគេបញ្ជូនយកទៅមន្ទីរឃុំឃាំង al-Mezzeh ដែលគេស្គាល់ថាជាទីកន្លែងធ្វើទារុណកម្មរបស់របបផ្តាច់ការបាស្ហា អាល់អាសាដ។ ខែសីហាឆ្នាំ២០១៨ របបផ្តាច់ការស៊ីរី បានទទួលស្គាល់ថា ជនរងគ្រោះទាំង២បានស្លាប់ហើយ។ ឆ្លងកាត់ការស៊ើបអង្កេតរបស់អាជ្ញាធរតុលាការបារាំង ដោយផ្អែកលើសក្ខីកម្មជាច្រើន បានបង្ហាញឲ្យដឹងថា ជនរងគ្រោះទាំង២ ក៏មិនខុសពីអ្នកទោសជាច្រើនសិបនាក់ផ្សេងទៀត បានរងនូវការធ្វើទារុណកម្មយ៉ាងព្រៃផ្សៃបំផុត រហូតដល់ស្លាប់។
តំណាងសហព័ន្ធអន្តរជាតិដើម្បីសិទ្ធិមនុស្ស បានអបអរសាទរ ចំពោះការបើកសវនាការររបស់តុលាការក្រុងប៉ារីស ដើម្បីកាត់ទោសអំពើឧក្រិដ្ឋកម្មសង្គ្រាមនៅស៊ីរី បើទោះបីជាសវនាការកំបាំងមុខ។ វាគឺជាការបោះជំហាន ឈានទៅលប់បំបាត់ និទណ្ឌភាព ពាក់ព័ន្ធនឹងឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ។ ក្រៅពីនៅបារាំង របបផ្តាច់ការស៊ីរី ត្រូវបានតុលការនៅអាល្លឺម៉ង់ បើកសវនាការកាត់ទោសចំនួន៣សំណុំរឿងហើយ ទាក់ទិននឹងអំពើឧក្រិដ្ឋធ្វើទៅលើប្រជាជនស៊ីវីលស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ