តួកគី៖លោកអ៊ែរដូហ្កានផ្តល់ភ្លើងខៀវសម្រាប់ហ្វាំងឡង់ តែបន្តទុកភ្លើងក្រហមសម្រាប់ស៊ុយអែតជាសមាជិកអូតង់
នៅក្នុងប្រទេសតួកគី ប្រធានាធិបតីលោកអ៊ែរដូហ្កានបានដកវេតូចេញវិញសម្រាប់សមាជិកភាពរបស់ប្រទេសហ្វាំងឡង់នៅក្នុងអង្គការអូតង់។ ការសម្រេចចិត្តជាផ្លូវការរបស់លោកអ៊ែរដូហ្កានបានធ្វើឡើងនាថ្ងៃសុក្រ ទី១៧ មីនានាឱកាសដំណើរទស្សនកិច្ចរបស់ប្រធានាធិបតីហ្វាំងឡង់លោក សូលី នីនីស្តូក្នុងទីក្រុងអង់ការ៉ា។ ការបើកភ្លើងខៀវសម្រាប់ហ្វាំងឡង់នេះត្រូវបានលោកអ៊ែរដូហ្កានស្នើឲ្យសភាតួកគីផ្តល់សច្ចាប័នជាផ្លូវការ។ តែសម្រាប់ស៊ុយអែតវិញត្រូវបានលោកអ៊ែរដូហ្កានបន្តខ្ទប់ដដែរនៅពេលនេះ។
ចុះផ្សាយនៅថ្ងៃ៖
ស្តាប់ - ០២:០៤
ទីបំផុត និងបន្ទាប់ពីបានជាប់គាំងអស់រយៈពេល ៩ខែមក ពិធីសារសុំចូលជាសមាជិកអូតង់របស់ប្រទេសហ្វាំងឡង់បានចូលដល់សភាតួកគីហើយ។ ដំណឹងនេះត្រូវបានប្រកាសដោយប្រធានាធិបតីតួកគីលោកអ៊ែរដូហ្កាននៅក្នុងសន្និសីទកាសែតរួមគ្នាជាមួយសមភាគីហ្វាំងឡង់លោកសូលី នីនីស្តូ។ លោកអ៊ែរដូហ្កានសង្ឃឹមថា ពិធីសារសុំចូលជាសមាជិកអូតង់របស់ហ្វាំងឡង់នឹងត្រូវសភាតួកគីឲ្យសច្ចាប័ននៅមុនការបោះឆ្នោតប្រធានាធិបតី និងសភាតួកកីដែលគ្រោងរៀបចំនៅថ្ងៃទី១៤ ឧសភាខាងមុខ។
ការផ្តល់ភ្លើងខៀវឲ្យហ្វាំងឡង់ត្រូវបានលោកអ៊ែរដូហ្កានពន្យល់ថា ហ្វាំងឡង់បានគោរពតាមកិច្ចសន្យាដែលមានចែងនៅក្នុងអនុស្សរណៈចុះហត្ថលេខាក្នុងខែមិថុនា ឆ្នាំ ២០២២ នៅក្នុងទីក្រុងម៉ាឌ្រីដ ប្រទេសអេស្ប៉ាញ។ អនុស្សរណៈបានតម្រូវឲ្យហ្វាំងឡង់ និងស៊ុយអែតរួមសហការជាមួយតួកគីបន្ថែមទៀតនៅក្នុងយុទ្ធនាការប្រឆាំងនឹងភេរវនិយម។ ដូច្នេះសម្រាប់ប្រធានាធិបតីតួកគី ហ្វាំងឡង់ជាសិស្សល្អ ហើយស៊ុយអែតនៅជាសិស្សមិនទាន់បានកែខ្លួនដែលតួកគីមិនទាន់អាចផ្តល់ភ្លើងខៀវឲ្យបាននៅឡើយទេ។
ប្រធានាធិបតីតួកគីបន្តស្តីបន្ទោសស៊ុយអែតក្នុងរឿងមិនព្រមបញ្ជូនឲ្យតួកគីនូវពួកភេរវជន ពិសេសសមាជិកនៃគណបក្សពលករកួដឌីស្ថានហៅកាត់ PKK។ លោកអ៊ែរដូហ្កានបានបញ្ជាក់ពីការផ្តល់ឲ្យស៊ុយអែតនូវបញ្ជីឈ្មោះមនុស្សចំនួន ១២៤នាក់ដែលស៊ុយអែតត្រូវបញ្ជូនឲ្យតួកគី។ ឆ្លើយតបនឹងតួកគីដែលបានផ្តល់ភ្លើងខៀវឲ្យហ្វាំងឡង់ ស៊ុយអែតបានត្រឹមសម្តែងការសោកស្តាយ និងខកចិត្ត។ ចំណែកអាមេរិកតាមរយៈទីប្រឹក្សាសន្តិសុខជាតិរបស់សេតវិមានលោកជេក ស៊ូលីវ៉ាន់បានសាទរលើការឲ្យសច្ចាប័នប្រកាសដោយតួកគី និងសង្ឃឹម រួមទាំងលើកទឹកចិត្តឲ្យតួកគីផ្តល់សច្ចាប័នឆាប់រហ័សដល់ប្រទេសស៊ុយអែតមួយទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ