សង្រ្គាមអ៊ុយក្រែន៖លោកហ្សេឡេស្គីជំរុញឲ្យថ្នាក់ដឹកនាំពិភពលោកពន្លឿនការគាំទ្រផ្លូវយោធាដល់អ៊ុយក្រែន
ថ្ងៃសៅរ៍ ទី១៨ កុម្ភៈជាថ្ងៃទី២ នៃសន្និសីទស្តីពីសន្តិសុខលើកទី ៥៩ ដែលបានរៀបចំធ្វើនៅក្នុងទីក្រុងម៉ុយនិចប្រទេសអាល្លឺម៉ង់។ ខុសពីឆ្នាំមុនៗ សន្និសីទដែលមានការចូលរួមដោយមានប្រមុខរដ្ឋ ប្រមុខរដ្ឋាភិបាលចំនួន៣០ប្រទេស រួមទាំងប្រមុខការទូតជាង ១០០នាក់មកពីជាង១៥០ប្រទេសក្នុងឆ្នាំនេះបានគ្របដណ្តប់ខ្លាំងដោយសង្រ្គាមអ៊ុយក្រែន។ ថ្លែងនាឱកាសនោះ ប្រធានាធិបតីបារាំងបានបញ្ជាក់ច្បាស់ៗថា គេត្រូវតែបង្កើនការគាំទ្រ និងប្រឹងប្រែងជួយដល់ការតស៊ូរបស់ប្រជាជន និងកងទ័ពអ៊ុយក្រែន។ លោកម៉ាក្រុងបានទទួលស្គាល់ថា វាមិនទាន់ជាពេលវេលានៃកិច្ចសន្ទនាទេ។ ចំណែកប្រមុខរដ្ឋាភិបាលអាល្លឺម៉ង់លោកអូឡាហ្វ ស្ហុលស៍បានអំពាវនាវឲ្យប្រទេសលោកខាងលិចដែលអាចផ្តល់រថក្រោះឲ្យអ៊ុយក្រែនបានត្រូវធ្វើភ្លាមៗ។ ដោយឡែក ប្រធានាធិបតីអ៊ុយក្រែនលោកហ្សេឡេនស្គីបានចូលរួមតាមវីដេអូដោយបានជំរុញឲ្យថ្នាក់ដឹកនាំពិភពលោកបង្កើនល្បឿនគាំទ្រអ៊ុយក្រែនផ្លូវយោធាឲ្យបានលឿនបំផុត។ តាមលោកហ្សេឡេនស្គី គេគ្មានជម្រើសណាផ្សេងដើម្បីជំនួសឲ្យល្បឿននេះទេ។
ចុះផ្សាយនៅថ្ងៃ៖
ស្តាប់ - ០១:៣០
« យើងត្រូវការធ្វើដំណើរកាន់តែលឿន។ ធ្វើដំណើរកាន់តែលឿនដើម្បីបញ្ចប់កិច្ចព្រមព្រៀងរបស់យើងកាន់តែលឿន បង្កើនល្បឿននៃការបញ្ជូនគ្រឿងសព្វាវុធដើម្បីពង្រឹងការតស៊ូប្រយុទ្ធរបស់យើង បង្កើនល្បឿននៃការសម្រេចចិត្តរបស់យើងដើម្បីកម្រិតសក្តានុពលរបស់ប្រទេសរុស្ស៊ី។ គេគ្មានជម្រើសណាផ្សេងដើម្បីជំនួសឲ្យល្បឿននេះទេ ព្រោះជីវិតមនុស្សកំពុងអាស្រ័យលើល្បឿននេះឯង។
ការយឺតយ៉ាវជា និងតែងជាកំហុសឆ្គងមួយ។ ខណៈពេលដែលយើងកំពុងចរចាចង់បានរថក្រោះទំនើបៗដើម្បីពង្រឹងការការពាររបស់យើង វិមានក្រឹមឡាំងកំពុងគិត។ កំពុងគិតរកមធ្យោបាយដើម្បីច្របាច់ ក ប្រទេសម៉ុលដាវី។ ខណៈពេលដែលយើងកំពុងព្យាយាមនិយាយបញ្ចុះបញ្ចូលថា អ៊ុយក្រែនត្រូវការយន្តហោះចម្បាំងទំនើបៗ វិមានក្រឹមឡាំងបាននិយាយជំនះ បញ្ចុះបញ្ចូលប្រទេសអ៊ីរ៉ង់រួចហើយ។
លទ្ធផលមិនត្រឹមមានតែការបាត់បង់ជីវិតដោយដ្រូនអ៊ីរ៉ង់នៅលើមេឃអ៊ុយក្រែនប៉ុណ្ណោះទេ តែក៏មានផងដែរនូវអ្វីដែលវិមានក្រឹមឡាំងបានបង់ឲ្យរបបក្រុងតេហេរ៉ង់។ តើអស់លោកប្រាកដទេថា មានតែជាមួយលុយទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ