លោកពូទីនគំរាមសងសឹកក្រោយប្រទេសលោកខាងលិចយល់ព្រមប្រគល់រថក្រោះឲ្យអ៊ុយក្រែន
ប្រធានាធិបតីរុស្ស៊ី លោកវ្លាឌីមៀរ ពូទីនបានព្រមានប្រទេសលោកខាងលិច ដែលបានផ្តល់រថក្រោះទំនើបទៅឲ្យកងទ័ពអ៊ុយក្រែន។ នៅក្នុងអំឡុងប្រារព្ធខួប ៨០ឆ្នាំ នៃជ័យជំនះរបស់សហភាពសូវៀត លើពួកណាហ្ស៊ីអាល្លឺម៉ង់ នៅស្តាលីនក្រាដ កាលពីថ្ងៃ ព្រហស្បតិ៍ ប្រធានាធិបតីរុស្ស៊ី បានប្រៀបប្រដូចការបញ្ជូនរថក្រោះអាល្លឺម៉ង់ទៅអ៊ុយក្រែន ទៅនឹងការគំរាមកំហែងរបស់រថក្រោះអាល្លឺម៉ង់ ដែលពួកទាហានណាហ្ស៊ីធ្លាប់ប្រើសម្រាប់វាយប្រហារសូវៀតក្នុងសម័យសង្រ្គាមលោកលើកទី២។
ចុះផ្សាយនៅថ្ងៃ៖
ស្តាប់ - ០១:៥៩
នៅចំពោះមុខទាហាន និងមន្រ្តីយោធារុស្ស៊ី នៅក្នុងពិធីប្រារព្ធខួប៨០ឆ្នាំ នៃជ័យជំនះរបស់សូវៀតលើទាហានណាហ្ស៊ីអាល្លឺម៉ង់ នៅក្នុងសង្រ្គាមលោកលើកទី២ ប្រធានាធិបតីរុស្ស៊ី លោកពូទីនបានថ្លែងថា រថក្រោះអាល្លឺម៉ង់កំពុងគំរាមកំហែងរុស្ស៊ីសាជាថ្មី។
សម្រាប់លោកពូទីន វាជារឿងមិនគួរឲ្យជឿ ប៉ុន្តែ វាជារឿងពិត។ “សាជាថ្មីម្តងទៀត អ្នកបន្តវេនពីហ៊ីត្លែរចង់ប្រយុទ្ធតតាំងនឹងរុស្ស៊ី នៅលើទឹកដីអ៊ុយក្រែន តាមរយៈការប្រើប្រាស់រថក្រោះផលិតនៅអាល្លឺម៉ង់។
តាមការវាយតម្លៃរបស់ប្រធានាធិបតីរុស្ស៊ី ការផ្តល់រថក្រោះអាល្លឺម៉ង់ Leopard 2ទៅឲ្យអ៊ុយក្រែន កំពុងធ្វើឲ្យគេជាន់ដានប្រវត្តិសាស្រ្តចាស់។ យ៉ាងណាក៏ដោយ លោកពូទីន បានអះអាងថា រុស្ស៊ីមានគ្រប់មធ្យោបាយ ដែលមិនមែនមានត្រឹមតែរថក្រោះ ដើម្បីឆ្លើយតបនឹងការផ្តល់អាវុធទៅឲ្យអ៊ុយក្រែន។ សម្តីគំរាមរបស់លោកពូទីន ធ្វើឲ្យគេគិតទៅដល់លទ្ធភាពប្រើប្រាស់អាវុធនុយក្លេអ៊ែរ របស់រុស្ស៊ី នៅក្នុងសង្រ្គាមអ៊ុយក្រែន។
បន្ទាប់ពីបរាជ័យក្នុងសមរភូមិអ៊ុយក្រែន កាលពីអំឡុងខែតុលាឆ្នាំមុន លោកពូទីនធ្លាប់បានពន្លយពាក្យគំរាមបែបនេះម្តងហើយ និងបានប្រកាសកេណ្ឌទ័ព៣សែននាក់បន្ថែមទៀត សម្រាប់ប្រតិបត្តិការយោធាពិសេសរបស់រុស្ស៊ី នៅអ៊ុយក្រែន។
នៅក្រោយប្រកាន់ជំហររារែក ដោយសារខ្លាចផ្ទុះសង្រ្គាមសងសឹកពីរុស្ស៊ី អាមេរិក អង់គ្លេស និងអាល្លឺម៉ង់ នៅទីបំផុត បានប្រកាស យល់ព្រមប្រគល់រថក្រោះដ៏ទំនើបរបស់ខ្លួនទៅឲ្យកងទ័ពអ៊ុយក្រែន តាមការទាមទារចង់បានរបស់ក្រុងកៀវ។
នៅក្នុងពេលរង់ចាំរថក្រោះអាមេរិក និងអាល្លឺម៉ង់ ដែលត្រូវការពេលវេលាច្រើនខែ ទម្រាំទៅដល់អ៊ុយក្រែន កងទ័ពអ៊ុយក្រែនសព្វថ្ងៃ បានទទួលពីប្រទេសលោកខាងលិច តែមីស៊ីលដែលបាញ់បានចម្ងាយ ១០០គីឡូម៉ែត្រប៉ុណ្ណោះ។
នៅថ្ងៃ ព្រហស្បតិ៍ ប្រធានាធិបតីអ៊ុយក្រែន លោកហ្សេឡេនស្គីបាននិយាយស្របតាមរដ្ឋមន្រ្តីការពារជាតិរបស់លោកដែលថា រុស្ស៊ីគ្រោងនឹងបើកការវាយប្រហារទ្រង់ទ្រាយធំ នៅថ្ងៃទី ២៤កុម្ភៈ ដែលខួប១ឆ្នាំនៃការបើកសង្រ្គាមរុស្ស៊ីឈ្លានពានអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ