ប្រធានាធិបតីបារាំងចង់បង្កើនល្បឿនកាត់បន្ថយការបញ្ចេញឧស្ម័នកាបូនិក ដើម្បីសម្រេចគោលដៅ ឆ្នាំ ២០៣០
បារាំងត្រូវប្រឹងប្រែងទ្វេដង ក្នុងការកាត់បន្ថយ ការបញ្ចេញឧស្ម័នកាបូនិក បើសិនចង់សម្រេចគោលដៅអាកាសធាតុឆ្នាំ ២០៣០។ នៅក្នុងសារវីដេអូ ដែលផ្សព្វផ្សាយនៅលើបណ្តាញសង្គម នៅពីរថ្ងៃក្រោយ កិច្ចប្រជុំក្រុមប្រឹក្សាស្តីពីផែនការអេកូឡូស៊ី នៅវិមានប្រធានាធិបតី ប្រមុខដឹកនាំបារាំងបាននិយាយត្រួសៗពីវិស័យដែលគេត្រូវចាត់វិធានការកាត់បន្ថយការបញ្ចេញឧស្ម័នផ្ទះកញ្ចក់។
ចុះផ្សាយនៅថ្ងៃ៖
ស្តាប់ - ០២:៤៦
នៅក្នុងក្របខ័ណ្ឌនៃកិច្ចព្រមព្រៀងអន្តរជាតិស្តីពីអាកាសធាតុ ដែលមានចែងពីការទប់ស្កាត់កុំឲ្យសីតុណ្ហភាពនៅលើផែនដី កើនឡើងខ្ពស់ជាង ១,៥អង្សា បារាំងបានសន្យាកាត់បន្ថយ ការបញ្ចេញផ្ទះកញ្ចក់ ឲ្យបាន៤០% ពីពេលនេះ ដល់ឆ្នាំ ២០៣០។ ប៉ុន្តែ នៅក្នុងវីដេអូ ដែលផ្សព្វផ្សាយនៅលើបណ្តាញសង្គម ធ្វីតធ័រ កាលពីថ្ងៃសៅរ៍ ប្រធានាធិបតី បារាំង លោកអេម៉ានុយអែល ម៉ាក្រុងបាននិយាយថា បារាំងស្ថិតនៅឆ្ងាយណាស់ ឆ្ងាយពី គោលដៅរបស់ខ្លួន។
ដើម្បីសម្រេចតាមគោលដៅឆ្នាំ ២០៣០ ពោលគឺកាត់បន្ថយការបញ្ចេញ ឧស្ម័នផ្ទះកញ្ចក់ ឲ្យបាន ៤០% បារាំងត្រូវបញ្ចេញឧស្ម័នកាបូនិក ត្រឹមតែ ២៧០លានតោន ក្នុងមួយឆ្នាំ។ ប៉ុន្តែ សព្វថ្ងៃនេះ បារាំង នៅបន្តបញ្ចេញឧស្ម័នផ្ទះកញ្ចក់ ចន្លោះ ពី ៤១០ ទៅ៤៣០លានតោនក្នុងមួយឆ្នាំៗ។ ដូច្នេះ ដើម្បីកាត់បន្ថយ ការបញ្ចេញឧស្ម័នកាបូនិក ឧស្ម័នផ្ទះកញ្ចក់ ឲ្យបាន៤០% បារាំង ត្រូវប្រឹងប្រែងទ្វេដង ពោលគឺត្រូវកាត់បន្ថយ ចំនួន ឧស្ម័នកាបូនិក ប្រមាណ ១៤០លានតោន ក្នុងមួយឆ្នាំៗ។
នៅក្នុងសារវីដេអូ ប្រធានាធិបតីបារាំង ទទួលស្គាល់ ថា នៅក្នុងរយៈពេលដឹកនាំរបស់លោកនៅ៥ឆ្នាំមកនេះ មានការប្រឹងប្រែងដើម្បីកាត់បន្ថយ ការបញ្ចេញឧស្ម័នផ្ទះកញ្ចក់ ប៉ុន្តែ ការប្រឹងប្រែងនៅមិនទាន់គ្រប់គ្រាន់។ “បើសិនយើងមិនផ្លាស់ប្តូរអ្វីទេ នោះយើងមិនអាចសម្រេចគោលដៅឆ្នាំ ២០៣០បានទេ” នេះជាប្រសាសន៍របស់ប្រធានាធិបតីបារាំង មុននឹងលើកឡើងពីវិស័យដែលគេត្រូវចាត់វិធានការកាត់បន្ថយ ការបញ្ចេញឧស្ម័នផ្ទះកញ្ចក់។
តាមប្រធានាធិបតី មានវិស័យធំៗចំនួន ៦ដែលទទួលខុសត្រូវបញ្ចេញឧស្ម័នផ្ទះកញ្ចក់ ដូចជាវិស័យដឹកជញ្ជូន បញ្ចេញឧស្ម័នកាបូនិក ៣០% វិស័យកសិកម្ម ១៩% វិស័យ ឧស្សាហកម្ម ១៩% វិស័យសំណង់ ១៨% វិស័យថាមពល ១០% និងកាកសំណល់ ចំនួន ៣%។
សម្រាប់ប្រធានាធិបតីបារាំង នៅក្នុងវិស័យដឹកជញ្ជូន គេអាចកាត់បន្ថយការបញ្ចេញឧស្ម័នកាបូនិក យ៉ាងមានប្រសិទ្ធិភាពបំផុត បើសិនគេបន្តវិនិយោគ អភិវឌ្ឍលើរថយន្តអគ្គិសនី។ នៅត្រង់ចំណុចនេះ លោកម៉ាក្រុងបាននិយាយពីផែនការរបស់រដ្ឋាភិបាល ក្នុងការតម្រង់ទិស បង្កើនការផលិតរថយន្តអគ្គិសនីក្នុងទឹកដីបារាំង។ សម្រាប់វិស័យកសិកម្មដែលបញ្ចេញឧស្ម័នមេតានក្រាស់ក្រែល លោកប្រធានាធិបតីម៉ាក្រុង បានបញ្ជាឲ្យគេរៀបចំផែនការលម្អិត ដែលដើរស្របគ្នានឹងអនាគតច្បាប់ថ្មី ក្នុងការសម្របសម្រួល ការវិនិយោគ របស់កសិករវ័យក្មេង។
សម្រាប់ប្រធានាធិបតីបារាំង នៅមានការងារដ៏ច្រើនសន្ធឹកសន្ធាប់ដែលគេត្រូវធ្វើ ដើម្បីកាត់បន្ថយការបញ្ចេញឧស្ម័នផ្ទះកញ្ចក់។ វាមិនមែនជារឿងថ្មី គួរឲ្យភ្ញាក់ផ្អើល ប៉ុន្តែ ឥលូវនេះ គេត្រូវធ្វើសកម្មភាពជាក់ស្តែង ដូចជាការស្វែងរកថវិកាជាដើម ព្រោះថា ដើម្បីអាចសម្រេចគោលដៅ គេត្រូវការទាំងថវិការដ្ឋ និងថវិកាឯកជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ