ទីភ្នាក់ងារអវកាសអឺរ៉ុបគ្រោងអភិវឌ្ឍបណ្តាញទូរគមនាគមន៍កង់ទិក
ទីភ្នាក់ងារអវកាសអឺរ៉ុប ហៅកាត់ថា “អេសា” (ESA) បានសម្រេចផ្តល់កិច្ចសន្យាទៅឲ្យក្រុមហ៊ុនឯកជនអឺរ៉ុប ដើម្បីអភិវឌ្ឍបណ្តាញទូរគមនាគមន៍ ដោយប្រើបច្ចេកវិទ្យាកង់ទិក។ ជាបណ្តាញទូរគមនាគមន៍ជំនាន់ថ្មី ដែលមានទាំងបណ្តាញនៅលើដី និងផ្កាយរណបនៅទីអវកាស ហើយដែលមានសុវត្ថិភាពខ្ពស់ អាចទប់ទល់នឹងការវាយប្រហារតាមអ៊ីនធ័រនែត។
ចុះផ្សាយនៅថ្ងៃ៖
ស្តាប់ - ០១:៥៦
គម្រោងអភិវឌ្ឍបណ្តាញទូរគមនាគមន៍កង់ទិក របស់ទីភ្នាក់ងារអវកាសអឺរ៉ុប “អេសា” ត្រូវបានរៀបចំធ្វើឡើង ដោយមានកិច្ចសហប្រតិបត្តិការពីសំណាក់ទីភ្នាក់ងារអវកាសបារាំង (CNES) និងទីភ្នាក់ងារអវកាសអូទ្រីស (ALR) ហើយធ្វើក្នុងគោលដៅចម្បងមួយ គឺត្រួសត្រាយផ្លូវឲ្យអឺរ៉ុបមានបណ្តាញទូរគមនាគមន៍ផ្ទាល់ខ្លួនប្រកបដោយសុវត្ថិភាពខ្ពស់បំផុត ទប់ទល់នឹងការវាយប្រហារតាមប្រព័ន្ធអ៊ីនធ័រនែត (Cyberattack)។
គេដឹងថា បច្ចុប្បន្ននេះ បច្ចេកវិទ្យាកុំព្យូទ័រកង់ទិកកំពុងតែរីកចម្រើនជឿនលឿនទៅមុខ ហើយកុំព្យូទ័រកង់ទិកនេះ ជាប្រភេទកុំព្យូទ័រដែលមានសមត្ថភាពខ្ពស់អាចបំបែកបានយ៉ាងងាយនូវលេខសម្ងាត់ក្នុងបណ្តាញទំនាក់ទំនងក្លាស៊ិក ដែលយើងមានក្នុងពេលបច្ចុប្បន្ននេះ។
ដូច្នេះ គេចាំបាច់ត្រូវតែបង្កើតបណ្តាញទំនាក់ទំនងជំនាន់ថ្មី ដែលប្រើបច្ចេកវិទ្យាកង់ទិកនេះដែរ ដើម្បីអាចទប់ទល់នឹងសមត្ថភាពបំបែកលេខសម្ងាត់ដោយកុំព្យូទ័រកង់ទិកដូចគ្នា។
កិច្ចសន្យាអភិវឌ្ឍគម្រោងទូរគមនាគមន៍កង់ទិក ដែលគេឲ្យឈ្មោះថា « TeQuantS » ត្រូវបានទីភ្នាក់ងារអេសាសម្រេចផ្តល់ទៅឲ្យសម្ព័ន្ធក្រុមហ៊ុនអឺរ៉ុប នាំមុខដោយក្រុមហ៊ុន Thales Alenia Space ដែលជាក្រុមហ៊ុនវិនិយោគរួម រវាងក្រុមហ៊ុន Thales របស់បារាំង និងក្រុមហ៊ុន Leonardo របស់អ៊ីតាលី។
យោងតាមសេចក្តីប្រកាសព័ត៌មានរបស់ក្រុមហ៊ុន Thales Alenia Space ចេញផ្សាយ នៅថ្ងៃចន្ទនេះ កិច្ចសន្យា ដែលក្នុងជំហានដំបូងមានទឹកប្រាក់ជាង ១០លានអឺរ៉ូ មានគោលដៅសាងសង់ និងដាក់បង្ហាញជាក់ស្តែង អំពីប្រសិទ្ធភាពនៃបណ្តាញទំនាក់ទំនងរយៈចម្ងាយឆ្ងាយ រវាងផែនដី និងផ្កាយរណប ដោយប្រើបច្ចេកវិទ្យាកង់ទិក ដើម្បីឈានទៅបង្កើតបណ្តាញទំនាក់ទំនងកង់ទិកជាលក្ខណៈទូលំទូលាយ ទៅថ្ងៃអនាគត។ បណ្តាញទំនាក់ទំនងកងទិក ដែលមានទាំងបណ្តាញផ្កាយរណប ដែលនៅក្នុងទីអវកាស ក្នុងគន្លងតារាវិថីជុំវិញផែនដី ហើយបូករួមជាមួយនឹងស្ថានីយ៍ដែលនៅលើដី តភ្ជាប់ជាខ្សែបណ្តាញដោយខ្សែកាបអុបទិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ