រុស្ស៊ី ៖ ការនាំចេញឧស្ម័ន ថយចុះអស់ជិតពាក់កណ្តាលនៅឆ្នាំ២០២២
ការនាំចេញឧស្ម័នរបស់ក្រុមហ៊ុនរដ្ឋរុស្ស៊ីហ្កាសព្រុម ទៅបរទេស ដោយមិនរាប់ពីក្រុមប្រទេសជាអតីតសហភាពសូវៀត បានធ្លាក់ចុះអស់៤៥,៥% នៅឆ្នាំ២០២២។ នេះបើតាមសេចក្តីថ្លែងការណ៍របស់អគ្គនាយកក្រុមហ៊ុនហ្កាសរុស្ស៊ី ប្រកាសចេញនៅថ្ងៃ ចន្ទទី ២ មករា ២០២៣។
ចុះផ្សាយនៅថ្ងៃ៖
ស្តាប់ - ០២:៣០
នៅក្នុងសេចក្តីថ្លែងការណ៍ លោក អាឡិចសី មីឡឺ Alexei Miller អគ្គនាយកក្រុមហ៊ុនឧស្ម័នGazprom រុស្ស៊ី បានគូសបញ្ជាក់ថា ក្រុមហ៊ុនបាននាំចេញហ្កាស ចំនួន ១០០,៩ពាន់លានម៉ែត្រគូប នៅឆ្នាំ២០២២ ទៅបរទេសដែលនៅឆ្ងាយ ពោលគឺចង់សំដៅលើបណ្តាប្រទេសដែលមិនធ្លាប់ជាអតីតសហភាពសូវៀត។ កាលពីឆ្នាំ២០២១ បណ្តាប្រទេសទាំងនោះបានទទួលនាំចូលឧស្ម័នពីក្រុមហ៊ុនGazprom ដល់ទៅ១៨៥,១ពាន់លានម៉ែត្រគូបឯណោះ។
មានន័យថា ការនាំចេញឧស្ម័នរបស់រុស្ស៊ី ទៅបណ្តាប្រទេសមិនមែនជាអតីតសហភាពសូវៀត បានធ្លាក់ចុះអត់ជិតពាក់កណ្តាល។ ដើម្បីលុបបំពេញការខាតបង់នេះ មូស្គូបានបង្កើន និងពន្លឿនការនាំចេញឧស្ម័នទៅឱ្យមហាយក្សចិន ដែលស្រែកឃ្លានថាមពលបំផុត។ នៅឆ្នាំ២០២២ ការនាំចេញឧស្ម័នទៅចិន មានបរិមាណច្រើនជាងសេចក្តីត្រូវការចែងក្នុងកិច្ចសន្យាទិញទៅទៀត។ នេះបើតាមលោកអគ្គនាយកក្រុមហ៊ុនហ្កាសព្រុម ដោយបង្ហាញទស្សនៈវិស័យអនាគត នៅថ្ងៃចន្ទទី២មករានេះថា សេចក្តីត្រូវការរបស់ពិភពលោកផ្នែកឧស្ម័នរំពឹងខ្លាំងលើទីផ្សារអាស៊ី ជាពិសេសគឺចិនតែម្តង។
កាលពីចុងខែ ធ្នូ២០២២ លោកប្រធានាធិបតីរុស្ស៊ីពូទីន បានបញ្ជាឱ្យបើកធ្វើផលិតកម្មអណ្តូងឧស្ម័នដ៏ធំមួយនៅតំបន់ស៊ីបេរី ដើម្បីអាចបង្កើនការនាំចេញហ្កាសទៅចិន។ រុស្ស៊ីក៏បានលើកគម្រោងស្ថាបនាបំពង់បង្ហូរឧស្ម័ននៅតំបន់ស៊ីបេរីទីពីរ Force de Siberie 2 ដែលតភ្ជាប់ត្រង់ទៅចិន ដោយឆ្លងកាត់តាមប្រទេសម៉ុងហ្គោលី ចាប់ពីឆ្នាំ២០២៤ទៅ។ ក្រៅអំពីបង្កើនការនាំចេញតាមបំពង់បង្ហូរឧស្ម័នស៊ីបេរី១ ហា្កសព្រុមក៏គ្រោងនឹងបង្កើនការនាំចេញឧស្ម័នតាមច្រកខាងកើតបំផុតរបស់ប្រទេសដែរ។ ជាមួយនឹងគម្រោងទាំងបី បើតាមលោក អាឡិចសី មីឡឺ រុស្ស៊ីអាចបញ្ជូនឧស្ម័នឱ្យចិនបានប្រមាណ១០០ពាន់លានម៉ែត្រគូប។
សូមបញ្ជាក់ថា ការនាំចេញឧស្ម័ន-ប្រេងរុស្ស៊ីមកអឺរ៉ុប ត្រូវបានកាត់បន្ថយយ៉ាងខ្លាំង ក្នុងអំឡុងពេលពេញមួយឆ្នាំ២០២២មកនេះ ព្រោះលោកខាងលិចបានសម្រេចដាក់ទណ្ឌកម្មប្រឆាំងនឹងមូស្គូដែលចូលធ្វើសង្គ្រាមឈ្លានពានអ៊ុយក្រែន។
កាលពីខែធ្នូ២០២២ សហភាពអឺរ៉ុបបានថែមទាំងសម្រេចព្រមព្រៀងគ្នា កំណត់តម្លៃនាំចេញប្រេងរបស់រុស្ស៊ីត្រឹម៦០ដុល្លារក្នុងមួយធុងបារីលផង។ វិធានការនេះធ្វើឡើងក្នុងបំណងកាត់បន្ថយប្រាក់ចំណូលរបស់រុស្ស៊ីបានមកពីការលក់ថាមពល។ ជាប្រតិកម្មតប រុស្ស៊ីប្រកាសហាមឃាត់ចាប់ពីថ្ងៃទី ១កុម្ភៈ២០២៣ទៅ មិនឱ្យលក់ប្រេងទៅឱ្យបរទេសណាដែលប្រើវិធានការកំហិតតម្លៃប្រេងលក់ចេញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ