អង្គការសុខភាពពិភពលោក អំពាវនាវសុំប្តូរផ្លាស់របៀបគ្រប់គ្រងវ៉ាក់សាំង
នៅក្នុងរបាយការណ៍ថ្មី អង្គការសុខភាពពិភពលោក បានអះអាងថាថ្នាំបង្ការគួរតែត្រូវបានគេគិតគូរក្នុងនាមជាសម្បត្តិសាធារណៈ និងមិនត្រូវអភិវឌ្ឍ ផលិត និង ចែកចាយថ្នាំបង្ការ ដោយរំពឹងយកផលចំណេញ សម្រាប់តែមនុស្សមួយក្រុមណាទេ។ បើតាមនាយកអង្គការសុខភាពលោក Tedros Adhanom Ghebreyesus ក្នុងមួយឆ្នាំៗ មានមនុស្សធំ និងកុមារជាច្រើនលាននាក់ណាស់នៅលើពិភពលោក មិនបានទទួលវ៉ាក់សាំង។
ចុះផ្សាយនៅថ្ងៃ៖
ស្តាប់ - ០១:៥៩
ថ្នាំបង្ការបានជួយសង្គ្រោះជីវិតមនុស្សបានរាប់លាននាក់ក្នុងមួយឆ្នាំៗ តែដោយហេតុគំរូចែកចាយ ផលិតនិងអភិវឌ្ឍវ៉ាក់សាំងបច្ចុប្បន្ន ដើម្បីបានចំណេញ មានមនុស្សជាច្រើនខ្លាំងទៀតណាស់ដែលសំណាងបានទទួលថ្នាំបង្ការ។ នេះបើតាមរបាយការណ៍ថ្មីរបស់អង្គការសុខភាពពិភពលោក។
ប្រទេសនៅលើពិភពលោកទាំងមូល បានព្រមព្រៀងកាលពីឆ្នាំទៅ កំណត់កម្មវត្ថុធានាផ្តល់វ៉ាក់សាំងឱ្យបានច្រើនប្រភេទដល់មនុស្សគ្រប់រូប ដើម្បីសង្គ្រោះជីវិតមនុស្សឱ្យបាន៥០លាននាក់នៅក្នុងដំណាច់ទសវត្សរ៍នេះ។ ប៉ុន្តែដើម្បីអាចសម្រេចមហិច្ឆតានេះបាន គេត្រូវការមានគំរូថ្មី ដែលអំណាចសាធារណៈត្រូវប្តេជ្ញាការពារវិស័យសុខភាពសាធារណៈថាជារបស់សាធារណៈ។ ក្នុងន័យនេះ អង្គការសុខភាពពិភពលោក បានអំពាវនាវឱ្យមានការវិនិយោគសាធារណៈដើម្បីធានាអភិវឌ្ឍនិងការផ្គត់ផ្គង់ថ្នាំបង្ការ ឱ្យបានត្រឹមត្រូវនិងមានសមភាព។
នៅក្នុងពេលកូវីដ១៩រាតត្បាត ថ្នាំវ៉ាក់សាំងថ្មី ត្រូវបានរកឃើញដោយប្រើពេលមិនដល់១ឆ្នាំ និងដោយប្រើបច្ចេកវិទ្យាយ៉ាងទំនើប ហើយអាចចែកចាយជូនប្រជាពលរដ្ឋទូទាំងពិភពលោក បានដោយជោគជ័យតាមរយៈការវិនិយោគសាធារណៈដែលពុំធ្លាប់មានពីមុនមកទេ។ ជោគជ័យនេះបានឆ្លុះបញ្ចាំងឱ្យឃើញអំពីសេចក្តីត្រូវជាចាំបាច់តាំងពីយូរមកហើយថាត្រូវតែចាត់ទុកវ៉ាក់សាំងជាសម្បត្តិសាធារណៈរួម មិនមែនគ្រាន់តែជាទំនិញមួយទេ។ នេះបើតាមការលម្អិតនៅក្នុងរបាយការណ៍ដដែល។
វិបត្តិកូវីដបានរំលេចឱ្យឃើញអំពីវិសមភាពនៃការទទួលថ្នាំបង្ការ ដោយជិតបីភាគបួននៃប្រជាជននៅប្រទេសអ្នកមានបានទទួលវ៉ាក់សាំងយ៉ាងហោចមួយដូសប្រឆាំងនឹងកូវីដទល់នឹងតែមួយភាគបួន នៅប្រទេសមានចំណូលទាប។ សម្រាប់អង្គការសុខភាពពិភពលោក តម្លៃវ៉ាក់សាំង ក៏ជាឧបសគ្គធំ ដោយប្រទេសអ្នកមានចំណូលមធ្យមខ្លះបង់ថ្លៃថ្នាំខ្ពស់ជាងប្រទេសអ្នកមានទៅទៀត ទោះបីជាតម្លៃថ្នាំប្រែប្រួលទៅតាមសមមាត្រនៃប្រាក់ចំណូលរបស់ពលរដ្ឋម្នាក់ៗក៏ដោយ។
របាយការណ៍ បានស្នើសុំឱ្យពិភពលោកបោះបង់គំនិតចង់ការពារកម្មសិទ្ធិបញ្ញាវ៉ាក់សាំង ដើម្បីពន្លឿនការផលិតនិងការចែកចាយថ្នាំបង្ការផ្សេងទៀត តាមគំរូថ្នាំបង្ការប្រឆាំងកូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ