របាយការណ៍ Opep៖កំណើនតម្រូវការប្រេងក្នុងលោកមិនប្រែប្រួល ទោះបីជាមានតម្លៃខ្ពស់
នៅថ្ងៃអង្គារ ទី១៣ កញ្ញា អង្គការនៃក្រុមប្រទេសនាំប្រេងចេញហៅកាត់ Opep បានចេញផ្សាយរបាយការណ៍ប្រចាំខែស្តីពីស្ថានភាពប្រេងក្នុងលោក។ របាយការណ៍បានព្យាករណ៍ថា កំណើនតម្រូវការប្រេងក្នុងលោកមិនប្រែប្រួលសម្រាប់ឆ្នាំ ២០២២ ក៏ដូចជាឆ្នាំ ២០២៣ ខាងមុខ។ Opep បានគូសបញ្ជាក់បន្ថែមនៅក្នុងរបាយការណ៍ដដែលថា ទឹកប្រាក់ដែលទទួលបានពីការចំណាយរបស់អ្នកប្រើប្រេងមានចំនួនច្រើនលើសពីការរំពឹងទុក ទោះជាប្រេងមានតម្លៃខ្ពស់ក៏ដោយ។
ចុះផ្សាយនៅថ្ងៃ៖
ស្តាប់ - ០២:០៤
សម្រាប់ឆ្នាំ ២០២២ របាយការណ៍របស់ Opep បានប្រមើលមើលពីកំណើនតម្រូវការប្រេងក្នុងលោកនៅដដែលមិនប្រែប្រួលក្នុងមួយថ្ងៃបើធៀបនឹងការវាយតម្លៃកាលពីខែសីហាកន្លងទៅដែលកំណើនតម្រូវការមានចំនួន ៣លាន ២សែនធុងបារីលក្នុងមួយថ្ងៃ ហើយបើគិតជាសរុប ពិភពលោកត្រូវការប្រេងប្រមាណជា ១០០លានធុងបារីលក្នុងមួយថ្ងៃ។ ការព្យាករណ៍នេះក៏បានបូកបញ្ចូលផងដែរពីកំណើនតម្រូវការបន្ថែមនៃនិន្នាការឆ្ពោះទៅប្រើឥន្ធនៈផូស៊ីលដើម្បីផលិតថាមពល។ តែរបាយការណ៍របស់ Opep មិនភ្លេចបញ្ជាក់ថាក្នុងឆ្នាំ ២០២២ តម្រូវការប្រេងនៃក្រុមប្រទេសសមាជិករបស់អង្គការនៃកិច្ចសហប្រតិបត្តិការ និងការអភិវឌ្ឍន៍សេដ្ឋកិច្ចហៅកាត់ OCDE បានកើនចំនួន ១លាន ៦សែនធុងបារីលក្នុងមួយថ្ងៃ។
កំណើនតម្រូវការនេះមានប្រហាក់ប្រហែលនឹងក្រុមប្រទេសនៅក្រៅអង្គការ OCDE ដែលមានចំនួន ១លាន ៥សែនធុងបារីលក្នុងមួយថ្ងៃ។ សម្រាប់ឆ្នាំ ២០២៣ ត្រូវបានរបាយការណ៍របស់ Opep ប្រមើលមើលពីកំណើនតម្រូវការមិនប្រែប្រួលទេ បើធៀបនឹងឆ្នាំ ២០២២ ពោលមានប្រមាណ ២លាន ១សែនធុងបារីលក្នុងមួយថ្ងៃ ហើយបើគិតជាសរុប ពិភពលោកត្រូវការប្រេងប្រមាណជាជាង ១០២លានធុងបារីលក្នុងមួយថ្ងៃនៅឆ្នាំ ២០២៣។ ការហ៊ានអះអាងយ៉ាងដូចនេះដោយ Opep លើកយកហេតុផលចំនួន ៣ ទៅពន្យល់ទី១ ស្ថានភាពសេដ្ឋកិច្ចរឹងមាំនៅក្នុងបណ្តាប្រទេសប្រើប្រេងច្រើន ទី២ ការបន្ធូរបន្ធយលើវិធានការរឹតបន្តឹងពាក់ព័ន្ធនឹងកូវីដ១៩ និងទី៣ ភាពមិនប្រាកដប្រជាភូមិសាស្រ្តនយោបាយអាចត្រូវបានកាត់បន្ថយ។
Opep បានបញ្ជាក់នៅក្នុងរបាយការណ៍ថា បើអាមេរិក និងចិនបានប្រឈមនឹងការលំបាកនាឆមាសទី១ ឆ្នាំ ២០២២ ស្ថានភាពសេដ្ឋកិច្ចរបស់មហាអំណាចសេដ្ឋកិច្ចទាំងពីរក្នុងលោកនឹងមានភាពប្រសើរឡើងនៅឆមាសទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ