រុស្ស៊ី ផ្អាកបង្ហូរឧស្ម័នមកអឺរ៉ុបបីថ្ងៃ និងឈប់ផ្គត់ផ្គង់ហ្កាសឱ្យបារាំងដោយគ្មានកំណត់
អឺរ៉ុបកំពុងស្រែកអាសន្នជាថ្មីម្តងទៀត បន្ទាប់ពី ក្រុមហ៊ុនហ្កាសរុស្ស៊ី ប្រកាសផ្អាកមិនបង្ហូរហ្កាស តាមបំពង់ Nord Stream មកឱ្យអឺរ៉ុប រយៈពេលបីថ្ងៃ ចាប់ពីថ្ងៃពុធនេះទៅ ដោយមូលហេតុបច្ចេកទេស។ ហើយមុននេះមួយថ្ងៃ ក្រុមហ៊ុនហ្កាសរុស្ស៊ី Gazprom បានប្រកាសឈប់ផ្គត់ផ្គង់ឧស្ម័នមកឱ្យក្រុមហ៊ុនថាមពលបារាំង Engie ចាប់ពីពេលភ្លាមនេះដែរ និងដោយគ្មានពេលកំណត់។
ចុះផ្សាយនៅថ្ងៃ៖
ស្តាប់ - ០២:១៨
គ្មានហ្កាសមួយដំណក់ហូរតាមបំពង់បង្ហូរNord Stream 1 ដែលតភ្ជាប់ដោយផ្ទាល់ពីអណ្តូងឧស្ម័នមកភាគខាងជើងប្រទេសអាល្លឺម៉ង់ទេ តាំងពីចូលថ្ងៃពុធទី ៣១សីហាមកនិងរហូតដល់ថ្ងៃសៅរ៍ទី ៣ កញ្ញា។ នេះបើតាមសេចក្តីជូនដំណឹងរបស់ក្រុមហ៊ុនហ្កាសរុស្ស៊ី ដោយពន្យល់ថា រុស្ស៊ីផ្អាកបំពង់បង្ហូរប្រេងNord Stream ព្រោះត្រូវជួសជុលស្ថានីយ៍Portovaïa ដែលស្ថិតនៅក្នុងទឹកដីរុស្ស៊ី តាមគម្រោងជារៀងរាល់ ១០០០ម៉ោងម្តង។
ប៉ុន្តែក្នុងបរិបទសង្គ្រាមនៅអ៊ុយក្រែន សហភាពអឺរ៉ុប សង្ស័យតែមូស្គូឆ្លៀតឱកាស បន្តផ្អាកការបង្ហូរឧស្ម័នមកអឺរ៉ុប យូរថ្ងៃទៀត ដើម្បីសងសឹកនឹងទណ្ឌកម្មរបស់ក្រុមបស្ចិមលោក ព្រោះខុសពីការជួលជុលខែមុន រុស្ស៊ីទើបប្រកាសដំណឹងជួសជុលស្ថានីយ៍បញ្ចូលហ្កាស កាលពីពីរសប្តាហ៍មុន និងធ្វើដោយភាគីរុស្ស៊ីខ្លួនឯង មិនមែនដោយអាល្លឺម៉ង់ដូចកាលលើកមុនៗទេ។
តាំងពីបើកប្រតិបត្តិការយោធាចូលឈ្លានពានអ៊ុយក្រែន នៅថ្ងៃទី ២៤កុម្ភៈ២០២២មក រុស្ស៊ីបានឈប់ផ្គត់ផ្គង់ហ្កាសឱ្យប៊ុលហ្ការី ដាណឺម៉ាក ហ្វាំងឡង់ ហូឡង់ និងប៉ូឡូញ។ នៅថ្ងៃអង្គារម្សិលមិញ Gazprom បានប្រកាសផ្អាកទាំងស្រុង ការផ្គត់ផ្គង់ឧស្ម័នមកឱ្យក្រុមហ៊ុនថាមពល Engie របស់បារាំង ចាប់ពីថ្ងៃព្រហស្បតិ៍ទី ១កញ្ញាទៅដែរ ដោយគ្មានពេលកំណត់ទេ និងដោយសំអាងថានិយាយមិនត្រូវគ្នាលើការអនុវត្តកិច្ចសន្យាទិញលក់ហ្កាស។ សម្រាប់រដ្ឋមន្ត្រីក្រសួងថាមពលបារាំង នេះគ្រាន់តែជាលេសរបស់រុស្ស៊ី ដែលយកហ្កាសមកធ្វើអាវុធ តែប៉ុណ្ណោះ។
ដំណឹងនេះបានជំរុញឱ្យទីផ្សារឧស្ម័នអឺរ៉ុបដែលតានតឹងស្រាប់ និងឡើងថ្លៃដល់ទៅ ៤០០%ក្នុងរយៈពេលតែមួយឆ្នាំ កាន់តែរងសម្ពាធខ្លាំងទៀត។ ប៉ុន្តែបារាំង បានធានាថាត្រៀមលក្ខណៈប្រឈមនឹងការកាត់ផ្តាច់ឧស្ម័នរបស់Gazpromរួចហើយ។ តាមការពិតទៅនោះ រុស្ស៊ីបានកាត់បន្ថយការផ្គត់ផ្គង់ហ្កាសមកឱ្យបារាំង គួរឱ្យកត់សម្គាល់តាំងពីផ្ទុះសង្គ្រាមនៅអ៊ុយក្រែនភ្លាមម្ល៉េះ។ នៅចុងខែកក្កដា ឧស្ម័នរុស្ស៊ី តំណាងឱ្យប្រមាណតែ៤%នៃសេតម្រូវការផ្គត់ផ្គង់រហ្កាសរបស់បារាំងទេ។ ម្យ៉ាងវិញទៀត បារាំងមានឧស្ម័ន ក្នុងឃ្លាំងបំរុងទុកចំនួន៩១,៤៧% ហើយនឹងអាចបំពេញបាននៅដំណាច់រដូវក្តៅ។ នេះបើតាមអ្នកនាំពាក្យរដ្ឋាភិបាល ដែលអំពាវនាវឱ្យបារាំងចេះសន្សំសំចៃថាមពល បើមិនចង់ខ្វះឧស្ម័នប្រើនៅរដូវរងារខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ