លោកម៉ាក្រុង លើកឡើងអំពី “អវសាននៃភាពសម្បូរហូរហៀរ” និងអំពាវនាវឲ្យមានការអត់ធ្មត់រិះថាំ
កាលពីថ្ងៃពុធ ទី២៤សីហា លោកអេម៉ានុយអែល ម៉ាក្រុង ប្រធានាធិបតីបារាំង បានដឹកនាំកិច្ចប្រជុំគណៈរដ្ឋមន្ត្រីជាលើកទី១ បន្ទាប់ពីបានវិលត្រលប់មកពីវិស្សមកាលរដូវក្តៅ។ នៅក្នុងសុន្ទរកថាបើកកិច្ចប្រជុំ លោកម៉ាក្រុង បានលើកឡើងជាពិសេស អំពីបញ្ហាប្រឈម ខ្វះខាតធនធាននៅគ្រប់វិស័យ ដែលបារាំងក៏ដូចជាពិភពលោកទាំងមូល នឹងពើបប្រទះ។ ជាដំណាក់កាលលំបាកថ្មី ដែលលោកម៉ាក្រុងហៅថា ជា “អវសាននៃភាពសម្បូរហូរហៀរ” ហើយដែលលោកមានបំណង អំពាវនាវឲ្យរដ្ឋាភិបាល ក៏ដូចជាប្រជាជនបារាំងទាំងអស់ ត្រូវតែមានការតស៊ូ អត់ធ្មត់ ត្បិតត្បៀរៀត និងរិះថាំសន្សំសំចៃ។
ចុះផ្សាយនៅថ្ងៃ៖ កែប្រែថ្ងៃទី៖
សម្រង់ប្រសាសន៍ របស់លោកប្រធានាធិបតីម៉ាក្រុង
"កាលៈទេសៈដែលយើងទាំងអស់គ្នា កំពុងរស់នៅ និងឆ្លងកាត់ពេលនេះ យើងអាចចាត់ទុកបានថា វាពោរពេញទៅដោយបញ្ហាវិបត្តិ បន្តបន្ទាប់គ្នា អស់ពីមួយចូលមួយ និងកាន់តែធ្ងន់ធ្ងរជាងមុនជាលំដាប់។ ហើយខ្ញុំជឿថា គ្មាននរណាម្នាក់ គិតថាខ្លួនបានកើតមកមួយជាតិនេះ ដើម្បីតែដោះស្រាយបញ្ហា ជានិច្ចនិរន្តគ្មានស្រាកស្រាន្តនោះឡើយ។
ក៏ប៉ុន្តែ សម្រាប់ខ្ញុំ ខ្ញុំយល់ថា យើងកំពុងតែឈានចូលទៅក្នុងកាលៈទេសៈថ្មីមួយ ដែលមានស្ថានភាពលំបាកបំផុត។ ដូចយើងបានដឹងហើយ ហើយក៏មិនមែនទើបតែប៉ុន្មានខែចុងក្រោយនេះទេ ដែលយើងជួបបញ្ហាលំបាក។ និយាយឲ្យងាយ យើងអាចសង្កេតឃើញថា វាជាដំណាក់កាល អវសាន្តនៃភាពសម្បូរហូរហៀរ។ ចប់ហើយ ពេលវេលាដែលសម្បូរសាច់ប្រាក់ ដកចាយដកចាយ ដោយមិនសូវខ្វល់ ហើយដែលយើងនឹងទទួលផលវិបាក នៅក្នុងគណនីហិរញ្ញវត្ថុសាធារណៈ។ ចប់ហើយភាពសម្បូរទំនិញបច្ចេកវិទ្យាទំនើប ដែលយើងធ្លាប់គិតថាសម្បូរពោរពាសមិនចេះខ្វះ តែផ្ទុយទៅវិញ យើងបានឃើញនឹងភ្នែកហើយ ចាប់ទាំងពីអំឡុងពេលវិបត្តិកូវីដ រហូតមកដល់ឥឡូវ ថាចំនួនទំនិញបច្ចេកវិទ្យាកាន់តែក្រខ្សត់ទៅ។ មានវត្ថុធាតុដើមច្រើនមុខ ដែលកាន់តែមានភាពកម្រខ្លាំងទៅៗ ខ្វះខាត មិនគ្រប់គ្រាន់ ជាក់ស្តែង រ៉ែកម្រ និងលោហៈធាតុជាដើម។ ហើយជាពិសេសនោះ គឺបញ្ហាខ្វះទឹកប្រើ។
បញ្ហាទឹក ដែលកាន់តែខ្សត់ទៅៗនេះ យើងចាំបាច់ត្រូវតែស្វែងរកដំណោះស្រាយ ឲ្យអស់ពីលទ្ធភាព។ យ៉ាងណាមិញ យើងបានចាប់ផ្តើមគិតគូរច្រើនខែមកហើយ ជាមួយនឹងប្រតិបត្តិការ Varenne de l’eau ដែលបានអនុញ្ញាតឲ្យយើង អាចគូសវាសផែនការមួយចំនួនធំ ដែលមានគ្រោងឆ្ឆឹងច្បាស់លាស់ ហើយយើងប្តេជ្ញាថា នឹងសម្រេចជោគជ័យឲ្យបាន។"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ