រុស្ស៊ីចោទថាអ៊ុយក្រែន គឺជាអ្នកនៅពីក្រោយ ឃាតកម្មសម្លាប់អ្នកស្រី ដារីយ៉ា ឌូហ្គីណា
អ្នកស្រីដារីយ៉ា ឌូហ្គីណា កូនស្រីរបស់លោក អាឡិចសង់ដ្រ៍ ឌូហ្គីន ដែលគេស្គាល់ថាគឺជាអ្នកស្និទ្ធ និងមានឥទ្ធិពល ទៅលើលោកពូទីននោះ បានស្លាប់ក្នុងហេតុការណ៍បំផ្ទុះរថយន្តដោយគ្រាប់បែក នៅក្បែរក្រុងមូស្គូ កាលពីថ្ងៃសៅរ៍ចុងសប្តាហ៍មុន។ កាលពីល្ងាចថ្ងៃចន្ទម្សិលមិញ សមត្ថកិច្ចសន្តិសុខរបស់រុស្ស៊ីបានសន្និដ្ឋាន និងចោទប្រកាន់ថា គឺអ៊ុយក្រែន ដែលជាអ្នកនៅពីក្រោយអំពើឃាតកម្មនេះ។
ចុះផ្សាយនៅថ្ងៃ៖
ស្តាប់ - ០២:១៧
ការិយាល័យសន្តិសុខរុស្ស៊ី FSB បានចេញលិខិតប្រកាសមួយ ដោយអះអាងថា ឃាតកម្មសម្លាប់លោកស្រី ដារីយ៉ា ឌូហ្គីណា គឺជាស្នាដៃរបស់ចារកិច្ចសម្ងាត់អ៊ុយក្រែន។ ប្រភពដដែលនេះ លើកឡើងថា រថយន្តរបស់លោកស្រី ដារីយ៉ា ឌូហ្គីណា ត្រូវបានស្ត្រីចារកិច្ចអ៊ុយក្រែនម្នាក់ ឈ្មោះថា Natalia Vovk បន្លំដាក់បង្កៃគ្រាប់បែក ក្នុងពេលដែលលោកស្រី ដារីយ៉ា ឌូហ្គីណា ធ្វើដំណើរទៅចូលរួមកម្មវិធីបុណ្យវប្បធម៌មួយ។
ការិយាល័យសន្តិសុខរុស្ស៊ី អះអាងទៀតថា ស្ត្រីចារកិច្ចអ៊ុយក្រែន កើតនៅឆ្នាំ១៩៧៩ បានបន្លំចូលមករុស្ស៊ី កាលពីខែកក្កដា ជាមួយកូនស្រីខ្លួនអាយុ១២ឆ្នាំ ហើយបានជួលផ្ទះនៅក្នុងអាគារតែមួយ ជាមួយនឹងលោកស្រីដារីយ៉ា ឌូហ្គីណា។ ក្រោយហេតុការណ៍បំផ្ទុះរថយន្តកាលពីយប់ថ្ងៃសៅរ៍ ទី២០សីហា ស្រ្តីចារកិច្ចអ៊ុយក្រែន បាននាំកូនរត់ចេញទៅប្រទេសអេស្តូនី។
សូមបញ្ជាក់ថា លោកស្រី ដារីយ៉ា ឌូហ្គីណា អាយុ២៩ឆ្នាំ គឺជាអ្នកកាសែត និងជានយោបាយវិទូរុស្ស៊ី ដែលមានទំនោរស្តាំនិយមជ្រុល ជាតិនិយមជ្រុល ហើយដែលតែងតែវិភាគរិះគន់បស្ចឹមលោក។ ស្ត្រីរូបនេះ ធ្លាប់ធ្វើការឲ្យទូរទស្សន៍ Tsargrad ដែលគេស្គាល់ថាជាបណ្តាញទូរទស្សន៍អភិរក្សនិយមជ្រុល ឃោសនាបម្រើរបបដឹកនាំរបស់លោកពូទីន។ ដារីយ៉ា ឌូហ្គីណា គឺជាកូនស្រីរបស់លោក អាឡិចសង់ដ្រ៍ ឌូហ្គីន ដែលយោងតាមអ្នកវិភាគខ្លះ អះអាងថា គឺជាអ្នកស្និទ្ធនិងមានឥទ្ធិពល ទៅលើរូបលោកពូទីនផ្ទាល់តែម្តង។ ហេតុការណ៍បំផ្ទុះរថយន្តកាលពីថ្ងៃសៅរ៍ ត្រូវបានគេជឿថា គឺជាឃាតកម្មសំដៅរូបលោក អាឡិចសង់ដ្រ៍ ឌូហ្គីន។
លោកពូទីន បានថ្លែងចាត់ទុក អំពើឃាតកម្មនេះ ថាជា "អំពើដ៏ថោកទាបបំផុត" និងបានលើកឡើងថា លោកស្រី ដារីយ៉ា ឌូហ្គីណា គឺជាអ្នកស្នេហាជាតិរុស្ស៊ីម្នាក់ ដែលមានភាពក្លាហាន និងស្មោះត្រង់ គួរយកគម្រូតាម។
យ៉ាងណាក៏ដោយ ភាគីរដ្ឋាភិបាលអ៊ុយក្រែន បានច្រានចោលការចោទប្រកាន់របស់រុស្ស៊ី ដោយបានអះអាងថាអ៊ុយក្រែន គ្មានអ្វីពាក់ព័ន្ធនឹងរឿងឃាតកម្មសម្លាប់នាង ដារីយ៉ា ឌូហ្គីណាទេ។ លោក Mikhaïlo Podoliak ទីប្រឹក្សាប្រធានាធិបតីអ៊ុយក្រែន បានលើកឡើងថា "អ៊ុយក្រែនមិនមែនជាប្រទេសប្រព្រឹត្តិអំពើឧក្រិដ្ឋឡើយ"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ