រុស្ស៊ីចោទអាមេរិកថាធ្វើឲ្យជម្លោះអ៊ុយក្រែនអូសបន្លាយយូរ
ថ្ងៃអង្គារ ប្រធានាធិបតីរុស្ស៊ី ពីទីក្រុងម៉ូស្កូ ចោទសហរដ្ឋអាមេរិកពេញទំហឹងតែម្តង ថាអាមេរិកព្យាយាមធ្វើឲ្យអស្ថិរភាពពិភពលោក តួយ៉ាងការញុះញង់ពីសំណាក់ប្រធានសភាអាមេរិក Nancy Pelosi នៅតៃវ៉ាន់ជាដើម។ នេះជាសេចក្តីថ្លែងរបស់ចៅហ្វាយវិមានក្រិមឡាំង ពូទីន ទៅកាន់បណ្តាលអ្នកកាសែត នៅក្នុងសន្នីសីទសារព័តមានស្តីពីសន្តិសុខ។
ចុះផ្សាយនៅថ្ងៃ៖
ស្តាប់ - ០២:០៣
ពីរដ្ឋធានីម៉ូស្កូ លោក វ្លាឌីមៀរ ពូទីន គូសបង្ហាញថា ស្ថានភាព នៅអ៊ុយក្រែន ស្តែងឲ្យឃើញថា អាមេរិកជាដើមចមនៃការពន្យារពេលអូសបន្លាយជម្លោះ ហើយសហរដ្ឋអាមេរិក ធ្វើសកម្មភាពអុជអាល បែបនេះដូចគ្នា នៅតំបន់ផ្សេងទៀត ដោយផ្លុំរងើកភ្លើងឲ្យឆេះ ឬបង្កលទ្ធភាពផ្ទុះជាជម្លោះ ដូចជានៅអាស៊ី នៅអាហ្វ្រិក និងនៅអាមេរិកឡាទីន។ លើសពីនេះ ប្រមុខរដ្ឋរុស្ស៊ី ពូទីន រិះគន់ថ្កោលទោសសហរដ្ឋអាមេរិក ចំពោះការមិនគោរពអធិបតេយ្យភាពនៃប្រទេសដទៃ និងកាតព្វកិច្ចអន្តរជាតិ។
ការចោទវាយប្រហារសម្តីនេះ គឺធ្វើឡើងបន្ទាប់ពីមូលដ្ឋានយោធារុស្ស៊ីមួយកន្លែងនៅដែនដីគ្រីមេត្រូវភ្លើងឆេះ។ រដ្ឋមន្ត្រីការពារជាតិរុស្ស៊ី បញ្ជាក់ថាមានផ្ទុះនិងឆេះមូលដ្ឋានយោធាមួយ នៅស្រុក Djankoï ពីថ្ងៃអង្គារ៍។ បើតាមអភិបាលដែនដីគ្រីមេ លោក Sergueï Aksionov អគ្គិភ័យនេះបណ្តាលឲ្យជនស៊ីវិលពីរនាក់រងរបួស និងតម្រូវឲ្យជម្លៀសប្រជាជនមួយភូមិចេញពីកន្លែងកើតហេតុ ហើយនិងបង្កការខូចខាតហេដ្ឋារចនាសម្ព័ន្ធ និងផ្ទះសម្បែងពលរដ្ឋត្រូវខូចខាតច្រើន។ កងទ័ពរុស្ស៊ីបញ្ជាក់ក្នុងសេចក្តីថ្លែងការណ៍មួយថា «អគ្គិភ័យនេះ ជាសកម្មភាពបំផ្លិចបំផ្លាញដោយចេតនា។»
កាលពីសប្តាហ៍មុន មានឆេះរំសេវនិងបង្កឲ្យផ្ទុះឆេះនៅកន្លែងស្តុក ក្នុងបរិវេណយោធាអាកាសមួយ ប៉ែកខាងលិចរបស់គ្រីមេ។ ការផ្ទុះឆេះនេះ ធ្វើឲ្យស្លាប់មនុស្សម្នាក់ ហើយរបួសជាច្រើននាក់។ អ្នកជំនាញការរុស្ស៊ីមើលរូបភាពតាមប្រព័ន្ធផ្កាយរណពឃើញថាប្រហែលជាអ៊ុយក្រែនវាយប្រហារ។
រីឯមជ្ឈមណ្ឌលនុយក្លេអ៊ែរ ហ្សាប៉ូរីចា (Zaporijjia) ជាកន្លែងបរមាណូធំជាងគេមួយនៅអឺរ៉ូប ហើយដែលត្រូវទ័ពរុស្ស៊ីត្រួតត្រានៅប៉ែកខាងត្បូងអ៊ុយក្រែន ក៏រងការគំរាមកំហែងពីការវាយប្រហាររបស់ភាគីទាំងពីរ និងបណ្តាលឲ្យមានការព្រួយបារម្ភពីគ្រោះថ្នាក់នុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ