អ៊ុយក្រែន ៖ តំបន់ធ្លាក់ក្នុងដៃយោធារុស្ស៊ីផ្តើមរៀបចំប្រជាមតិភ្ជាប់ខ្លួននឹងរុស្ស៊ី
Zaporijjia Kherson តំបន់ភាគខាងត្បូងប្រទេសអ៊ុយក្រែន បានធ្លាក់ក្នុងកណ្តាប់ដៃរបស់យោធារុស្ស៊ី អស់មួយភាគធំ។ ស្ថិតក្រោមការគ្រប់គ្រងរបស់យោធារុស្ស៊ី អាជ្ញាធរតំបន់ ហ្សាប៉ូរីចា ដែលតែងតាំងដោយមូស្គូ បានប្រកាសនៅថ្ងៃចន្ទទី ៨ សីហា ២០២២ បើកយុទ្ធនាការ ជាផ្លូវការ រៀបចំធ្វើប្រជាមតិ ស្តីពីការភ្ជាប់តំបន់នេះទៅនឹងប្រទេសរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
“ខ្ញុំបានចុះហត្ថលេខាលើបទបញ្ជា ដែលបើកផ្លូវឱ្យគណៈកម្មការបោះឆ្នោតចាប់ផ្តើមធ្វើការរៀបចំប្រជាមតិ ស្តីពីការភ្ជាប់តំបន់ហ្សាប៉ូរីចា ទៅនឹងប្រទេសរុស្ស៊ី”។ នេះជាសេចក្តីប្រកាសរបស់លោក អេវហ្គេនី បាលីតស្គី Evgueni Balitski ប្រធានរដ្ឋបាលស៊ីវិលនិងយោធាប្រចាំដែនដី តំបន់ភាគខាងត្បូងអ៊ុយក្រែន ដែលគ្រប់គ្រងដោយយោធារុស្ស៊ី។ សេចក្តីប្រកាសនេះធ្វើឡើង នាឱកាសបើកវេទិកានៃចលនារុស្ស៊ីនិយមថ្នាក់មូលដ្ឋាន នៅក្រុងMelitopol ដែលគេប្រសិទ្ធនាមថា “យើងរួមរស់ជាមួយនឹងរុស្ស៊ី” និងដែលមានអ្នកចូលរួមស្តាប់ចំនួនជាង៧០០នាក់។ នេះបើតាមរូបភាពវីដេអូ បង្ហោះផ្សាយតាមប្រព័ន្ធសង្គមTelegram ក្នុងគណនីរបស់លោកបាលីតស្គីផ្ទាល់។ កាលពីពាក់កណ្តាលខែកក្កដា២០២២ លោក បាលីតស្គី ធ្លាប់បានបង្ហើបចេតនាចង់រៀបចំ ប្រជាមតិនេះ នៅដើមរដូវស្លឹកឈើជ្រុះខាងមុខ។
ប្រសិនបើមានករណីរៀបចំធ្វើប្រជាមតិ នៅតាមតំបន់គ្រប់គ្រងដោយយោធារុស្ស៊ីមែន នោះការចរចាសន្តិភាពជាមួយរុស្ស៊ីពិតជាមិនអាចធ្វើទៅរួចទេ។ នេះជាពាក្យព្រមានរបស់លោកប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី។ ប៉ុន្តែអ្នកនាំពាក្យវិមានក្រេមឡាំងបានចំអកបកវិញថា "មិនមែនរុស្ស៊ីជាអ្នករៀបចំធ្វើប្រជាមតិទេ គឺជាគម្រោងរបស់ប្រជាពលរដ្ឋក្នុងតំបន់។ លោកហ្សេឡេនស្គីត្រូវសួរទៅពលរដ្ឋខ្លួនឯងថាហេតុអ្វីពួកគេមិនចង់រស់នៅក្នុងប្រទេស ?"
ជាផ្លូវការ មូស្គូ មិនបានបង្ហាញឆន្ទៈជាសាធារណៈ ផ្តួចផ្តើមឱ្យរៀបចំធ្វើប្រជាមតិភ្ជាប់តំបន់ដែលធ្លាក់ពីដៃអ៊ុយក្រែន មកជារុស្ស៊ីទេ ប៉ុន្តែតាំងពីបើកប្រតិបត្តិការយោធាឈ្លានពានអ៊ុយក្រែននៅថ្ងៃទី ២៤កុម្ភៈ២០២២មក យោធារុស្ស៊ី ដណ្តើមនិងគ្រប់គ្រងបានមួយភាគធំ តំបន់ភាគខាងត្បូងរបស់អ៊ុយក្រែនចំនួនពីរ គឺ Kherson និង Zaporijjia។ ហើយអាជ្ញាធរតំបន់ក្រោមកណ្តាប់ដៃរុស្ស៊ី តែងនិយាយថាចង់ភ្ជាប់ខ្លួនជាមួយរុស្ស៊ី និងបានដឹកនាំនយោបាយបញ្ចុះបញ្ចូលឱ្យរួមរស់ជាមួយរុស្ស៊ីយ៉ាងសកម្មបំផុត ដោយងាកចាយលុយរូប្ល៍ ក្រសោបគ្រប់គ្រងប្រព័ន្ធការពារសង្គម ក្រុមហ៊ុន សាលារៀន និងជំរុញលើកទឹកចិត្តឱ្យប្រជាពលរដ្ឋទទួលយកលិខិតឆ្លងដែនរុស្ស៊ីទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ