ប្រធានអង្គការ Amnestyប្រចាំអ៊ុយក្រែន សុំលាឈប់ពីតំណែង
នាយិកាអង្គការសិទ្ធិមនុស្ស Amnestyប្រចាំប្រទេសអ៊ុយក្រែន អ្នកស្រី Oksana Pokalchuk សុំលាឈប់ពីតំណែង ក្រោយចេញអង្គការនេះចេញរបាយការណ៍ដ៏ចម្រូងចម្រាស់មួយ រិះគន់យុទ្ធសាស្ត្រប្រយុទ្ធរបស់យោធាអ៊ុយក្រែន។ យុទ្ធសាស្ត្រប្រយុទ្ធរបស់យោធាអ៊ុយក្រែន គឺបានធ្វើឲ្យប្រជាពលរដ្ឋស៊ីវិលរងគ្រោះ។ រងគ្រោះ ក៏ព្រោះតែការដាក់ពង្រាយកងទ័ពនៅកន្លែងទីប្រជុំជន ហើយបើកកាយវាយប្រហារដេញទ័ពរុស្ស៊ី។ ម្យ៉ាងទៀត គឺតាមរយៈការបោះទីតាំងនៅតាមសាលារៀន និងក្នុងមន្ទីរពេទ្យ។ នេះបើតាម អង្គការសិទ្ធិមនុស្ស Amnesty International ដែលបានបញ្ជាក់នៅក្នុងរបាយការណ៍ស៊ើបអង្កេតមួយផ្សព្វផ្សាយជាសាធារណៈ នៅថ្ងៃព្រហស្បតិ៍។
ចុះផ្សាយនៅថ្ងៃ៖
ស្តាប់ - ០២:៥៩
ក្នុងសំណេរប្រកាសសុំលាឈប់ពីតំណែង អ្នកស្រី Oksana Pokalchuk នាយិកាអង្គការសិទ្ធិមនុស្ស Amnestyប្រចាំប្រទេសអ៊ុយក្រែន បានរៀបរាប់ថាពីការខ្វែងគំនិតជាមួយថ្នាក់ដឹកនាំអង្គការនៅក្រុងឡុងដែលចេញផ្សាយរបាយការណ៍ ដោយមិនពិគ្រោះនឹងមន្ត្រីអង្គការនៅមូលដ្ឋាន ហើយឲ្យអ្នកជំនាញបរទេសជាអ្នកធ្វើកិច្ចការនេះ។ ម្យ៉ាងទៀត បើតាមអ្នកស្រី Oksana Pokalchuk, របាយការណ៍នោះ មានចរិតឯកតោភាគី និងមិនពេញលេញ។ មិនពេញលេញគ្រប់ជ្រុងជ្រោយ ព្រោះគ្មានការបកស្រាយពីអាជ្ញាធរអ៊ុយក្រែន និងព្រោះតែអង្គការបានទុកពេលវេលាតិចពេក ឲ្យក្រសួងការពារជាតិអ៊ុយក្រែន សម្រាប់ការឆ្លើយតប។
អ្នកស្រី Oksana Pokalchuk យល់ឃើញទៀតថា របាយការណ៍នោះ មិនឆ្លុះបញ្ចាំងពីសច្ចភាពពិតរបស់យោធាអ៊ុយក្រែន និងស្ថានភាពមនុស្សធម៌នៅមូលដ្ឋានទេ។ បើតាមអ្នកស្រីដដែល ប្រសិនបើយើងមិនបានរស់នៅក្នុងប្រទេសដែលត្រូវគេឈ្លានពានទេ យើងមិនយល់ច្បាស់ទេ ថាអ្វីទៅជាការលំបាករបស់កងទ័ពអ្នកការពារទឹកដី។ នាយិកាអង្គការសិទ្ធិមនុស្ស Amnestyប្រចាំប្រទេសអ៊ុយក្រែន រូបនេះ យល់ឃើញដូចគ្នានឹងអាជ្ញាធរអ៊ុយក្រែនដែរថា របាយការណ៍ចេញផ្សាយពីក្រុងឡុង គឺបម្រើប្រយោជន៍ឲ្យការឃោសនារបស់កងទ័ពរុស្ស៊ី។ ជាការពិត ឯកអគ្គរដ្ឋទូតរុស្ស៊ីប្រចាំសហរដ្ឋអាមេរិក បានយករបាយការណ៍របស់អង្គការAmnesty ដើម្បីជាឈ្នាន់សម្រាប់រិះគន់យោធាអ៊ុយក្រែន ពិតមែន។
ចំណែកឯ អ្នកស្រី Agnès Callamard អគ្គលេខាធិការ អង្គការសិទ្ធិមនុស្ស Amnesty International បានទទួលកើតសរសើរចំពោះអ្នកស្រី Oksana Pokalchuk នាយិកាអង្គការសិទ្ធិមនុស្ស Amnestyប្រចាំប្រទេសអ៊ុយក្រែន ដែលប្រឹងធ្វើការ៧-៨ឆ្នាំមកនេះ។ ទោះបីជាយ៉ាងណាក៏ដោយចុះ អគ្គលេខាធិការរូបនេះ បានអះអាងការពាររបាយការណ៍ខ្លួន ដោយថ្លែងធានាពីអព្យាក្រិត និងភាពឯករាជ្យរបស់អង្គការ ក្នុងការសរសេររបាយការណ៍បង្ហាញការពិត។
សូមរំឮកថា អង្គការ Amnesty បានចុះស៊ើបអង្កេត និងសរសេររបាយការណ៍ ចំនួន៤ខែ ពីរបៀបបែបផែនធ្វើសង្គ្រាមរបស់កងទ័ពអ៊ុយក្រែន ដោយបញ្ជាក់ភស្តុតាងថា កងកម្លាំងអ៊ុយក្រែន បានបើកការវាយប្រយុទ្ធ ចេញពីតំបន់ដែលមានមនុស្សរស់នៅច្រើន ហើយនិងដាក់តាំងមូលដ្ឋានយោធានៅកន្លែងនៅរបស់ជនស៊ីវិល នៅក្នុងក្រុងនិងតាមភូមិ។ អគ្គលេខាធិការ អង្គការ Amnesty សង្កត់ធ្ងន់ថា តាក់តិចប្រយុទ្ធរបស់ទ័ពអ៊ុយក្រែននេះ គឺធ្វើឲ្យពលរដ្ឋស៊ីវិលរងគ្រោះ។ អង្គការដដែលនេះ អះអាងថា ទាហានអ៊ុយក្រែន ពុំបានជម្លៀសប្រជាជនសិនទេ មុននឹងបោះទីតាំងទ័ព។ មិនតែប៉ុណ្ណោះ ពួកគេបានរៀបចំជំរុំយោធានៅក្នុងបណ្តាសាលារៀននិងក្នុងមន្ទីរពេទ្យ ថែមទៀត។ ទង្វើនេះ ត្រូវអង្គការសិទ្ធិមនុស្ស Amnesty ចាត់ទុកថារំលោភនឹងច្បាប់អន្តរជាតិស្តីពីសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ