អង្គការសិទ្ធិមនុស្ស៖ យុទ្ធសាស្ត្រប្រយុទ្ធរបស់យោធាអ៊ុយក្រែន ធ្វើឲ្យពលរដ្ឋស៊ីវិលរងគ្រោះ
យុទ្ធសាស្ត្រប្រយុទ្ធរបស់យោធាអ៊ុយក្រែន បានធ្វើឲ្យប្រជាពលរដ្ឋស៊ីវិលរងគ្រោះ។ រងគ្រោះ ក៏ព្រោះតែការដាក់ពង្រាយកងទ័ពនៅកន្លែងទីប្រជុំជន ហើយបើកកាយវាយប្រហារដេញទ័ពរុស្ស៊ី។ ម្យ៉ាងទៀត គឺតាមរយៈការបោះទីតាំងនៅតាមសាលារៀន និងក្នុងមន្ទីរពេទ្យ។ នេះបើតាម អង្គការសិទ្ធិមនុស្ស Amnesty International ដែលបានបញ្ជាក់នៅក្នុងរបាយការណ៍ស៊ើបអង្កេតមួយផ្សព្វផ្សាយជាសាធារណៈ នៅថ្ងៃព្រហស្បតិ៍ ទី៤ សីហា។
ចុះផ្សាយនៅថ្ងៃ៖
ស្តាប់ - ០២:៥១
អង្គការសិទ្ធិមនុស្ស Amnesty International បានចុះស៊ើបអង្កេតពីរបៀបបែបផែនធ្វើសង្គ្រាមរបស់កងទ័ពអ៊ុយក្រែន។ នៅអំលុងចន្លោះខែមេសានិងកក្កដា អ្នកស្រាវជ្រាវខាងសិទ្ធិមនុស្ស Amnesty International បានធ្វើដំណើរទៅតំបន់ ការកៀវខាងកើត Kharkiv, តំបន់ដន់បាស់ Donbass និងប៉ែកនីរតី មីកូឡាអ៊ីវ Mykolaïv ដោយបានសាកសួរនាំអ្នករួចជីវិត សាក្សីក្នុងសង្គ្រាម និងសាច់ញាតិរបស់ជនរងគ្រោះ។ អ្នកស្រាវជ្រាវរបស់អង្គការដែលមានមូលដ្ឋាននៅក្រុងឡុងប្រទេសអង់គ្លេសមួយនេះ បានបញ្ជាក់ភស្តុតាងថា កងកម្លាំងទាហានអ៊ុយក្រែន បានបើកការវាយប្រយុទ្ធ ចេញពីតំបន់ដែលមានមនុស្សរស់នៅច្រើន ហើយនិងដាក់តាំងមូលដ្ឋានយោធានៅនឹងអគាររស់នៅរបស់ជនស៊ីវិល នៅក្នុងក្រុងនិងតាមភូមិនៅក្នុងតំបន់ទាំងបីនោះ។
អ្នកស្រី Agnès Callamard អគ្គលេខាធិការ អង្គការសិទ្ធិមនុស្ស Amnesty International សង្កត់ធ្ងន់ថា តាក់តិចប្រយុទ្ធរបស់ទ័ពអ៊ុយក្រែននេះ គឺធ្វើឲ្យពលរដ្ឋស៊ីវិលរងគ្រោះ។ អង្គការដដែលនេះ អះអាងថា ទាហានអ៊ុយក្រែន ពុំបានជម្លៀសប្រជាជនសិនទេ មុននឹងបោះទីតាំងទ័ព។ មិនតែប៉ុណ្ណោះ ពួកគេបានរៀបចំជំរុំយោធានៅក្នុងបណ្តាសាលារៀននិងក្នុងមន្ទីរពេទ្យ ថែមទៀត។ ទង្វើនេះ ត្រូវអង្គការសិទ្ធិមនុស្ស Amnesty International ចាត់ទុកថារំលោភនឹងច្បាប់អន្តរជាតិស្តីពីសិទ្ធិមនុស្ស។
ផ្ទុយទៅវិញ អាជ្ញាធរអ៊ុយក្រែន តាមរយៈទីប្រឹក្សាវិមានប្រធានាធិបតី លោក Mikhaïlo Podoliak បានបដិសេធច្រានចោលការលើកឡើងរបស់អង្គការសិទ្ធិមនុស្សនេះ ហើយព្រមទាំងចោទអង្គការ Amnesty International ទៅវិញ ថាកំពុងតែបំភ្លៃការពិត និងកំពុងឃោសនាបម្រើឲ្យរុស្ស៊ី។ អាជ្ញាធរអ៊ុយក្រែន បន្តទៀតថា ការគំរាមកំហែងដ៏ធំចម្បងចំពោះទាហានអ៊ុយក្រែន គឺកងទ័ពរុស្ស៊ីដែលមកឈ្លានពាននិងបង្កឧក្រិដ្ឋកម្មប្រល័យពូជសាសន៍លើទឹកដីអ៊ុយក្រែន។ លើសពីនេះ រុស្ស៊ី ក៏កំពុងតែព្យាយាមបង្ខូចកិត្តិយសទាហានអ៊ុយក្រែន ហើយក៏ជាការអាម៉ាស់ ដែលអង្គការសិទ្ធិមនុស្ស Amnesty International បានចូលដៃ និងចូលរួមយុទ្ធនាការផ្សព្វផ្សាយព័ត៌មានមិនពិត និងជាដំណឹងមានចរិតបែបឃោសនា បម្រើប្រយោជន៍ក្រុងម៉ូស្កូ។ នេះបើតាមទីប្រឹក្សាវិមានប្រធានាធិបតីអ៊ុយក្រែន ដដែល។
បើតាមទីភ្នាក់ងារព័ត៌មានបារាំង AFP, មុននឹងផ្សព្វផ្សាយរបាយការណ៍នេះ អង្គការសិទ្ធិមនុស្ស Amnesty International បានទាក់ទង់សាកសួរសុំការបំភ្លឺពីរដ្ឋមន្ត្រីក្រសួងការពារជាតិអ៊ុយក្រែន ដែរ កាលពីចុងខែកក្កដា តែគ្មានទទួលចម្លើយតប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ