សង្រ្គាមអ៊ុយក្រែនបានជំរុញឲ្យអឺរ៉ុបផ្តើមរកប្រភពឧស្ម័នផ្សេងដើម្បីងាកចេញពីការពឹងលើឧស្ម័នរស្ស៊ី
សង្រ្គាមរុស្ស៊ីឈ្លានពានអ៊ុយក្រែនបានឈានចូលដល់ ១០០ថ្ងៃគត់នាថ្ងៃសុក្រ ទី៣ មិថុនា។ ប្រធានាធិបតីអ៊ុយក្រែនលោកហ្សេឡេនស្គីបានបញ្ជាក់ថា អ៊ុយក្រែននឹងឈ្នះនៅក្នុងសង្រ្គាមមួយ។ ចំណែករុស្ស៊ីកំពុងបន្តបង្កើនការវាយប្រហារនៅតំបន់ប៉ែកខាងកើត ពិសេសលើតំបន់ដុនបាស់។ ទន្ទឹមគ្នានេះ បស្ចិមប្រទេសកំពុងបន្ថែមទណ្ឌកម្មលើរុស្ស៊ី។ ថ្មីៗចុងក្រោយ សហភាពអឺរ៉ុបបានដាក់ទណ្ឌកម្មលើប្រេងរុស្ស៊ី និងកំពុងពិចារណាលើរឿងឧស្ម័នមួយទៀត។ ដើម្បីងាកពីការពឹងលើឧស្ម័នរុស្ស៊ី មានប្រទេសអឺរ៉ុបជាច្រើនកំពុងស្វែងរកប្រភពផ្សេង។ ជាក់ស្តែង ហូឡង់ និងអាល្លឺម៉ង់នឹងផ្តើមឡើងវិញនូវគម្រោងជីកយកឧស្ម័ននៅសមុទ្រខាងជើង ក្រោយពីរុស្ស៊ីបានព្យួរការបញ្ជូនឧស្ម័នទៅឲ្យហូឡង់។ ចំណែកអង់គ្លេសបានអនុញ្ញាតឲ្យក្រុមហ៊ុន Shell ធ្វើអាជីវកម្មលើអណ្តូងឧស្ម័ននៅក្នុងសមុទ្រក្បែរស្កុតឡែន។ ទាំងនេះជាគម្រោងដ៏ចម្រូងចម្រាស និងធ្លាប់ទទួលការរិះគន់ពីក្រុមអង្គការបរិស្ថាន។ តែលោកហ្វីលីប ស្ហាឡេ អ្នកជំនាញថាមពលបានយល់ឃើញថា អ្វីៗត្រូវបានផ្លាស់ប្តូរ ក្រឡាប់ចាក់ដោយសង្រ្គាមអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:២៤
« តំបន់នៅប៉ែកខាងជើងក្រឺណាដមួយនេះជាតំបន់ឧស្ម័នមួយជាប្រវត្តិសាស្រ្តដែលការធ្វើអាជីវកម្មឧស្ម័នត្រូវបានចាប់ផ្តើមនៅក្នុងទសវត្សរ៍ ៦០។ ផលិតកម្មឧស្ម័ននៅក្រឺណាដនេះបានថយចុះយ៉ាងច្រើននារយៈពេលប៉ុន្មានឆ្នាំចុងក្រោយនេះក្រោមហេតុផលបរិស្ថាន ពិសេសបញ្ហាកើតចេញពីការរញ្ជួយដី។ តែឥឡូវនេះ សង្រ្គាមរុស្ស៊ីឈ្លានពានអ៊ុយក្រែនបានធ្វើឲ្យមានការផ្លាស់ប្តូរ ក្រឡាប់ចាក់ទាំងអស់។
ដូច្នេះគេត្រូវរង់ចាំពីការចាប់ផ្តើមឡើងវិញនូវគម្រោងអាជីកម្មអណ្តូងឧស្ម័នមួយចំនួននៅក្នុងសមុទ្រខាងជើងដែលត្រូវបានគេទុកចោល ឬបំភ្លេចចោលនារយៈពេលប៉ុន្មានឆ្នាំចុងក្រោយនេះ។ ពិតណាស់ គម្រោងអាជីកម្មអណ្តូងឧស្ម័នទាំងនេះនឹងមិនអាចចូលទៅជំនួសឧស្ម័នដែលនំាចូលពីរុស្ស៊ីទាំងស្រុងទេ។
តែយ៉ាងហោចណាស់ក៏វាអាចចូលរួមចំណែកជួយសម្រាលសម្រាប់រយៈពេលមធ្យមដែរ ព្រោះគេប្រហែលត្រូវការពេលវេលា ៣ឆ្នាំ ៤ឆ្នាំដើម្បីអាចទទួលបានឧស្ម័ន និងកាត់បន្ថយពីការពឹងលើឧស្ម័នរុស្ស៊ី។ នេះមានន័យថា សក្តានុពលឧស្ម័ននៅសមុទ្រខាងជើងនៅមានសារៈសំខាន់។ តែគេគួរវិនិយោគឡើងវិញលើអ្វីដែលគេបានខកខានមិនបានធ្វើតាំងពីប៉ុន្មានឆ្នាំកន្លងទៅ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ