អ្នកកាសែតបារាំងម្នាក់ស្លាប់ក្នុងពេលកំពុងយកការណ៍នៅអ៊ុយក្រែន
អ្នកកាសែតបារាំងម្នាក់ត្រូវស្លាប់ នៅក្នុងពេលកំពុងយកការណ៍ អំពីប្រតិបត្តិការមនុស្សធម៌ជម្លៀសជនស៊ីវិល នៅក្នុងសង្រ្គាមអ៊ុយក្រែន។ នេះបើយោងតាមលោកប្រធានាធិបតីបារាំង អេម៉ានុយអែល ម៉ាក្រុង។ ចំណែករដ្ឋមន្រ្តីក្រសួងការបរទេសបារាំងវិញ ដែលកំពុងបំពេញទស្សនកិច្ច នៅទីក្រុងកៀវ បានទាមទារឲ្យមានការស៊ើបអង្កេតប្រកបដោយតម្លាភាព ទៅលើករណីស្លាប់អ្នកកាសែតរូបនេះ។
ចុះផ្សាយនៅថ្ងៃ៖
ស្តាប់ - ០១:៥២
អ្នកកាសែតបារាំងដែលបាត់បង់ជីវិតនៅអ៊ុយក្រែននេះ មានឈ្មោះថា (ហ្វ្រេដេរិក ឡឺគ្លែរអ៊ីម៉ូហ្វ) Frédéric Leclerc-Imhoff ធ្វើការឲ្យទូរទស្សន៍បារាំង BFMTV ហើយយោងតាមលោកអេម៉ានុយអែល ម៉ាក្រុង អ្នកកាសែតរូបនេះ ត្រូវបាត់បង់ជីវិត នៅពេលកំពុងយកការណ៍ ដោយជិះលើរថយន្តជាមួយនឹងជនស៊ីវិល នៅក្នុងប្រតិបត្តិការមនុស្សធម៌ ជម្លៀសជនស៊ីវិលគេចចេញពីគ្រាប់ផ្លោងរបស់រុស្ស៊ី។
ទូរទស្សន៍ BFMTV វិញ បានឲ្យដឹងថា ហ្វ្រេដេរិក ឡឺគ្លែរអ៊ីម៉ូហ្វ ដែលមានវ័យ ៣២ឆ្នាំ បានបាត់បង់ជីវិត ដោយត្រូវគ្រាប់ផ្លោង ចំណែកអ្នកកាសែតមួយរូបទៀត ដែលធ្វើការជាមួយគ្នានោះ ត្រូវរងរបួសស្រាល។
ក្រសួងការបរទេសបារាំង និងក្រសួងការបរទេសអ៊ុយក្រែន នៅក្នុងសេចក្តីថ្លែងការណ៍ពីរដាច់ពីគ្នា បានបញ្ជាក់បន្ថែមថា ប្រតិបត្តិការជម្លៀសជនស៊ីវិល ដែលរងការវាយប្រហារ បណ្តាលឲ្យស្លាប់អ្នកកាសែតបារាំងនេះ គឺធ្វើឡើង នៅក្បែរទីក្រុងសេវេរ៉ូដូណេតស្ក៍ (Severodonets) ដែលបច្ចុប្បន្ន កំពុងជាសមរភូមិដ៏ក្តៅគគុកមួយ នៅខាងកើតអ៊ុយក្រែន។
លោកស្រី កាទ្រីន កូឡូណា (Catherine Colonna) រដ្ឋមន្រ្តីការបរទេសបារាំង ដែលកំពុងបំពេញទស្សនកិច្ចនៅក្នុងទីក្រុងកៀវ នៅថ្ងៃចន្ទ បានទម្លាក់ការទទួលខុសត្រូវដោយចំៗទៅលើរុស្ស៊ី ដោយលោកស្រីបានសរសេរនៅលើធ្វីតធ័រថា អ្នកកាសែតបារាំងត្រូវស្លាប់ គឺដោយត្រូវគ្រាប់ផ្លោងរបស់រុស្ស៊ី នៅក្នុងពេលកំពុងបំពេញករណីយកិច្ចជាអ្នកយកព័ត៌មាន។
លោកស្រីប្រមុខការទូតបារាំងក៏បានទាមទារផងដែរឲ្យបើកការស៊ើបអង្កេតប្រកបដោយតម្លាភាព ដើម្បីលាតត្រដាងការពិតគ្រប់ជ្រុងជ្រោយ ជុំវិញករណីស្លាប់អ្នកកាសែតបារាំងនេះ ដោយលោកស្រីបានហៅការបាញ់ផ្លោងបណ្តាលឲ្យស្លាប់អ្នកកាសែតបារាំងនេះថា ជាឧក្រិដ្ឋកម្មទ្វេ ពោលគឺ ជាឧក្រិដ្ឋកម្មលើអ្នកកាសែតផង ហើយក្នុងពេលជាមួយគ្នាក៏ជាឧក្រិដ្ឋកម្មលើប្រតិបត្តិការមនុស្សធម៌ផងដែរ។
គួរបញ្ជាក់ថា បើយោងតាមអង្គការអ្នកសារព័ត៌មានគ្មានព្រំដែន ចាប់តាំងពីផ្ទុះសង្រ្គាមអ៊ុយក្រែន កាលពីថ្ងៃទី២៤កុម្ភៈមក មានអ្នកកាសែតយ៉ាងតិច ៨នាក់ហើយ ដែលត្រូវបាត់បង់ជីវិត នៅក្នុងអំឡុងពេលកំពុងយកព័ត៌មាននៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ