អ៊ុយក្រែនសន្យាធ្វើអ្វីគ្រប់យ៉ាងដើម្បីការពារតំបន់ដុនបាស់ ខណៈដែលរុស្ស៊ីវាយប្រហារកាន់តែខ្លាំង
សង្រ្គាមរុស្ស៊ីឈ្លានពានអ៊ុយក្រែនបានឈានដល់ ៩៤ថ្ងៃនៅថ្ងៃសៅរ៍ ទី២៨ ឧសភានេះ។ តំបន់ដុនបាស់ស្ថិតប៉ែកខាងកើតជាតំបន់ដែលទ័ពរុស្ស៊ីកំពុងបង្កើនការវាយប្រហារយ៉ាងខ្លាំង។ នៅក្នុងសារវីដែអូមួយផុសក្នុងថ្ងៃសុក្រ ទី២៧ ឧសភា ប្រធានាធិបតីអ៊ុយក្រែនលោកវ៉ូឡូឌីមៀរ ហ្សេឡេនស្គីបានទទួលស្គាល់ពីស្ថានការណ៍លំបាកខ្លាំងសម្រាប់ទ័ពអ៊ុយក្រែននៅក្នុងតំបន់ដុនបាស់។ តែលោកបានសន្យាថា អ៊ុយក្រែននឹងប្រឹងប្រែងគ្រប់យ៉ាងដើម្បីការពារតំបន់ដុនបាស់។ យ៉ាងណាក៏ដោយ ក្រសួងការពារជាតិរុស្ស៊ីបានបញ្ជាក់ក្នុងថ្ងៃសៅរ៍ ទី២៨ ឧសភានេះពីការវាយយកបានស្រុកលីម៉ាន់ និងថា ស្រុកសេវេរ៉ូដូនែតកំពុងស្ថិតក្រោមការឡោមព័ទ្ធរបស់ទ័ពរុស្ស៊ី រួមទាំងកម្លាំងអ្នកទាមទារផ្តាច់ទឹកដីគាំទ្ររុសុស៊ី។ ចំណែកអភិបាលតំបន់លូហ្កាន់ខាងប៉ែកអ៊ុយក្រែនលោកស៊ែរហ្កី ហ្កាយដាយបានទទួលស្គាល់ពីស្ថានភាពលំបាករបស់ទ័ពអ៊ុយក្រែន រួមទាំងប្រជាជននៅទីនោះ។
ចុះផ្សាយនៅថ្ងៃ៖
« ស្រុកទាំងមូលបានស្ថិតក្រោមការស្រោចគ្រាប់បែកពីទ័ពរុស្ស៊ី។ ពួកគេបានទម្លាក់គ្រាប់បែកតាមយន្តហោះ និងបាញ់ផ្លោងចេញពីរថក្រោះ។ គឺជាវិធីសាស្រ្តមួយដែលទ័ពរុស្ស៊ីបានធ្វើទៅលើទីក្រុងម៉ារីយូប៉ូល មានន័យថា ពួកគេកម្ទេច និងបំផ្លាញទីក្រុងទាំងមូលតែម្តង។ នៅចំពោះមុខនេះ យើងពង្រឹងទីតាំងរបស់យើងនៅប៉ែកខាងក្រៅស្ថិតក្បែរសណ្ធាគារមួយ។ រុស្ស៊ីមានកម្លាំងទ័ពនៅនឹងកន្លែងប្រមាណពី ៣០០ ទៅ ៤០០នាក់។ យើងព្យាយាមទប់ការរុលរបស់ពួកគេ តែយើងទប់មិនបានទេ។
យើងអាចទប់ពួកគេបាន តែយើងត្រូវការកាំភ្លើងត្បាល់បាញ់ចម្ងាយឆ្ងាយ រួមទាំងគ្រាប់រ៉ូកែតដែលមានបំពាក់ដោយប្រព័ន្ធចង្អុលនាំផ្លូវ។ សម្រាប់ប្រជាជនវិញ គឺមានការលំបាកកាន់តែខ្លាំងឡើងៗពីមួយថ្ងៃទៅមួយថ្ងៃ។ តែនៅពេលនេះ យើងអាចនាំជំនួយទៅជួយពួកគេបានដោយដឹកតាមរថយន្តតូច ពោលមិនអាចដឹកតាមឡានកាំមីញ៉ុងបានទេ។ ចំណែកការជម្លៀសពួកគេមានការលំបាកខ្លាំងណាស់ ព្រោះត្រូវធ្វើឡើងនៅក្រោមការស្រោចគ្រាប់របស់ទ័ពរុស្ស៊ី។ យើងអាចបាត់បង់ទាហានយើងទាំងអស់ បើហ៊ានព្យាយាមចូលទៅជម្លៀសពួកគេ។
យើងមិនធ្វើទេ។ យើងគិតថា មានអ្នកស្រុកប្រមាណជា ១៥ ០០០នាក់កំពុងរស់នៅទីនោះ។ តែយើងមិនដឹងថាតើមានប៉ុន្មាននាក់ដែលចង់ចាកចេញទេ។ បណ្តាញគមនាគមន៍ត្រូវបានកាត់ផ្តាច់។ ប្រជាជនភាគច្រើនមិនចង់ចាកចេញទេ។ មនុស្សចាស់មិនចង់ចាកចេញ ព្រោះមិនដឹងទៅណា និងមកពីពួកគេបានរស់នៅនៅទីនោះតាំងពីដំបូង។ ពួកគេបាននិយាយថា កើតនៅទីនោះ ស្លាប់ក៏នៅទីនោះ។ ទន្ទឹមគ្នានេះ យើងក៏ឃើញមានប្រជាជនមួយក្រុមតូចកំពុងរង់ចាំការធ្លាក់ស្រុកទៅក្នុងដៃរុស្ស៊ី »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ