ក្រុមប្រទេស G7 សន្យាបញ្ឈប់ការផលិតអគ្គិសនីពីថាមពលផូស៊ីលត្រឹមឆ្នាំ២០៣៥
ក្រុមប្រទេស G7 បានសន្យា នៅថ្ងៃសុក្រនេះថា នឹងបញ្ឈប់ការផលិតអគ្គិសនី ដោយប្រើថាមពលផូស៊ីល នៅត្រឹមឆ្នាំ២០៣៥ខាងមុខ ហើយក្នុងពេលជាមួយគ្នា ការផ្តល់ហិរញ្ញប្បទានសាធារណៈ ចំពោះគម្រោងអភិវឌ្ឍថាមពលផូស៊ីលនៅបរទេស ក៏នឹងត្រូវបញ្ឈប់លែងឲ្យមានផងដែរ នៅត្រឹមដំណាច់ឆ្នាំ២០២២នេះ។ ការសន្យាទាំងនេះត្រូវបានធ្វើឡើង នៅក្នុងក្របខណ្ឌនៃកិច្ចប្រឹងប្រែងជាលក្ខណៈអន្តរជាតិ ដើម្បីទប់ស្កាត់ការឡើងកម្តៅផែនដី។
ចុះផ្សាយនៅថ្ងៃ៖
ស្តាប់ - ០២:១៥
ការសន្យាត្រូវបានធ្វើឡើង ក្រោយពីមានកិច្ចប្រជុំថ្នាក់រដ្ឋមន្រ្តីរបស់ក្រុមប្រទេស G7 នៅក្នុងទីក្រុងប៊ែរឡាំង ដោយនៅក្នុងសេចក្តីថ្លែងការណ៍ចុងក្រោយ ដែលមានកម្រាស់រហូតដល់ទៅ ៤០ទំព័រ ប្រទេសមហាអំណាចឧស្សាហកម្មទាំង ៧ ដែលរួមមាន សហរដ្ឋអាមេរិក ជប៉ុន អាល្លឺម៉ង់ បារាំង អង់គ្លេស អ៊ីតាលី និងកាណាដា បូករួមជាមួយនឹងសហភាពអឺរ៉ុប បានសន្យាថា នឹងបញ្ឈប់ការបញ្ចេញឧស្ម័នកាបូនិកពីវិស័យអគ្គិសនី នៅត្រឹមឆ្នាំ២០៣៥ ដោយរាល់ការផលិតអគ្គិសនីចេញពីថាមពលធ្យូងថ្មនឹងត្រូវបញ្ឈប់ទាំងស្រុង លើកលែងតែការផលិត ដែលបំពាក់ទៅដោយយន្តការស្ទាក់ចាប់ឧស្ម័នកាបូនិកមិនឲ្យបំភាយចេញទៅក្នុងបរិយាកាស។
ប្រទេសមហាអំណាចឧស្សាហកម្មទាំង ៧នេះ ក៏បានសន្យាផងដែរថា នឹងបញ្ឈប់ការផ្តល់ហិរញ្ញប្បទានសាធារណៈ ទៅដល់គម្រោងវិនិយោគលើវិស័យថាមពលផូស៊ីល នៅបរទេស នៅត្រឹមបំណាច់ឆ្នាំ២០២២នេះ ហើយដូចគ្នាដែរ ករណីលើកលែងនឹងត្រូវធ្វើចំពោះគម្រោងវិនិយោគថាមពលផូស៊ីលទាំងឡាយណា ដែលមានភ្ជាប់ជាមួយនូវយន្តការកាត់បន្ថយការបញ្ចេញឧស្ម័នកាបូនិក។
គួរបញ្ជាក់ថា ការសន្យាបញ្ឈប់ការផ្តល់ហិរញ្ញប្បទានសាធារណៈដល់គម្រោងវិនិយោគលើវិស័យថាមពលផូស៊ីលនៅបរទេសនេះ ធ្លាប់ត្រូវបានធ្វើរួចមកហើយ នៅក្នុងអំឡុងសន្និសីទអាកាសធាតុនៅក្លាសហ្គោ កាលពីចុងឆ្នាំទៅមិញ។ ក៏ប៉ុន្តែ កាលណោះ ក្នុងចំណោមប្រទេស G7 មានតែប្រទេស ៦ប៉ុណ្ណោះ ដែលបានចុះហត្ថលេខាលើការសន្យានេះ ដោយជប៉ុនបានបដិសេធមិនចុះហត្ថលេខា។
ការណ៍ដែលជប៉ុនសុខចិត្តចូលរួមក្នុងកិច្ចសន្យា នៅពេលនេះ គឺជាជំហានដ៏សំខាន់មួយ ពីព្រោះថា ជប៉ុនគឺជាប្រទេសជាប់ចំណាត់ថ្នាក់លេខមួយនៅលើពិភពលោក នៅក្នុងការផ្តល់ហិរញ្ញប្បទានលើគម្រោងវិនិយោគថាមពលផូស៊ីល។
ការសន្យាបញ្ឈប់ហិរញ្ញប្បទានលើនិយោគវិស័យថាមពលផូស៊ីល ក៏ដូចជាការបញ្ឈប់ការផលិតអគ្គិសនីពីថាមពលផូស៊ីលនៅពេលនេះ ត្រូវបានស្វាគមន៍ជាទូទៅ ដោយសកម្មជនការពារបរិស្ថាន ហើយវាត្រូវបានធ្វើឡើង នៅក្នុងពេលដែលសង្រ្គាមនៅអ៊ុយក្រែន កំពុងតែធ្វើឲ្យពិភពលោកទាំងមូលត្រូវប្រឈមនឹងបញ្ហាថាមពលឡើងថ្លៃ ចំណែកបណ្តាប្រទេសលោកខាងលិចក៏កំពុងតែស្វះស្វែងរកច្រកចេញពីការពឹងផ្អែកលើថាមពលដែលនាំចូលមកពីរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ