អឺរ៉ុប និងអាមេរិកខាងជើងកំពុងស្គាល់សន្ទុះករណីឆ្លងដោយមេរោគអុតស្វា
ខណៈដែលមេរោគកូវីដ១៩ កំពុងបន្តមានវត្តមាន ករណីឆ្លងដោយមេរោគអុតស្វាហាក់កំពុងកើតមាននៅក្នុងប្រទេសអឺរ៉ុបជាច្រើន។ ករណីឆ្លងនៅអឺរ៉ុបដោយមេរោគអុតស្វាកំពុងបង្កឲ្យមានការភ្ញាក់ផ្អើល និងការឆ្ងល់របស់ក្រុមអ្នកវិទ្យាសាស្រ្ត ព្រោះតាមធម្មតា មេរោគអុតស្វានេះច្រើនកើតមាននៅទ្វីបអាហ្រ្វិក ពិសេសនៅប៉ែកកណ្តាល និងប៉ែកខាងលិចដែលមេរោគនេះបានឆ្លងចេញពីសត្វ។ បារាំងបានប្រកាសពីការរកឃើញមេរោគអុតស្វាមួយករណីនាថ្ងៃព្រហស្បតិ៍ ទី១៩ ឧសភា។
ចុះផ្សាយនៅថ្ងៃ៖
ស្តាប់ - ០២:៣៣
បន្ទាប់ពីប្រទេសព័រទុយហ្កាល់ អេស្បាញ កាណាដា ឬអ៊ីតាលី មេរោគអុតស្វាបានមកដល់ប្រទេសបារាំងហើយ។ នៅក្នុងសេចក្តីប្រកាសព័ត៌មានក្នុងយប់ថ្ងៃព្រហស្បតិ៍ ទី១៩ ឧសភា អគ្គនាយកដ្ឋានសុខភាពបារាំងបានប្រកាសពីការរកឃើញមេរោគអុតស្វាមួយករណីនៅក្នុងតំបន់ប៉ារីស។ ជាសរុបគិតតាំងពីដើមខែឧសភានេះមក ចំនួនករណីសង្ស័យ និងចំនួនករណីឆ្លងដោយមេរោគអុតស្វាមានច្រើននៅអឺរ៉ុប និងនៅអាមេរិកខាងជើង។ ព្រឹត្តិការណ៍នេះកំពុងបង្កឲ្យមានក្តីបារម្ភពីការឆ្លងរាលដាលដោយមេរោគអុតស្វា។ អង់គ្លេសជាប្រទេសទី១ ដែលបានរកឃើញករណីមេរោគអុតស្វាតាំងពីថ្ងៃទី៦ ឧសភា និងបើគិតត្រឹមយប់ថ្ងៃពុធ ទី ១៨ ឧសភា មានអ្នកឆ្លងចំនួន ៩នាក់។
បន្ទាប់មកក្នុងថ្ងៃពុធ ទី១៨ ឧសភាដដែល ប្រទេសព័រទុយហ្កាល់ កាណាដា និងអាមេរិកក៏បានប្រកាសពីការរកឃើញវត្តមានករណីមេរោគអុតស្វានៅលើទឹកដីរបស់ខ្លួន។ តាមវិទ្យុសាធារណៈកាណាដា មានករណីសង្ស័យប្រមាណជា ១០ករណីកំពុងត្រូវបានរដ្ឋអំណាចក្រុងម៉ុងរ៉េអាល់ពិនិត្យ សិក្សាក្នុងថ្ងៃពុធ ទី១៨ ឧសភា។ នៅអាមេរិក មេរោគអុតស្វាត្រូវបានរកឃើញលើបុរសម្នាក់ក្នុងរដ្ឋ Massachusetts ដែលបានទៅកាណាដាកាលពីពេលថ្មីៗនេះ។ គួរបញ្ជាក់ថា ការដែលគេហៅមេរោគអុតស្វាព្រោះមេរោគនេះត្រូវបានរកឃើញដំបូងនៅលើសត្វស្វាក្នុងឆ្នាំ ១៩៥៨។ បន្ទាប់មក មេរោគអុតស្វានេះត្រូវបានរកឃើញលើកទី១ លើមនុស្សក្នុងឆ្នាំ ១៩៧០ ដែលជាក្មេងប្រុសអាយុ ៩ឆ្នាំនៅសាធារណរដ្ឋប្រជាធិបតេយ្យកុងហ្គោ។
ចាប់តាំងពីឆ្នាំ ១៩៧០ មេរោគដដែលមួយនេះបានឆ្លងរាលដាលចូលក្នុង ១០ប្រទេសអាហ្រ្វិក។ នៅរដូវស្លឹកឈើជ្រុះឆ្នាំ ២០០៣ មេរោគអុតស្វាបានឆ្លងចូលទឹកដីអាមេរិកដែលជាការឆ្លងចេញលើកទី១ នៅក្រៅទឹកដីអាហ្រ្វិក។ រោគសញ្ញានៃករណីឆ្លងមេរោគអុតស្វាយ គឺក្តៅខ្លួន ឈឺក្បាល និងចេញកន្ទួលលើស្បែក។ គ្មានថ្នាំពិសេសដើម្បីព្យាបាលទេ ហើយអ្នកជំងឺត្រូវបានគេឃុំដាច់ដោយឡែក និងភាគច្រើនបានជាសះស្បើយនៅ ២ ឬ ៣សប្តាហ៍ក្រោយមក។ តាមក្រុមគ្រូពេទ្យជំងឺឆ្លង អត្រាមរណៈដោយមេរោគអុតស្វាមានការប្រែប្រួលខ្លាំង តែនៅតែមានអត្រាតិចជាង ១០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ