ប្រមុខរដ្ឋបារាំងលោកម៉ាក្រុងស្នើឲ្យសមភាគីចិនលោកស៊ីគិតគូរពីក្តីបាបារម្ភរបស់ពលរដ្ឋបារាំងនៅចិន
នៅថ្ងៃអង្គារ ទី១០ ឧសភា ប្រធានាធិបតីបារាំងលោកអេម៉ានុយអែល ម៉ាក្រុងបានជួបសន្ទនាតាមទូរស័ព្ទជាមួយសមភាគីចិនលោកស៊ី ជីនពីង។ តាមសេចក្តីប្រកាសព័ត៌មានរបស់វិមានប្រធានាធិបតីបារាំងអេលីហ្សេ លោកម៉ាក្រុងបាននិយាយប្រាប់លោកស៊ីពីការចូលរួមសាមគ្គីភាពរបស់បារាំងជាមួយចិន និងបានស្នើឲ្យលោកស៊ីគិតគូរពីក្តីបារម្ភរបស់ពលរដ្ឋបារាំងដែលកំពុងរស់នៅក្នុងប្រទេសចិន។ ការលើកឡើងរបស់លោកម៉ាក្រុងបានធ្វើឡើង ខណៈដែលរដ្ឋអំណាចចិនកំពុងបន្តចាត់វិធានការបិទខ្ទប់នៅក្នុងក្រុងមួយចំនួនដើម្បីទប់ស្កាត់នឹងការឆ្លងរាលដាលជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:១៩
នៅក្នុងកិច្ចសន្ទនាតាមទូរស័ព្ទរយៈពេល ១ម៉ោងកន្លះ ប្រធានាធិបតីបារាំងលោកអេម៉ានុយអែល ម៉ាក្រុង និងសមភាគីចិនលោកស៊ី ជីនពីងបានជជែកគ្នាលើប្រធានបទជាច្រើន។ តាមវិមានប្រធានាធិបតីបារាំងអេលីហ្សេ និងទូរទស្សន៍រដ្ឋចិន CCTV លោកស៊ីបានសាទរពីការជាប់ឆ្នោតអាណត្តិថ្មីរបស់លោកម៉ាក្រុង និងបានសម្តែងពីបំណងប្រាថ្នាចង់បន្តឱ្យកាន់តែស៊ីជម្រៅថែមទៀតនូវភាពជាដៃគូយុទ្ធសាស្ត្របារាំង ចិន ពិសេសក្នុងវិស័យនុយក្លេអ៊ែរស៊ីវិល និងអាកាសចរណ៍។ បន្ទាប់មក និងបើតាមវិមានអេលីហ្សេ លោកម៉ាក្រុង និងលោកស៊ីបានទទូចជាថ្មីពីភាពបន្ទាន់ក្នុងការឈានទៅសម្រេចឲ្យបាននូវបទឈប់បាញ់មួយនៅក្នុងប្រទេសអ៊ុយក្រែន និងការគោរពបូរណភាពទឹកដីអ៊ុយក្រែន។
ក្រៅពីនោះ និងបើតាមវិមានអេលីហ្សេដដែល លោកម៉ាក្រុងបានឆ្លៀតសាទរចិនដែលបានឲ្យសច្ចាប័នលើសន្ធិសញ្ញាសំខាន់ចំនួនពីររបស់អង្គការពលកម្មអន្តរជាតិកាលពីថ្ងៃទី២០ មេសា ពិសេសសន្ធិសញ្ញាស្តីពីការប្រយុទ្ធប្រឆាំងនឹងការងារដោយបង្ខំ។ លោកម៉ាក្រុងចង់ឃើញចិនអនុវត្តឲ្យបានពេញលេញនូវសន្ធិសញ្ញាមួយនេះនៅទូទាំងប្រទេសចិន ពិសេសនៅក្នុងទីក្រុងស៊ីនជាំងដែលរស់នៅច្រើនដោយជនជាតិភាគតិចអ៊ុយហ្គួរអ្នកកាន់សាសនាអ៊ីស្លាម។ ប្រធានបទបន្ទាប់ដែលលោកម៉ាក្រុងបាននិយាយជាមួយលោកស៊ី គឺស្ថានភាពរបស់ពលរដ្ឋបារាំងរស់នៅក្នុងប្រទេសចិន ពិសេសអ្នករស់នៅក្នុងទីក្រុងសៀងហៃ និងប៉េកាំង។
តាំងពីដើមខែមេសា រដ្ឋអំណាចក្រុងសៀងហៃបានប្រើវិធានការបិទខ្ទប់សឹងទាំងស្រុងលើពលរដ្ឋទាំង ២៥លាននាក់មិនឲ្យចេញពីផ្ទះដើម្បីទប់ស្កាត់នឹងការឆ្លងរាលដាលជំងឺកូវីដ១៩។ វិធានការមួយនេះបានបញ្ឆេះកំហឹងរបស់ពលរដ្ឋដោយមានឱពុក ម្តាយខ្លះត្រូវបានគេបំបែកចេញពីកូនៗ។ នៅក្នុងន័យនេះ លោកម៉ាក្រុងបានស្នើឲ្យលោកស៊ីគិតគូរពីក្តីបារម្ភរបស់ពលរដ្ឋបារាំងដែលកំពុងជួបការលំបាកនៅក្នុងវិធានការមួយនេះ។ សំណូមពររបស់លោកម៉ាក្រុង គឺចង់ឲ្យរដ្ឋអំណាចចិនរក្សាចរាចរណ៍ផ្លូវអាកាសទៅកាន់បារាំង អនុញ្ញាតឲ្យពលរដ្ឋបារាំងអាចធ្វើដំណើរកាន់អាកាសយានដ្ឋាន និងការពារផលប្រយោជន៍របស់កុមារដោយធ្វើយ៉ាងណាចៀសវាងបំបែកពួកគេចេញពីឱពុក ម្តាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ