កាសែតបារាំង ៖ ចិនចាប់ឃុំខ្លួនបុគ្គលិករបស់សហភាពអឹរ៉ុបម្នាក់
បើតាមការទម្លាយព័ត៌មានរបស់កាសែត ឡឺម៉ុង ប៉េកាំងបានចាប់ឃុំខ្លួនបុគ្គលិកបម្រើការក្នុងជួរប្រតិភូសហភាពអឺរ៉ុបម្នាក់ តាំងពីខែកញ្ញា២០២១មក ដោយពុំមានមូលហេតុស្របច្បាប់សោះ។ នេះជាករណីចាប់ខ្លួនដែលពុំធ្លាប់កើតមានក្នុងទំនាក់ទំនងចិន-អឺរ៉ុប ពីមុនមកទេ។
ចុះផ្សាយនៅថ្ងៃ៖
ស្តាប់ - ០២:០៧
ជាង៨ខែមកហើយដែលតំណាងសហភាពអឺរ៉ុបព្យាយាមស្វែងរកដំណឹងទាក់ទងនឹងបុគ្គលិកបាត់ខ្លួន ឈ្មោះ អាន ដុង An Dong។ ជាង៧ខែមកហើយដែល ក្រសួងការបរទេសចិន មិនឆ្លើយតបនឹងលិខិតរបស់សហភាពអឺរ៉ុប។
ប៉ុន្តែដូចជាករណីបាត់ខ្លួនជាច្រើនផ្សេងទៀតនៅចិនដែរ អាន ដុង បុគ្គលិកផ្នែកព័ត៌មានវិទ្យា របស់ប្រតិភូសហភាពអឺរ៉ុប អាយុ៤៩ឆ្នាំ ត្រូវជាប់ចោទពីបទញុះញង់ឱ្យមានជម្លោះនិងបង្កឱ្យមានភាពវឹកវរ ដែលជាបទចោទប្រកាន់មិនច្បាស់លាស់ តែត្រូវបានក្រសួងសន្តិសុខសាធារណៈចិនប្រើប្រាស់ជាញឹកញាប់ សម្រាប់បិទមាត់ ឬចាប់ខ្លួន អ្នកបញ្ចេញសំឡេងប្រឆាំង។ ក្នុងករណី អាន ដុង លោកបានបង្ហាញដោយចំហនិន្នាការប្រកាន់សាសនាគ្រិស្ត និងធ្លាប់មានបង្ហោះតាមប្រព័ន្ធសង្គម ដែលហាមឃាត់ដោយអាជ្ញាធរប៉េកាំងផង។ តែគ្មានកំហុសអ្វីគួរចាប់ខ្លួនទៅឃុំឃាំងទេ។ នេះបើតាមការលម្អិតរបស់កាសែតឡឺម៉ុង។
ស្ថាប័នការទូតសហភាពអឺរ៉ុប បានទទូចសុំឱ្យអាជ្ញាធរចិន ផ្តល់សិទ្ធិដល់ អាន ដុង ដែលកំពុងជាប់ឃុំនៅក្នុងខេត្តស៊ីឈន់ អាចជ្រើសរើសរកមេធាវីមកការពារខ្លួនតាមផ្លូវច្បាប់ មិនមែនជាមេធាវីដែលអាជ្ញាធរចង្អុលឱ្យ។ ប៉ុន្តែសំណើនេះ ក៏មានចម្លើយតបដែរ។
នេះជាលើកទីមួយហើយ ដែលការចាប់ខ្លួនបុគ្គលិកបម្រើការឱ្យស្ថាប័នការទូតបស្ចិមលោក ត្រូវផ្សព្វផ្សាយជាសាធារណៈ។ សូមបញ្ជាក់ថា គ្រប់បុគ្គលិកចិនបម្រើការឱ្យស្ថាបនបរទេស ក៏ដូចជាបុគ្គលិកធ្វើការឱ្យសារព័ត៌មានបរទេសនៅក្នុងប្រទេសចិន ត្រូវចុះហត្ថលេខាលើកិច្ចសន្យាជាមួយស្ថាប័នរដ្ឋបាលចិន Beijing Personnel Service Corporation for Diplomatic Missions។ តាំងពីឆ្នាំ២០២១មក ចិនមានមធ្យោបាយដាក់សម្ពាធខ្លាំងមួយទៀត គឺចិនអាចមិនចុះហត្ថលេខាអនុញ្ញាតឱ្យពលរដ្ឋជ្រើសរើសរួច ធ្វើការជាមួយបរទេសបាន។ កាលពីខែធ្នូ ២០២០ ជំនួយការរបស់ភ្នាក់ងារBloomberg បានទទួលជោគវាសនាបែបនេះម្នាក់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ