បារាំង៖ លោក អេម៉ានុយអែល ម៉ាក្រុង ជាប់ឆ្នោតជាប្រធានាធិបតីមួយអាណត្តិទៀត
ឆ្លងកាត់ការបោះឆ្នោតប្រធានាធិបតីបារាំង ជុំទី២ កាលពីថ្ងៃអាទិត្យទី២៤មេសា លទ្ធផលបានបង្ហាញថា គឺលោកអេម៉ានុយអែល ម៉ាក្រុង ដែលបានឈ្នះធ្វើជាប្រធានាធិបតីមួយអាណត្តិទៀត ជាមួយនឹងសំឡេងឆ្នោត ជាង៥៨%។ ចំណែកលោកស្រីម៉ារីន ឡឺប៉ែន ដែលជាគូប្រជែង បានសំឡេងឆ្នោតចំនួនជាង ៤១%។ ដោយឡែក យោងតាមការប៉ាន់ស្មាន អត្រាអ្នកមិនទៅបោះឆ្នោត មានប្រមាណ២៨% នៃចំនួនប្រជាជនក្នុងបញ្ជីឈ្មោះបោះឆ្នោត ទាំងអស់ប្រមាណ៤៩លាននាក់។ មានន័យថា ប្រជាជនបារាំងប្រមាណ១៤លាននាក់ ដែលបានបដិសេធ មិនជ្រើសរើសរវាងលោកម៉ាក្រុង និងលោកស្រី ឡឺប៉ែន។ យ៉ាងណាក៏ដោយ លោកម៉ាក្រុង បានថ្លែងសុន្ទរកថា ថាលោកនឹងធ្វើជាប្រធានាធិបតី បម្រើប្រជាពលរដ្ឋបារាំងទាំងអស់ ដោយមិនបោះបង់ចោលនរណាម្នាក់ឡើយ។
ចុះផ្សាយនៅថ្ងៃ៖
ស្តាប់ - ០២:៥៣
គឺនៅទីលាន Champ de Mars ខាងក្រោមទួអេហ្វែល ដែលលោកប្រធានាធិបតី អេម៉ានុយអែល ម៉ាក្រុង បានរៀបចំកម្មវិធីជួបជុំជាមួយអ្នកគាំទ្រទាំងអស់ ដើម្បីអបអរជ័យជំនះ របស់លោក ក្នុងការបោះឆ្នោតប្រធានាធិបតីអាណត្តិថ្មី។
បន្ទាប់ពីបានថ្លែងអំណរគុណ ដល់សកម្មជន ក៏ដូចជាអ្នកនយោបាយដែលបានគាំទ្ររូបលោក លោកម៉ាក្រុង បានអរគុណប្រជាពលរដ្ឋបារាំងទាំងអស់ ដែលបានសម្តែងមតិ ផ្តល់សេចក្តីទុកចិត្តមកលើរូបលោក ឲ្យដឹកនាំប្រទេស៥ឆ្នាំទៀត។
លោកប្រធានាធិបតីម៉ាក្រុង បានសន្យាថា ក្នុងអាណត្តិថ្មីរបស់លោក នឹងគឺជាយុគសម័យថ្មី ដែលលោកនឹងផ្លាស់ប្តូររបៀបដឹកនាំប្រទេស ហើយលោកសន្យាថានឹងធ្វើជាប្រធានាធិបតី បម្រើប្រជាជនបារាំងទាំងអស់គ្នា ដោយមិនបោះបង់នរណាម្នាក់ និងដោយមិនប្រកាន់ថា អ្នកនោះបានបោះឆ្នោតឲ្យបេក្ខជនផ្សេងឡើយ។
លោកម៉ាក្រុងបានអរគុណដែលប្រជាជនបារាំង បានលទ្ធភាពជូនលោក៥ឆ្នាំទៀត ដើម្បីឲ្យលោកសម្រេចគម្រោង កសាងពង្រឹងភាពឯករាជរបស់ប្រទេសបារាំង និងកសាងសហភាពអឺរ៉ុបឲ្យកាន់តែរឹងមាំ។ លោកម៉ាក្រុងសន្យា នឹងវិនិយោគដើម្បីឲ្យមានការផ្លាស់ប្តូរស៊ីជំរៅ បន្តធានាឲ្យមានការរីកចម្រើនជាក់ស្តែងសម្រាប់ពលរដ្ឋម្នាក់ៗ រំដោះភាពច្នៃប្រឌិត និងគំនិតបង្កើតថ្មី ព្រមទាំងធ្វើឲ្យបារាំង ក្លាយជាប្រទេសឈានមុខគេ ក្នុងវិស័យការពារបរិស្ថានធម្មជាតិ។
គួរកត់សំគាល់ថា ថ្វីបើលោកម៉ាក្រុងបានឈ្នះឆ្នោតមួយអាណត្តិ តែជាជ័យជំនះ ដែលអ្នកវិភាគនយោបាយមួយចំនួន លើកឡើងថា មានភាពផុយស្រួយខ្លាំងណាស់។ បរិបទនយោបាយបារាំង ប្រកបដោយភាពតានតឹង និងការបែងចែកបែកបាក់គ្នាក្នុងសង្គម ដែលតម្រូវឲ្យលោកម៉ាក្រុង ត្រូវតែរកយុទ្ធសាស្ត្រដឹកនាំប្រទេស កសាងឯកភាពសាមគ្គីជាតិឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ