ប្រមុខរដ្ឋាភិបាលអូទ្រីស លោកណេហាមែរ ជួបនិយាយជាលោកពូទីន ពីបញ្ហាមនុស្សធម៌នៅអ៊ុយក្រែន
លោកប្រមុខរដ្ឋាភិបាលអូទ្រីស កាល ណេហាមែរ បានទៅជួបជាមួយលោកពូទីន ដល់ទីក្រុងម៉ូស្គូ កាលពីថ្ងៃចន្ទ ទី១១មេសា។ កម្មវត្ថុនៃជំនួបនេះ គឺលោកណេហាមែរ មានបំណង និយាយប្រាប់ទៅលោកពូទីន ឲ្យគិតគូរបើកច្រកផ្លូវមនុស្សធម៌ ជួយជីវិតប្រជាជនស៊ីវីលអ៊ុយក្រែន ពីការទម្លាក់គ្រាប់របស់កងទ័ពរុស្ស៊ី។ តែយ៉ាងណា ប្រភពពីរដ្ឋាភិបាលអូទ្រីសបានឲ្យដឹងថា ក្នុងការនិយាយគ្នាគឺគ្មានលទ្ធផលអ្វីទាំងអស់ និងដោយគ្មាន សូម្បីតែការចាប់រលាក់ដៃគួរសមក្រោយចប់ការប្រជុំ រវាងមេដឹកនាំទាំង២។
ចុះផ្សាយនៅថ្ងៃ៖
ស្តាប់ - ០២:២៧
យោងតាមការផ្សាយរបស់បណ្តាញព័ត៌មានអូទ្រីស ជំនួបរវាងលោកអធិការបតីអូទ្រីស កាល ណេហាមែរ (Karl Nehammer) ជាមួយនឹងលោកពូទីន បានប្រព្រឹត្តិធ្វើទៅរយៈពេលជាងមួយម៉ោង នៅនិវេសនដ្ឋាន Novo-Ogaryovo ជាយទីក្រុងម៉ូស្គូ កាលពីរសៀលថ្ងៃចន្ទ ទី១១មេសា។
លោកប្រមុខរដ្ឋាភិបាលអូទ្រីស បានអះអាងថា ក្នុងពេលជួបគ្នា លោកបាននិយាយដោយត្រង់ៗ ដោយឥតលាក់លៀម ជាមួយលោកពូទីន។ លោកណេហាមែរ អះអាងថាលោកបានប្រាប់ទៅលោកពូទីន ថា អ្វីដែលកងទ័ពរុស្ស៊ីបានធ្វើនៅតំបន់ប៊ូតឆា រួមទាំងតំបន់ផ្សេងទៅនៅអ៊ុយក្រែន គឺវាជាអំពើឧក្រិដ្ឋសង្គ្រាម ហើយអ្នកទទួលខុសត្រូវ នឹងត្រូវទទួលទោសកំហុស ចំពោះមុខច្បាប់អន្តរជាតិនៅថ្ងៃខាងមុខ។
លោកណេហាមែរ បានលើកឡើងថា លោកក៏បានប្រាប់ទៅលោកពូទីនដែរ អំពីភាពចាំបាច់បន្ទាន់បំផុត ក្នុងការបើកច្រកផ្លូវមនុស្សធម៌ ជន្លៀសប្រជាជនស៊ីវីល និងការពារសន្តិសុខឲ្យក្រុមអង្គការមនុស្សធម៌ អាចដឹកជំនួយស្បៀងអាហារ ថ្នាំសង្កូវទៅជួយដល់ប្រជាជនស៊ីវីល ស្ត្រី និងកុមារ ដែលកំពុងតែត្រូវកងទ័ពរុស្ស៊ីឡោមព័ទ្ធ និងទំលាក់គ្រាប់ជ្រុំស្ទើរមិនលោះថ្ងៃ។ លោកប្រមុខរដ្ឋាភិបាលអូទ្រីស បានទទួលស្គាល់ថា ការនិយាយគ្នាជាមួយលោកពូទីន គឺមានការលំបាកតានតឹងខ្លាំងណាស់ ហើយពេលបែកគ្នា ក៏គ្មានការចាប់រលាក់ដៃជាការគួរសមដែរ។
ដោយឡែក លោក Dmitri Peskov អ្នកនាំពាក្យវិមានក្រឹមឡាំងបានបញ្ជាក់ថា ជំនួបនេះ ត្រូវបានធ្វើឡើងដោយបិទទ្វារជិត និងដោយគ្មានការធ្វើសន្និសីទកាសែត ក្រោយចប់ការប្រជុំទេ។ វាជាអ្វីដែលភាគីអូទ្រីសបានស្នើ។
គួរបញ្ជាក់ថា លោក កាល ណេហាមែរ បានសម្រេចចិត្តទៅជួបលោកពូទីនដោយផ្ទាល់ បន្ទាប់ពីលោកបានទៅដល់ទីក្រុងប៊ូតឆា ប្រទេសអ៊ុយក្រែន កាលពីថ្ងៃសៅរ៍ សប្តាហ៍មុន។ ក្រុងប៊ូតឆា ជាទីដែលគេបានរកឃើញសាកសពជនស៊ីវីលអ៊ុយក្រែន ជាង៤០០នាក់ ដែលត្រូវកងទ័ពរុស្ស៊ីសម្លាប់រង្គាល។ រដ្ឋមន្ត្រីការបរទេសអូទ្រីស អះអាងថា លោក កាល ណេហាមែរ មិនបានទៅជួបលោកពូទីន ក្នុងនាមជាអ្នកតំណាង ឲ្យសហភាពអឺរ៉ុបអ្វីទេ គឺទៅជាលក្ខណៈផ្ទាល់ខ្លួន។ តែយ៉ាងណាមុននឹងទៅ លោកប្រមុខរដ្ឋាភិបាលអូទ្រីស បានពិភាក្សាជាមួយលោកហ្សេឡេនស្គី លោកអូឡាហ្វ ស្ហុលស៍ លោកស្រីវុនដឺឡៃយិន និងលោកអ៊ែរដូហ្កាន់។ រដ្ឋមន្ត្រីការបរទេសអូទ្រីសបន្ថែមថា បើទោះជាគ្មានសង្ឃឹមថាលោកពូទីននឹងស្តាប់ តែលោកណេហាមែរ ចង់ទៅប្រាប់លោកពូទីន ឲ្យបានឮផ្ទាល់ត្រចៀក ថាអ្វីដែលរុស្ស៊ីកំពុងធ្វើនៅអ៊ុយក្រែន វាគឺជាកំហុសមួយធ្ងន់ធ្ងរណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ