ចំណីអាហារឡើងថ្លៃយ៉ាងគំហុក ហើយអង្គការស្បៀងអាហារពិភពលោក ព្រួយពីរឿងខ្វះស្បៀង
តម្លៃស្បៀងអាហារនិងទំនិញឡើងថ្លៃ ចាប់ពីខែមីនាមក គឺហក់កើនកម្ពស់មិនធ្លាប់ជួបសោះ ក្នុងរយៈកាលជាង៣០ឆ្នាំចុងក្រោយ។ នេះក៏ព្រោះតែសង្គ្រាមរុស្ស៊ី-អ៊ុយក្រែន ហើយដែលវាបង្កហានិភ័យដល់ទីផ្សារសកលលោក។ នេះជាការសម្តែងក្តីបារម្ភរបស់ អង្គការសហប្រជាជាតិទទួលបន្ទុកខាងស្បៀងអាហារនិងកសិកម្ម។ ហេង ឧត្តម ជូនព័ត៌មានលម្អិត៖
ចុះផ្សាយនៅថ្ងៃ៖
ស្រូវសាឡី ពោត និងប្រេងឆា ដែលជាគ្រឿងមូលដ្ឋានសម្រាប់ផលិតអាហារផ្សេងៗ ដូចជា ធ្វើនំប៉័ងនិងម្សៅ គឺបានឡើងថ្លៃយ៉ាងគំហុក។ ស្រូវសាឡី កើនឡើង ១៧ ឬ១៩%។ ពោតក្រហមក៏កើនថ្លៃជាង១៩%ដែរ។ ប្រេងឆានៅអាហ្វ្រិក ថ្លៃកើនជាង២៣%។ ជាថ្លៃខ្ពស់បំផុស មិនធ្លាប់មានកន្លងមក។ ឯ សណ្តែក ប្រេងដូង ជាដើម ក៏ឡើងថ្លៃ មិនធម្មតាដែរ។ នេះគ្រាន់តែជាងមួយខែសោះ នៃជម្លោះបង្ហូរឈាមរវាងរុស្ស៊ី-អ៊ុយក្រែន។ សង្គ្រាមនេះ ក៏នឹងបង្កការគំរាមកំហែង ទៅដល់ រដូវច្រូតកាត់ នាពេលខាងមុខៗទៀត។
រុស្ស៊ី ជាប្រទេសនាំចេញស្រូវសាឡី លំដាប់លេខមួយលើពិភពលោក ហើយ អ៊ុយក្រែន លំដាប់ទី៥ ។ បើបូកសរុបប្រទេសទាំងពីរនេះ គឺការនាំចេញស្រូវសាឡី ស្មើនឹង៣០%នៃតម្រូវការពិភពលោក។ ក៏ប៉ុន្តែនៅថ្ងៃព្រហស្ប៍សប្តាហ៍នេះ អ៊ុយក្រែន បែរជាបានប្រកាសត្រដរសុំជំនួយពីសហភាពអឺរ៉ុប ដើម្បីជួយដល់កសិករអ៊ុយក្រែន ស្រេចបាត់ទៅទៀត។ នេះក៏ពីព្រោះថា កំពង់ផែធំៗ របស់អ៊ុយក្រែន ត្រូវ រុស្ស៊ី វាយប្រហារនិងបំផ្លោងគ្រាប់បែក។
មួយវិញទៀត ការនាំគ្នាប្រមូលទិញទំនិញនិងស្បៀងស្ទុកទុក ក៏នាំឲ្យតម្លៃទំនិញកើនថ្លៃខ្លាំងដែរ។ ជាផលវិបាក ចាប់ពីពេលនេះដល់ខែមិថុនា នៅទ្វីបអាហ្វ្រិក ប៉ែកខាងនីរតី និងនៅប្រទេសតំបន់សាហែល គឺត្រូវប្រឈមមុខនឹងការខ្វះស្បៀងអាហារ ពិសេសខ្វះ Céréales ដែលផលិតចេញពីស្រូវសាឡី របស់រុស្ស៊ីនិងអ៊ុយក្រែន។ ចំពោះមុខ ប្រធានាធិបតីនីហ្សេ Mohamed Bazoum បានប្រកាសសុំជំនួយ។ កាលពីថ្ងៃពុធ បារាំង និងសហរដ្ឋអាមេរិក ព្រមទាំងប្រទេសផ្សេងទៀត បានសន្យាជួយ ១,៧៩ ពាន់លានអឺរ៉ុប សម្រាប់ជំនួយស្បៀងអាហារ។
ទោះយ៉ាងនេះក្តី អង្គការស្បៀងអាហារពិភពលោក បានទាញសញ្ញាអាសន្នបញ្ជាក់ ថា ប្រសិនបើសង្គ្រាមរុស្ស៊ី-អ៊ុយក្រែននៅតែបន្តអូសបន្លាយតទៀត ដែលរំខានដល់ដំណើរចរន្តផលិតនិងដឹកជញ្ជូនស្បៀង, នោះគឺ ជីវិតមនុស្ស ប្រហែលពី៨ទៅ១៣លាននាក់បន្ថែមទៀត នឹងត្រូវរងទុក្ខខ្វះអាហារូបត្ថម្ភ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ