លោក ហ្សង់អ៊ីវ ឡឺឌ្រីយ៉ង់ ៖ សូមកុំអាលជឿ ចំពោះពាក្យប្រកាសរបស់រុស្ស៊ី ដែលថាការចរចាមានពន្លឺវិជ្ជមាន
លោក ហ្សង់អ៊ីវ ឡឺ ឌ្រីយ៉ង់ រដ្ឋមន្ត្រីការបរទេសបារាំង បានផ្តល់បទសម្ភាសន៍មួយ កាលពីថ្ងៃពុធ ទី៣០មីនា ឲ្យវិទ្យុបារាំងអន្តរជាតិ RFI ។ នៅក្នុងបទសម្ភាសន៍នោះ លោកប្រមុខការទូតបារាំងបានលើកឡើង ថាសម្រាប់ពេលនេះលោកមិនបានសង្កេតឃើញ ថាការចរចាគ្នា រវាងរុស្ស៊ី និងអ៊ុយក្រែន បានឈានទៅមុខប្រសើរទាល់តែសោះ។ លោកបញ្ជាក់ថា លោកមិនទាន់ទុកចិត្តរុស្ស៊ី ថាមានចេតនាចង់ចរចាពិតនោះទេ ព្រោះថារហូតមកទល់ពេលនេះ ការអនុវត្តជាក់ស្តែងរបស់ភាគីរុស្ស៊ី គឺវាផ្ទុយពីអ្វីដែលរុស្ស៊ីបានប្រកាស។
ចុះផ្សាយនៅថ្ងៃ៖
សម្រង់ប្រសាសន៍លោក ហ្សង់អ៊ីវ ឡឺឌ្រីយ៉ង់ រដ្ឋមន្ត្រីការបរទេសបារាំង
"យប់មិញនេះ គ្រាប់បែកនៅតែធ្លាក់ដដែល សង្គ្រាមនៅតែបន្តនៅការគីវ និងនៅម៉ារីយូប៉ូល។ លោកពូទីន បានសម្រេចឡោមព័ទ្ធទីក្រុងម៉ារីយូប៉ូលទាំងស្រុង។ ប្រជាជនយ៉ាងហោច ជិត២សែននាក់ កំពុងជាប់នៅទីនោះ ទៅណាមិនរួច។ យើងឃើញថាសង្គ្រាមនៅតែបន្តដដែល។
សម្រាប់ពេលនេះ អ្វីដែលខ្ញុំឃើញ គឺថាវាគ្មានការដើរទៅមុខប្រសើរឡើងទាល់តែសោះ ទាក់ទិននឹងការចរចាគ្នា។ វាមានតែការប្រកាស របស់ភាគីរុស្ស៊ី ដែលពេលខ្លះប្រកាសម្តងអញ្ចេះ ម្តងអញ្ចោះ មិនច្បាស់លាស់សោះ!
ខ្ញុំជឿតែមួយគត់ គឺជឿទង្វើជាក់ស្តែង ! ប្រសិនបើស្អែកព្រឹក លោកពូទីន ប្រកាសថា « ឥឡូវគាត់សុខចិត្តដកថយ លែងឡោមព័ទ្ធក្រុងម៉ារីយូប៉ូល ឲ្យប្រជាជនចាកចេញដោយសុវត្ថិភាព ដើម្បីបង្ហាញថារុស្ស៊ី ពិតជាចង់ឲ្យស្ថានការណ៍បានប្រសើរឡើង » អាហ្នឹងទើបខ្ញុំជឿ!។ តែសម្រាប់ពេលនេះ វាអត់មានទាល់តែសោះ ! ការទម្លាក់អាវុធឈប់បាញ់ មិនមែនធ្វើដោយឯកឯងទេ គឺទាល់តែលោកពូទីនសម្រេចចិត្តថាធ្វើមែន ថាឈប់បាញ់ ហើយងាកមកចរចា។ តែវាគ្មានទង្វើជាក់ស្តែង បែបនេះទាល់តែសោះ ឥឡូវនេះ !
ដូច្នេះ សូមកុំអាលឆាប់ជឿពេក ជាមួយនឹងពាក្យប្រកាសត្រឹមតែសំដី។ យើងត្រូវការ ឲ្យឃើញទង្វើអនុវត្តជាក់ស្តែង ឲ្យច្បាស់នឹងភ្នែក។ បើរុស្ស៊ី ចង់ឲ្យគេទុកចិត្តរុស្ស៊ី គឺរុស្ស៊ីត្រូវធ្វើអ្វីមួយឲ្យជាក់ស្តែងមក បង្ហាញអំពីចេតនាថាខ្លួនចង់ដោះស្រាយ ប្រសិនបើមានចេតនាបែបនោះមែន។
វាអាចដែរ ដែលថាកងទ័ពរុស្ស៊ីកំពុងតែប្តូរយុទ្ធសាស្ត្រប្រយុទ្ធ ដកថយទៅត្រឹមខាងកើតវិញ ព្រោះរុលទៅមុខលែងរួច។ តែវាក៏អាចដែរ ដែលរុស្ស៊ី ប្រកាសថាចរចាក្នុងពេលនេះ គឺដើម្បីឆក់ឱកាស រៀបចំកម្លាំងកងទ័ពឡើងវិញ ក៏ថាបានដែរ។ ការឡោមព័ទ្ធទីក្រុង ឲ្យប្រជាជនដាច់ពោះ ហើយទំលាក់គ្រាប់ជ្រុំរាល់ថ្ងៃ វាគឺជាយុទ្ធសាស្ត្រ ដែលកងទ័ពរុស្ស៊ីធ្លាប់បានប្រើរួចហើយ នៅហ្ក្រូសនី និងនៅអាឡិប។ ប្រវត្តិសាស្ត្របានបង្ហាញ§ប្រាប់យើងថា ការពិតរុស្ស៊ីប្រកូកប្រកាសថាចរចា តែធាតុពិតគឺដើម្បីរៀបចំកម្លាំងឡើងវិញតែប៉ុណ្ណោះ។
ទ្រឹស្តីចក្រផ្លូវមនុស្សធម៌ តាមបែបរុស្ស៊ី គឺជាទ្រឹស្តីដែលស្ថិតនៅក្នុងយុទ្ធសាស្ត្រឡោមព័ទ្ធនេះ។ ដូចយើងបានឃើញនៅ ហ្ក្រូសនី និងនៅអាឡិប ។ ហើយឥឡូវនេះ យើងកំពុងតែបារម្ភថា រុស្ស៊ីកំពុងតែធ្វើនៅម៉ារីយូប៉ូល។ រុស្ស៊ីអាចបើកផ្លូវ ឲ្យប្រជាជនចេញទៅខាងដីរុស្ស៊ី ហើយអ្នកដែលនៅសល់ មិនព្រមចេញ គឺរុស្ស៊ីចាត់ទុកថាជាពួកភេរវកម្ម និងពួកណាហ្ស៊ី។ ដូច្នេះវានឹងបន្ថែមហេតុផល ឲ្យរុស្ស៊ីបន្តទំលាក់គ្រាប់ដើម្បីសំលាប់កាន់តែខ្លាំង។ អានេះហើយ ជាយុទ្ធសាស្ត្រកងទ័ពរុស្ស៊ី។
អ្វីដែលយើងចង់បាន គឺចង់ឃើញរុស្ស៊ីទំលាក់អាវុធជាក់ស្តែងនៅម៉ារីយូប៉ូឡ ឲ្យប្រជាជនចាកចេញដោយសុវត្ថិភាព និងឲ្យក្រុមអង្គការមនុស្សធម៌ អាចដឹកស្បៀងចូលទៅម៉ារីយូប៉ូល ដោយសុវត្ថិភាព !"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ