សង្រ្គាមអ៊ុយក្រែន៖រុស្ស៊ីបញ្ជាក់ពីលទ្ធផលនៃកិច្ចចរចាដែលគ្មានភាពចម្រើន និងគ្មានសញ្ញាវិជ្ជមាន
កិច្ចចរចារវាងរុស្ស៊ី និងតួកគីរយៈពេល ២ថ្ងៃក្នុងប្រទេសតួកគីបានបិទបញ្ចប់ក្នុងថ្ងៃអង្គារ ទី២៩ មីនា។ ប្រធានាធិបតីអ៊ុយក្រែនបានបញ្ជាក់ពីការមានសញ្ញាវិជ្ជមាន។ ចំណែកប្រធានគណៈប្រតិភូ និងជាអ្នកតំណាងឲ្យវិមានក្រេមឡាំងលោកវ្ល៉ាឌីមៀរ មេឌីនស្គីដែលដឹកនាំការចរចារុស្ស៊ីបានលើកឡើងពីកិច្ចចរចាប្រកបដោយសាច់ការ និងថា សំណើច្បាស់លាស់របស់អ៊ុយក្រែនសម្រាប់កិច្ចព្រមព្រៀងមួយនឹងត្រូវធ្វើការពិនិត្យ សិក្សាឆាប់ៗ រួចដាក់ជូនទៅប្រធានាធិបតីរុស្ស៊ីលោកពូទីន។ ទន្ទឹមគ្នានេះ អនុរដ្ឋមន្រ្តីការពារជាតិរុស្ស៊ីបានប្រកាសពីការកាត់បន្ថយសកម្មភាពយោធា និងចំនួនទ័ពនៅក្នុងទីក្រុងកៀវ និងទីក្រុងឆែនីហ្គីវ។ បន្ទាប់មកក្នុងថ្ងៃពុធ ទី៣០ មីនា វិមានក្រេមឡាំងតាមរយៈអ្នកនាំពាក្យលោកឌីមីទ្រី ប៉េស្កូវបានសាទរដែលអ៊ុយក្រែនទើបបានបញ្ជាក់សំណើរបស់ខ្លួនជាលាយលក្ខណ៍។ តែខុសពីការលើកឡើងរបស់ក្រុមអ្នកតំណាងរុស្ស៊ីដែលបានចូលរួមចរចា លោកឌីមីទ្រី ប៉េស្កូវបានបញ្ជាក់ពីការគ្មានសញ្ញាចម្រើនណាមួយនៅក្នុងកិច្ចចរចានោះទេ។
ចុះផ្សាយនៅថ្ងៃ៖
ស្តាប់ - ០១:១៨
« នៅទីបំផុត ភាគីអ៊ុយក្រែនបានចាប់ផ្តើមបញ្ជាក់យ៉ាងលំអិត និងជាលាយលក្ខណ៍អក្សរនូវសំណើរបស់ខ្លួនដែលបានស្នើឡើងនៅក្នុងការចរចា។ រហូតមកដល់ពេលនេះ អ៊ុយក្រែនមិនដែលធ្វើសំណើរបស់ខ្លួនជាលាយលក្ខណ៍អក្សរទេ។ នេះជាកត្តាវិជ្ជមានមួយ។ ក្រៅពីនេះ និងសម្រាប់ពេលនេះ យើងមិនអាចលើកឡើងពីជោគជ័យ ពីភាពចម្រើនទៅមុខ និងពីសញ្ញាវិជ្ជមានណាមួយនៅក្នុងកិច្ចចរចាបានឡើយ។ នៅមានការងារជាច្រើនទៀតដែលត្រូវធ្វើ។
អស់លោកពិតជាបានកត់សម្គាល់ឃើញរួចហើយថា យើងចៀសវាងដោយប្រុងប្រយ័ត្នជាទីបំផុតក្នុងការធ្វើសេចក្តីថ្លែងការណ៍ណាមួយស្តីពីខ្លឹមសារដែលកើតចេញពីកិច្ចចរចា។ យើងមិនបាននិយាយជាសាធារណៈទេ។ យើងគិតថា ការចរចាត្រូវតែធ្វើឡើងដោយសម្ងាត់។ ក៏ប៉ុន្តែ យើងបានឮក្រុមអ្នកតំណាងអ៊ុយក្រែននៅក្នុងកិច្ចចរចា រួមទាំងអ្នកតំណាងមិននៅក្នុងកិច្ចចរចាបានសម្តែងមតិនៅលើបណ្តាញសង្គម និងសាបព្រោះនូវភាពមិនចុះសម្រុងគ្នា។ នេះមិនមែនជាកត្តាមួយដែលរួមចំណែកដល់ភាពជោគជ័យនៅក្នុងការចរចានោះទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ