ប្រទេសអឺរ៉ុបទាំង២៧ សម្រេចប្រើឈ្មោះគណកម្មការអឺរ៉ុបតែមួយ ដើម្បីអាចទិញហ្កាសរួមគ្នាក្នុងតម្លៃថោក
វិបត្តិតម្លៃថាមពល ប្រេង និងហ្កាស កំពុងចោទឡើងជាខ្លាំង ជាពិសេសនៅអឺរ៉ុប ដោយសារតែសង្គ្រាមអ៊ុយក្រែន។ រុស្ស៊ី គឺជាប្រទេសផលិតប្រេង និងហ្កាសដ៏សំខាន់បំផុត ហើយដែលក្រុមប្រទេសអឺរ៉ុបទិញពីរុស្ស៊ីក្នុងទំហំច្រើន។ ថ្វីបើមិនមានការត្រូវរ៉ូវគ្នា ក្នុងការធ្វើពហិការ ឈប់ទិញប្រេងនិងហ្កាសរបស់រុស្ស៊ីមែន តែក្រុមប្រទេសអឺរ៉ុបទាំង២៧ បានសម្រេចកាលពីល្ងាចថ្ងៃទី២៥មីនា ប្រើឈ្មោះគណកម្មការអឺរ៉ុបតែមួយ ដើម្បីអាចចុះកិច្ចសន្យាទិញហ្កាសរួមគ្នាក្នុងតម្លៃថោក។ វិធីនេះ ក៏នឹងសម្រួលឲ្យអឺរ៉ុប អាចចរចា ស្វែងរកអ្នកផ្គត់ផ្គង់ហ្កាសផ្សេងទៀត ក្រៅពីរុស្ស៊ីដែរ។
ចុះផ្សាយនៅថ្ងៃ៖
ស្តាប់ - ០២:៣៣
ក្រោយការជជែកគ្នា យ៉ាងតឹងតែង ពេញមួយរសៀលរហូតដល់យប់ថ្ងៃសុក្រ ទី២៥មីនា ទីបំផុតក្រុមប្រទេសទាំង២៧ នៃសហភាពអឺរ៉ុប បានសុខចិត្តកំណត់វិធានការ ទិញហ្កាសរួមគ្នា ដោយប្រើឈ្មោះគណកម្មការអឺរ៉ុបតែមួយ ជាអ្នកចុះកិច្ចសន្យា។ នេះជាវិធានការ យកគំរូតាមវិធានការទិញវ៉ាក់សាំងរួមគ្នា។
លោកម៉ាក្រុងប្រធានាធិបតីបារាំង បានអះអាងថា ការទិញហ្កាសរួមគ្នា គឺជាវិធានការដ៏ល្អ និងមានប្រសិទ្ធភាព ដើម្បីឲ្យអឺរ៉ុបអាចទិញក្នុងតម្លៃថោក ព្រោះការរួមគ្នាទូទាំងអឺរ៉ុប គឺវាមានទំងន់។ ដោយឡែក លោកអូឡាហ្វ ស្ហុល ប្រមុខរដ្ឋាភិបាលអាល្លឺម៉ង់ បានលើកឡើងថា វិធានការនេះ គឺឈរលើការស្ម័គ្រចិត្ត ពោលគឺវិស័យឯកជន តាមប្រទេសនីមួយៗ នៅតែអាចចរចា ចុះកិច្ចសន្យាទិញហ្កាសបានដាច់ដោយឡែកជាធម្មតា។
ឆ្លើយតបទៅកាន់សំដីលោកពូទីន ដែលលើកឡើងថា « ពួកប្រទេសមិនមែនជាមិត្តរុស្ស៊ី » ត្រូវតែបង់លុយថ្លៃហ្កាស មកឲ្យរុស្ស៊ីជាប្រាក់រូបល៍នោះ លោកម៉ាក្រុងបានថ្លែងថា វានឹងជាឱកាសឲ្យអឺរ៉ុប អាចយកកិច្ចសន្យាមកបោកលើតុ នៅចំពោះមុខលោកពូទីនតែម្តង ព្រោះកិច្ចសន្យាកំណត់ច្បាស់ណាស់ ថាប្រាក់ទូទាត់មិនអាចធ្វើជាប្រាក់រូបល៍បានទេ។
យ៉ាងណាមិញ នៅក្នុងវេទិកាដូហា នៅព្រឹកថ្ងៃសៅរ៍នេះ លោក វ្លូឌីមៀរ ហ្សេឡេនស្គី ប្រធានាធិបតីអ៊ុយក្រែន បានថ្លែងសារតាមវីដេអូ ដោយបានអំពាវនាវ ឲ្យប្រទេសកាតា ដែលជាអ្នកផលិតហ្កាសរាវ ដ៏សំខាន់មួយដែរនោះ ត្រូវតែប្រឹងប្រែងបន្ថែមការផលិត ដើម្បីឲ្យពិភពលោកអាចរំដោះខ្លួន ឈប់ក្លាយជាចំណាប់ខ្មាំងនៃហ្កាសរបស់រុស្ស៊ី តទៅទៀត។
គួរបញ្ជាក់ថា សហភាពអឺរ៉ុប កំពុងតែប្រឈមខ្លាំងបំផុត ជាមួយនឹងការឡើងតម្លៃប្រេង និងតម្លៃហ្កាស ក្នុងពេលបច្ចុប្បន្ននេះ។ ប្រេងនិងហ្កាស ដែលអឺរ៉ុបទិញក្នុងទំហំធំ ពីរុស្ស៊ី ហើយដែលមតិខ្លះ បានអំពាវនាវ ឲ្យអឺរ៉ុបត្រូវតែធ្វើពហិការ ឈប់យកលុយរាប់ពាន់លានទៅចិញ្ចឹមរុស្ស៊ី តទៅទៀត។ តែយ៉ាងណា ទាក់ទិននឹងបញ្ហាហ្កាស គឺអឺរ៉ុបពិតជាមិនអាច បំរាស់ខ្លួនពីរុស្ស៊ីបានងាយៗឡើយ ដោយសារតែពុំទាន់អាចមាន អ្នកផ្គត់ផ្គង់ណាផ្សេង ក្រៅពីរុស្ស៊ី។ ប្រទេសខ្លះ ដូចជាអាល្លឺម៉ង់ អូទ្រីស ហុងគ្រីជាដើម រំពឹងខ្លាំងណាស់ លើថាមពលហ្កាសនាំចូលពីរុស្ស៊ី។
យ៉ាងណាក៏ដោយ អឺរ៉ុបកំពុងតែព្យាយាមចរចា ជាមួយប្រទេសផលិតផ្សេងទៀត ដូចជាកាតា សហរដ្ឋអាមេរិក និង អាល់ហ្សេរីជាដើម ដើម្បីទិញហ្កាសរាវពីប្រទេសទាំងនោះ មកបំពេញបន្ថែម ជំនួសហ្កាសរបស់រុស្ស៊ី។ តែអឺរ៉ុប ត្រូវតែពន្លឿនការសាងសង់ ហេដ្ឋារចនាសម្ព័ន្ធស្តុកទុកហ្កាសរាវ ឲ្យបានច្រើនជាងនេះ។ អាមេរិក បានសន្យាថាគេនឹងប្រឹងប្រែងបន្ថែមការផលិតហ្កាសរាវ ដើម្បីផ្គត់ផ្គង់ឲ្យអឺរ៉ុប។ ដោយឡែក សម្រាប់ពេលនេះ គ្មានការព្រមព្រៀងណាមួយ ក្នុងក្រមខណ្ឌអឺរ៉ុប ទាល់ទិននឹងការកំណត់អត្រាអតិបរមា នៃតម្លៃថាមពល និងការសម្រេចធ្វើពហិការ ឈប់ទិញប្រេងរបស់រុស្ស៊ីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ