លោកពូទីនថាអ្នកទិញឧស្ម័នពីរុស្ស៊ី ចាំបាច់ត្រូវតែបង់លុយជារូប្លិ៍
នៅថ្ងៃពុធទី ២៣មីនា ២០២២ លោកប្រធានាធិបតីរុស្ស៊ី វ្លាដេមៀ ពូទីន បានប្រកាសថា រុស្ស៊ី នឹងលែងលក់ឧស្ម័នឱ្យសហភាពអឺរ៉ុប ដោយគិតជាលុយដុល្លារ ឬលុយអឺរ៉ូទៀតហើយ។ អ្នកទិញឧស្ម័ន ឬប្រេងពីរុស្ស៊ី ចាំបាច់ត្រូវបង់ជាលុយរូប្លិ៍។ ធនាគារកណ្តាលរុស្ស៊ីមានពេលមួយសប្តាហ៍ ក្នុងការរៀបចំប្រព័ន្ធចាយលុយរូប្លិ៍នេះ។
ចុះផ្សាយនៅថ្ងៃ៖
ស្តាប់ - ០២:០២
គ្មានន័យអ្វីទៀតទេ ដែលរុស្ស៊ីត្រូវទូទាត់ការលក់ទំនិញទៅឱ្យសហរដ្ឋអាមេរិកនិងសហភាពអឺរ៉ុបជាលុយដុល្លារឬអឺរ៉ូនោះ។ ប្រទេសដែលមិនមែនជាមិត្តនឹងរុស្ស៊ី ត្រូវបង់ជាលុយរូប្លិ៍នៅពេលទទួល ប្រេងឬឧស្ម័ន ព្រោះរុស្ស៊ីលែងទូទាត់ជាលុយផ្សេងទៀតហើយ។ នេះជាប្រសាសន៍របស់លោកពូទីន ដោយបានពន្យល់លម្អិតថា រុស្ស៊ីសម្រេចចិត្តយ៉ាងដូច្នេះដើម្បីឆ្លើយតបទៅនឹងទណ្ឌកម្ម របស់ក្រុមប្រទេសដែលបានបង្កកទ្រព្យធនរុស្ស៊ីចំនួន ៣០០ពាន់លានដុល្លារនៅបរទេស ក្រោយពីរុស្ស៊ីចេញធ្វើប្រតិបត្តិការយោធានៅអ៊ុយក្រែន។ ប្រទេសអមិត្តរបស់រុស្ស៊ី ដែលតំណាងឱ្យជាង៧០%នៃការនាំចេញថាមពលរុស្ស៊ី រួមមាន សហរដ្ឋអាមេរិក សហភាពអឺរ៉ុប (២៧ប្រទេស) អង់គ្លេស ជប៉ុន កាណាដា ន័រវែស សិង្ហបុរី កូរ៉េខាងត្បូង ស្វីស និងអ៊ុយក្រែន។
មិនតែប៉ុណ្ណោះ រុស្ស៊ីបានព្រលយឱ្យដឹងទៀតថា រាល់ការទិញដូរទំនិញផ្សេងជាមួយរុស្ស៊ី ក៏អាចនឹងត្រូវបង់ជាលុយរូប្លិ៍ដែរ។ លោកពូទីន បានស្នើសុំឱ្យធនាគារកណ្តាល និងរដ្ឋាភិបាលរុស្ស៊ី ចាត់ចែងរៀបចំប្រព័ន្ធចាយជាលុយរូប្លិ៍ ដ៏ច្បាស់លាស់ មានតម្លាភាព និងជាការទិញដូរលុយរូប្លិ៍នៅលើទីផ្សារប្តូរប្រាក់ ឱ្យហើយនៅមួយសប្តាហ៍ទៀត។ រុស្ស៊ីស្រមៃនិងសិក្សាជាច្រើនឆ្នាំមកហើយ រកវិធីកាត់បន្ថយការចាយលុយដុល្លារ ដើម្បីកុំឱ្យសេដ្ឋកិច្ចខ្លួនរងហានិភ័យពេកពេលមានទណ្ឌកម្មអន្តរជាតិ។
បើគ្មានប្រេងនិងឧស្ម័នរុស្ស៊ី នោះតម្លៃថាមពលនឹងឡើងថ្លៃកប់ពពកជាក់ជាពុំខាន។ នេះជាការព្យាកររបស់លោក Alexandre Novak ឧបនាយករដ្ឋមន្ត្រីទទួលបន្ទុកផ្នែកថាមពល។ ចំណែកសភារុស្ស៊ី បានចាត់ទុកសេចក្តីសម្រេចរបស់លោកពូទីន ថាជំហានប្រវត្តិសាស្ត្រឆ្ពោះទៅរកការរំដោះសេដ្ឋកិច្ចរុស្ស៊ីពីលុយដុល្លារ។
នៅលើទីផ្សារមូលប័ត្រវិញ គ្រាន់តែចប់ប្រសាសន៍លោកពូទីន លុយរូប្លិ៍ដែលបានធ្លាក់ថ្លៃជាគំហុកអស់ជាង២០% តាំងពីថ្ងៃទី ២៤កុម្ភៈមក ស្រាប់តែស្ទុះឡើងថ្លៃវិញ ប្រមាណ៧,៧%ភ្លាមមួយរំពេចនៅចំពោះមុខលុយដុល្លារនិងអឺរ៉ូ។ ប្រេងបានឡើងថ្លៃ១២០ដុល្លារក្នុងមួយធុងបារីល។
ជាប្រតិកម្មតប ប្រធានាធិបតីអ៊ុយក្រែនបានប្រកាសថ្កោលទោសរុស្ស៊ីថាកំពុងដឹកនាំធ្វើសង្គ្រាមសេដ្ឋកិច្ច។ ជាការផ្តាច់ និងរំលោភកិច្ចសន្យាទិញ ! នេះជាពាក្យរិះគន់របស់អាល្លឺម៉ង់ដែលរំពឹងលើឧស្ម័នរុស្ស៊ីខ្លាំងគេក្នុងចំណោមអឺរ៉ុប។
សូមរំលឹកថា តាំងពីរុស្ស៊ីចូលឈ្លានពានអ៊ុយក្រែនមក ថ្វីបើសហរដ្ឋអាមេរិកបានដាក់ទណ្ឌកម្មរុស្ស៊ីដោយសម្រេចឈប់នាំចូលប្រេងនិងឧស្ម័នពីរុស្ស៊ីមែន តែហ្កាសនិងប្រេងបន្តហូរចូលសហភាពអឺរុបដែលរំពឹងខ្លាំងលើការនាំឧស្ម័នពីរុស្ស៊ីដដែល។ ប៉ុន្តែសហភាពអឺរ៉ុប ក៏កំពុងពិចារណាដាក់ទណ្ឌកម្មលើប្រេងរុស្ស៊ីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ