សង្គ្រាមអ៊ុយក្រែន ៖ អ្នកកាសែតអាមេរិកម្នាក់ស្លាប់ ម្នាក់របួសនៅ ជិតក្រុងកៀវ
រងរបួស ជួបគ្រោះថ្នាក់ដល់ជីវិត នេះជាហានិភ័យដ៏ធំមួយសម្រាប់អ្នកកាសែតដែលចុះផ្ទាល់លើសមរភូមិប្រយុទ្ធ ! ដោយចៀសមិនរួច នៅថ្ងៃអាទិត្យទី ១៣មីនា ត្រូវថ្ងៃទី១៨នៃសង្គ្រាមនៅអ៊ុយក្រែន មានអ្នកកាសែតអាមេរិកម្នាក់ បានស្លាប់ និងម្នាក់រងរបួស នៅពេលចុះទៅយកព័ត៌មាននៅ Irpin តំបន់ជាយក្រុងកៀវ ទីដែលមានការវាយប្រយុទ្ធគ្នាយ៉ាងសន្ធោសន្ធៅ។
ចុះផ្សាយនៅថ្ងៃ៖
អាយុ៥០ឆ្នាំ ជាអ្នកថតរូប និងជាសមិទ្ធិករឯករាជ្យ លោក Brent Renaud បានក្លាយជាអ្នកកាសែតបរទេសទីមួយដែលស្លាប់ក្នុងសង្គ្រាមឈ្លានពានរុស្ស៊ីលើអ៊ុយក្រែន។ លោក Brent Renaud ក៏ជាអ្នកនិពន្ធនិងបានថតភាពយន្តឯកសារជាច្រើន ព្រមទាំងបានធ្វើការលើគម្រោងនិងប្រធានបទជាច្រើនផ្សេងទៀត ដូចជាវិបត្តិអន្តោប្រវេសន៍នៅអាមេរិក កណ្តាល វិបត្តិនយោបាយនៅអេហ្ស៊ីប ការប្រយុទ្ធប្រឆាំងនឹងភាពជ្រុលនិយមនៅអាហ្វ្រិកនិងនៅតំបន់ដើមបូព៌ា។ ហើយថ្មីៗនេះលោកបានធ្វើការច្រើនជុំវិញបាតុកម្មរបស់ចលនាBlack Lives Matter ដែលមានផ្សព្វផ្សាយដោយBoston Globe។
ជាអ្នកកាសែតថតរូបប្រកបដោយទេពកោសកល្យ និងធ្លាប់ធ្វើការឱ្យកាសែតNew York Times លោករឺណូ បានស្លាប់ក្នុងពេលចុះទៅថតរូប ឱ្យTime Studio លើគម្រោងស្តីពីជនភៀសខ្លួនអ៊ុយក្រែន។
គ្រោះថ្នាក់បានកើតឡើងនៅរសៀលថ្ងៃអាទិត្យ ទី ១៣មីនា ពេលលោក រឺណូ និងអ្នកកាសែតអាមេរិកម្នាក់ទៀត កំពុងជិះឡានជាមួយជនស៊ីវិលអ៊ុយក្រែន។ លោករឺណូត្រូវគ្រាប់ចំកញ្ចឹងក ហើយបានស្លាប់ភ្លាមមួយរំពេច។
លោក Juan Arredondo អ្នកកាសែតម្នាក់ទៀតដែលរងរបួស បានរៀបរាប់ហេតុការណ៍តាមរយៈវីដេអូផ្សាយក្នុងបណ្តាញសង្គម ថាពួកគាត់បានចេញទៅថតជនភៀសខ្លួនដែលកំពុងនាំគ្នារត់ចេញពីតំបន់រងការវាយប្រហារ។ គ្រាន់តែរថយន្តឆ្លងប៉ុស្តិ៍ត្រួតពិនិត្យរួច ស្រាប់តែគ្រាប់ប្រសាចបាញ់សំដៅពួកគេ មិនដឹងមកពីទិសណាឱ្យប្រាកដទេ។
អាជ្ញាធរអ៊ុយក្រែនបានធ្វើការចោទប្រកាន់ភ្លាមថាទាហានរុស្ស៊ីជាអ្នកបាញ់លើអ្នកកាសែតអាមេរិក។ ទីប្រឹក្សាសន្តិសុខរបស់ប្រធានាធិបតីអាមេរិកបានថ្កោលទោសទង្វើបាញ់ប្រហារលើអ្នកកាសែត និងបានជំរុញឱ្យកងកម្លាំងរុស្ស៊ីបញ្ឈប់សកម្មភាពហិង្សាលើប្រជាជនស៊ីវិលនិងអ្នកកាសែត។
កាលពីថ្ងៃទី ១មីនា អ្នកកាសែតជនជាតិអ៊ុយក្រែនម្នាក់បានស្លាប់ដោយត្រូវគ្រាប់ផ្លោងរបស់រុស្ស៊ី បាញ់មកលើទីតាំងទូរទស្សន៍ជាតិអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ