កូវីដ១៩ ៖ បារាំងចាប់ដកវិធានការប្រឆាំងកូវីដស្ទើរទាំងស្រុង
ក្នុងខណៈដែលចិនចាប់ផ្តើមបិទខ្ទប់ក្រុង សាលារៀន រោងចក្រ ...ដើម្បីទប់ស្កាត់រលកចម្លងថ្មីនៃមេរោគកូវីដបំប្លែងខ្លួនអូមីក្រុង នៅប្រទេសបារាំង ប្រជាពលរដ្ឋទូទៅអាចដោះម៉ាស់ និងចូលអាហារដ្ឋានដោយមិនបាច់បង្ហាញបណ្ណវ៉ាក់សាំង ចាប់ពីថ្ងៃចន្ទទី ១៤មីនានេះតទៅ។ បារាំងលើកបម្រាមសំខាន់ៗចោលស្ទើរទាំងស្រុងមែន ប៉ុន្តែអាជ្ញាធរនៅតែអំពាវនាវឱ្យពលរដ្ឋគ្រប់គ្នាបន្តរក្សាការប្រុងប្រយ័ត្ន ខ្លាចមានរលកចម្លងថ្មីមកលងទៀត។
ចុះផ្សាយនៅថ្ងៃ៖
ចាប់ពីថ្ងៃចន្ទទី ១៤មីនានេះតទៅ គេអាចឃើញមុខមិត្តរួមការងារ មិត្តរួមថ្នាក់ មុខគ្រូបង្រៀន បានដោយពេញភ្នែកវិញហើយ។ វិធានការកូវីដរយៈពេលពីរឆ្នាំកន្លងមកនេះ ត្រូវបានលើកចេញស្ទើរតែទាំងអស់។ លែងមានហើយកាតព្វកិច្ចត្រូវពាក់ម៉ាស់ នៅពេលឡើងហាង ចូលរោងកុន-រោងល្ខោន ឬទៅផ្សារ ...។ សម្រាប់អ្នកដែលចង់ គេអាចដោះម៉ាសដើរហើរដោយសេរីបាន។
ប៉ុន្តែនៅសល់វិធានការមួយចំនួនតូចដែលបារាំងបន្តអនុវត្ត គឺកាតព្វកិច្ចពាក់ម៉ាស នៅពេលធ្វើដំណើរតាមមធ្យោបាយដឹកជញ្ជូនសាធារណៈ (ឡានក្រុង រថភ្លើង ...) និងនៅក្នុងស្ថាប័នសុខាភិបាល (មន្ទីរពេទ្យ មណ្ឌលសុខភាព គ្លីនិក ...)។ ក្រុមហ៊ុនសហគ្រាស អាចសម្រេចចិត្តបង្ខំឱ្យបុគ្គលិកបន្តពាក់ម៉ាសទៀតបាន។ ហើយក្រសួងសុខាភិបាលផ្តល់អនុសាសន៍ឱ្យតាមដានករណីជាប់ព័ន្ធនឹងអ្នកវិជ្ជមានកូវីដចំនួន៧ថ្ងៃ គិតចាប់ពីថ្ងៃរកឃើញអ្នកមានផ្ទុកមេរោគកូវីដមក។
រដ្ឋាភិបាលសម្រេចផ្អាកលែងទាមទារឱ្យពលរដ្ឋបង្ហាញបណ្ណសុខភាព (បណ្ណចាក់វ៉ាក់សាំង)នៅពេលចូលក្នុងស្ថាប័នឬកន្លែងបិទជិត ចាប់ពីថ្ងៃចន្ទនេះទៅដែរមែន តែពលរដ្ឋបារាំងមានកាតព្វកិច្ចត្រូវតែបង្ហាញបណ្ណ ឬលទ្ធផលតេស្តកូវីដអវិជ្ជមាន នៅពេលទៅពេទ្យ និងទៅមជ្ឈមណ្ឌលមនុស្សជរា។
ការដកចេញនូវវិធានការកូវីដបានទទួលស្វាគមន៍ជាទូទៅ ពីសំណាក់ប្រជាពលរដ្ឋនិងអ្នកនយោបាយគ្រប់និន្នាការ ប៉ុន្តែស្ថានភាពកូវីដហាក់កំពុងហក់ឡើងវិញ។ នៅថ្ងៃអាទិត្យទី ១៣មីនាម្សិលមិញ ចំនួនអ្នកឆ្លងថ្មីបានឡើងដល់ជាង៦ម៉ឺន៥ពាន់នាក់ ទល់នឹងជាង៥ម៉ឺននាក់ជាមធ្យមកាលពីសប្តាហ៍មុន។ បើតាមការព្យាករណ៍របស់វិទ្យាសា្ថនប៉ាស្ទ័រ ការលើកវិធានការអាចនឹងធ្វើឱ្យមានសន្ទុះចម្លងឡើងខ្លាំងដល់១០ម៉ឺននាក់ក្នុងមួយថ្ងៃផង នៅខែមីនានេះ។ ហេតុដូច្នេះហើយបានជារដ្ឋាភិបាល ក៏ដូចជាអ្នកវិទ្យាសាស្ត្រ ទទូចឱ្យគ្រប់គ្នាបន្តរក្សាការប្រុងប្រយ័ត្ន និងផ្តល់អនុសាសន៍ឱ្យមនុស្សចាស់អាយុលើស៨០ឆ្នាំ និងអ្នកមានប្រព័ន្ធការពារខ្លួនទន់ខ្សោយ ទៅចាក់ថ្នាំបង្ការដូសទីបួន និងបន្តពាក់ម៉ាស់ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ