ទោសប្រហារជីវិតនៅតែបន្តអនុវត្តក្នុងប្រទេសខ្លះនៅលើពិភពលោក
គិតមកទល់ពេលនេះ មានរដ្ឋនិងប្រទេសចំនួន ប្រមាណ៥០ ដែលបន្តអនុវត្តទោសប្រហារជីវិត ក្នុងនោះមានឈ្មោះប្រទេសអារ៉ាប៊ីសាអូឌីតមួយដែរ ដែលទើបបានប្រហារជីវិតអ្នកទោសដល់ទៅ៨១នាក់ក្នុងថ្ងៃសោរ៍ទី១២មីនា២០២២។ បើតាមអង្គការការពារសិទ្ធិមនុស្ស amnesty international វិធីប្រហារជីវិតអ្នកទោសមានច្រើនបែប។ តែមានប្រទេសភាគតិចទេ បន្តប្រើ។
ចុះផ្សាយនៅថ្ងៃ៖
ស្តាប់ - ០២:១៨
ជាសរុប២/៣នៃប្រទេសនៅពិភលោក លែងអនុវត្តទោសប្រហារជីវិត ក្នុងនោះមានប្រទេសជាង១០០ បានរំលាយច្បាប់ប្រហារជីវិត សម្រាប់គ្រប់បទឧក្រិដ្ឋទាំងអស់ និង ១៤៧ប្រទេសលែងប្រើទោសប្រហារជីវិត តាមផ្លូវច្បាប់និងដោយជាក់ស្តែង។ នេះបើតាមអង្គការការពារសិទ្ធិមនុស្សAmnesty International ដែលបានបញ្ជាក់ទៀតថា កាហ្សក់ស្ថាន ម៉ាឡាវី បន្តដោយសៀរ៉ាឡេអូនកាលពីខែតុលា២០២១ ជាប្រទេសចុងក្រោយដែលបានសម្រេចលុបចោលទោសប្រហារជីវិត។
នៅក្នុងឆ្នាំ២០២១ដដែល រដ្ឋVirginia ជារដ្ឋទី២៣របស់សហរដ្ឋអាមេរិកដែលបានរំលាយច្បាប់ប្រហារជីវិត។ ជាសេចក្តីសម្រេចគួរឱ្យកត់សម្គាល់ខ្លាំងណាស់ ព្រោះរដ្ឋនេះមានទម្លាប់ប្រហារជីវិតអ្នកទោសច្រើនជាងគេក្នុងប្រវត្តិអាមេរិក។ នៅលើទ្វីបអាហ្វ្រិកវិញ ជាង៣០ប្រទេសមានច្បាប់ប្រហារជីវិត ប៉ុន្តែជិតពាក់កណ្តាលមិនបានផ្តាច់ជីវិតអ្នកជាប់ទោសទេ នារយៈពេលប៉ុន្មានឆ្នាំចុងក្រោយមកនេះ។
បើតាម Amnesty International ដែលចេញរបាយការណ៍ចុងក្រោយដោយផ្អែកលើទិន្នន័យឆ្នាំ២០២០ មានទណ្ឌិតចំនួនយ៉ាងហោចណាស់៤៨៣នាក់បានទទួលទោសប្រហារជីវិត ក្នុង១៨ប្រទេស។ ជាចំនួនថយចុះបើប្រៀបទៅឆ្នាំ២០១៩ និងជាការថយចុះជាលំដាប់ ហើយទាបបំផុត គិតចាប់តាំងពីឆ្នាំ២០១៥មក។ ប៉ុន្តែ Amnesty International មិនបានរាប់បញ្ចូលករណីប្រហារជីវិត ដែលទំនងអាចកើតមានដែរនៅក្នុងប្រទេសចិនទេ។ នៅចិន កូរ៉េខាងជើង ឬវៀតណាម ទិន្នន័យប្រហារជីវិតអ្នកទោសជាកិច្ចការសម្ងាត់រដ្ឋ។ ចំនួនអ្នកទោស រង់ចាំថ្ងៃទទួលទោសក៏បានធ្លាក់ចុះដែរ គឺប្រមាណតែ១៤៤៧នាក់ នៅឆ្នាំ២០២០ ទល់នឹង២៣០៧នាក់ កាលពីមួយឆ្នាំមុន។ នេះបើតាមAmnesty International ដដែល ដែលយល់ថា ការធ្លាក់ចុះនេះ មួយផ្នែកបណ្តាលមកពីប្រព័ន្ធតុលាការជួបភាពរអាក់រអួលនិងរំខានដោយកូវីដ១៩។
ប៉ុន្តែទិន្នន័យនៃការប្រហារជីវិតអ្នកទោស អាចនឹងកើនឡើងវិញ ព្រោះអារ៉ាប៊ីសាអូឌីត បានបង្កើនការអនុវត្តទោសប្រហារជីវិតឡើងវិញ (៦៩នាក់ និងកាលពីឆ្នាំ២០២១ -១១នាក់កាលពីដើមឆ្នាំ២០២២ និង៨១នាក់នៅថ្ងៃសៅរ៍ទី ១២មីនា២០២២)។ បន្ទាប់ពីផ្អាកអស់រយៈពេលជាច្រើនឆ្នាំ ឥណ្ឌា អូម៉ង់ កាតា អេហ្ស៊ីប បានចាប់ផ្តើមប្រហារជីវិតអ្នកទោសដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ