រុស្ស៊ីទម្លាក់គ្រាប់លើមន្ទីរពេទ្យកុមារ នៅក្រុងម៉ារីយូប៉ូល បង្កឲ្យមានការថ្កោលទោស
កាលពីល្ងាចថ្ងៃពុធទី៩មីនា អាគារមន្ទីរសម្ភព និងមន្ទីរពេទ្យកុមារមួយកន្លែង នៅទីក្រុងម៉ារីយូប៉ូល ត្រូវបានកម្ទេចដោយគ្រាប់មីស៊ីលរបស់រុស្ស៊ី។ យោងតាមការអះអាង នៅលើបណ្តាញ Telegram ផ្លូវការ របស់សាលាក្រុងម៉ារីយូប៉ូល យ៉ាងហោចណាស់ មានមនុស្ស៣នាក់ស្លាប់ ក្នុងនោះមានក្មេងស្រីតូចម្នាក់ និងបុគ្គលិកពេទ្យ១៧នាក់ រងរបួសធ្ងន់។ រដ្ឋាភិបាលប្រទេសលោកខាងលិច បានប្រកាសថ្កោលទោស ចំពោះអំពើដ៏ព្រៃផ្សៃគ្មានធម៌មេត្តានេះ របស់កងទ័ពរុស្ស៊ី។
ចុះផ្សាយនៅថ្ងៃ៖
ស្តាប់ - ០២:៣២
ក្រោយហេតុការណ៍ មន្ទីរពេទ្យកុមារបានរងគ្រាប់មីស៊ីលរុស្ស៊ីកាលពីល្ងាចថ្ងៃពុធ លោកវ្លូឌីមៀរ ហ្សេឡេនស្គី បានបង្ហោះសារវីដេអូ ថ្កោលទោសការទម្លាក់គ្រាប់បែករបស់រុស្ស៊ីនេះ ថាជា « ឧក្រិដ្ឋកម្មសង្គ្រាម » បង្កឡើងដោយកងទ័ពរុស្ស៊ី។ លោកបានចែករំលែកវីដេអូ ដែលក្នុងនោះគេឃើញ ក្រុមសង្គ្រោះកំពុងព្យាយាមជួយស្ត្រីពពោះ ខ្លះពរកូនខ្ចី ដែលរងរបួស ចាកចេញពីគំនរបាក់បែករបស់អាគារ ក្រោយពេលរងគ្រាប់មីស៊ីល។ មន្ត្រីរដ្ឋបាលយោធាម្នាក់នៃតំបន់ដូនេតស៍ បានអះអាងថា ក្នុងពេលគ្រាប់បែកធ្លាក់ចំអាគារនេះ គឺមានស្ត្រីខ្លះកំពុងតែសម្រាលកូនថែមទៀតផង។
នៅព្រឹកថ្ងៃព្រសហ្បតិ៍ លោកGabriel Attal អ្នកនាំពាក្យរដ្ឋាភិបាលបារាំង បានចាត់ទុកថា ការទម្លាក់គ្រាប់បែករបស់រុស្ស៊ី លើមន្ទីរពេទ្យកុមារនៅក្រុងម៉ារីយូប៉ូលនេះ គឺជាអំពើអមនុស្សធម៌ និងកំសាកបំផុត។ ស្ត្រី ទារក កុមារ និងក្រុមគ្រូពេទ្យ បានក្លាយជាគោលដៅនៃការវាយប្រហាររបស់កងទ័ពរុស្ស៊ី។ ដូចគ្នាដែរ រដ្ឋាភិបាលអាមេរិក និង អង់គ្លេស បានចេញសេចក្តីថ្លែងការ ចាត់ទុកការវាយប្រហារលើមន្ទីរពេទ្យកុមារនេះ ថាជាអំពើ ឃោរឃៅព្រៃផ្សៃ បំផុត របស់កងទ័ពរុស្ស៊ី។
ដោយឡែក ក្រសួងការពារជាតិរុស្ស៊ី មិនបានបដិសេធ ច្រានចោលដំណឹងនេះទេ តែបានរុញការទទួលខុសត្រូវទៅលើកងទ័ពអ៊ុយក្រែន។ ភាគីរុស្ស៊ីអះអាងថា គឺកងទ័ពអ៊ុយក្រែន ដែលបានយកអាគារមន្ទីរពេទ្យនេះ ជាទីតាំងបាញ់តបមកលើកងទ័ពរុស្ស៊ី។
គួរបញ្ជាក់ថា អស់រយៈពេលប្រមាណ១០ថ្ងៃហើយ ដែលទីក្រុងម៉ារីយូប៉ូល ត្រូវបានកងទ័ពរុស្ស៊ីឡោមព័ទ្ធជិត និងបន្តទម្លាក់គ្រាប់បែកសឹងមិនលោះថ្ងៃ។ យោងតាមតួលេខរបស់សាលាក្រុងនេះ គឺមានប្រជាជនស៊ីវីលស្លាប់ ចំនួន ១២០៧នាក់ គិតត្រឹមថ្ងៃពុធទី៩មីនា។ ដោយឡែក តួលេខបូកសរុបរបស់អង្គការសហប្រជាជាតិ នៅព្រឹកថ្ងៃពុធ ស្រាប់ភាគីអ៊ុយក្រែន គឺមានប្រជាជនស៊ីវីល ស្លាប់ចំនួន ៥១៦នាក់ និងទាហានស្លាប់៨០០នាក់ នៅទូទាំងប្រទេសអ៊ុយក្រែន។ សង្គ្រាមឈ្លានពានរបស់រុស្ស៊ី២សប្ដាហ៍មកនេះ បានរុញច្រានឲ្យប្រជាជនអ៊ុយក្រែន ជាង២លាននាក់ហើយ ត្រូវរត់ភៀសខ្លួន។
គួរកត់សំគាល់ថា ប្រតិបត្តិការសម្រុកវាយប្រហាររបស់កងទ័ពរុស្ស៊ីនៅតែបន្ត នៅតាមទីក្រុងនានា បើទោះបីថ្ងៃព្រហស្បតិ៍ទី១០មីនានេះ រដ្ឋមន្ត្រីការបរទេសរុស្ស៊ី នឹងត្រូវជួបចរចាគ្នាជាមួយរដ្ឋមន្ត្រីការបរទេសអ៊ុយក្រែនក៏ដោយ។ អគ្គបញ្ជាការកងទ័ពអ៊ុយក្រែន បានឲ្យដឹងថា ក្បួនរថក្រោះ និងទាហានរុស្ស៊ី បានរំកិលជិតដល់ទីក្រុងកៀវហើយ នៅចំងាយតែ១៥គីឡូម៉ែត្រប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ