សង្រ្គាមអ៊ុយក្រែន៖ បារាំងអំពាវនាវឲ្យអូតង់បង្ហាញឯកភាពគ្នាជាធ្លុងមួយដើម្បីការពារសម្ព័ន្ធមិត្ត
បារម្ភខ្លាចរងចំហាយសង្រ្គាមឈ្លានពានរបស់រុស្ស៊ី នៅអ៊ុយក្រែន អូតង់បានបង្កើនកម្លាំង ពង្រឹងសមត្ថភាពយោធា នៅតាមប្រទេសសមាជិក ក្នុងតំបន់អឺរ៉ុបខាងកើត។ នៅថ្ងៃអាទិត្យ នៅដំណើរទស្សនកិច្ចទៅកាន់មូលដ្ឋានទ័ពរបស់អូតង់ក្នុងប្រទេសរូម៉ានី ដែលមានព្រំដែនជាប់ប្រទេសអ៊ុយក្រែន រដ្ឋមន្រ្តីការពារបារាំង លោកស្រី Florence Parly បានអំពាវនាវឲ្យអូតង់បង្ហាញការរួបរួមដៃគ្នាជាធ្លុងមួយ ដើម្បីការពារសម្ព័ន្ធមិត្តរបស់ខ្លួន។
ចុះផ្សាយនៅថ្ងៃ៖
នៅចំពោះមុខសង្រ្គាមឈ្លានពានរបស់រុស្ស៊ី ទៅលើប្រទេសអ៊ុយក្រែន សម្ព័ន្ធអាត្លង់ទិកអូតង់បានប្រកាន់ជំហរនៅស្ងៀម គ្មានធ្វើអន្តរាគមជួយអ៊ុយក្រែន ព្រោះអ៊ុយក្រែនមិនមែនជាសមាជិករបស់អូតង់។ ប៉ុន្តែ អូតង់ត្រូវបង្ហាញជំហរ រួបរួមគ្នា ដោយគ្មានថ្លោះធ្លោយ ដើម្បីការពារប្រទេសសមាជិករបស់សម្ព័ន្ធអាត្លង់ទិក។ នេះជាប្រសាសន៍របស់រដ្ឋមន្រ្តីការពារជាតិបារាំង លោកស្រី Florence Parly នៅចំពោះមុខទាហានអូតង់ជាង ១ពាន់នាក់ មកពី ៧ប្រទេស ដែលកំពុងឈរជើង ប្រចាំការ នៅមូលដ្ឋានទ័ព ក្នុងប្រទេសរូម៉ានី។
សម្រាប់ប្រមុខការពារជាតិបារាំង ការពង្រាយទ័ពរបស់អូតង់ នៅតាមបណ្តាប្រទេសសមាជិកមិនមែនដើម្បីវាយប្រហារ ប៉ុន្តែ ការពារខ្លួន។ សម្ព័ន្ធអាត្លង់ទិកមិនមែនជាគ្រោះថ្នាក់ គំរាមកំហែងរុស្ស៊ី។ អឺរ៉ុបមិនបានគំរាមកំហែងរុស្ស៊ី។ គ្មានអ្នកណាម្នាក់ដែលគំរាមរុស្ស៊ី។ ប៉ុន្តែ វាជាកាតព្វកិច្ចរបស់អូតង់ របស់អឺរ៉ុប ដើម្បីបង្ហាញទៅរុស្ស៊ីថា នៅពេលនិយាយពីការពារប្រទេសសមាជិក អូតង់គឺរួបរួមស្រាក់ដៃគ្នាជាធ្លុងមួយ។
មានវត្តមាន នៅក្នុងពិធីជួបជុំជាមួយទាហានអូតង់ ប្រធានាធិបតី រូម៉ានីលោក Klaus Lohannis បាននិយាយថា អូតង់គឺជាខែលការពារតម្លៃ អឺរ៉ុប អាត្លង់ទិក។ រដ្ឋមន្រ្តីការពារជាតិបារាំងធ្វើដំណើរទៅប្រទេសរូម៉ានី នៅថ្ងៃអាទិត្យ នៅបន្ទាប់ពីបារាំងបញ្ជូនទាហានជំនាញខាងជិះស្គី និងកងទ័ពជើងអាកាសជិត៥០០នាក់ទៅចូលរួមពង្រឹងកម្លាំងទ័ពអូតង់ ក្នុងទឹកដីរូម៉ានី នៅក្រោយរុស្ស៊ីធ្វើសង្រ្គាមឈ្លានពានអ៊ុយក្រែន។
នៅមូលដ្ឋានទ័ពរបស់អូតង់ នៅប្រទេសរូម៉ានី ដែលស្ថិតនៅចម្ងាយ ២០០គីឡូម៉ែត្រ ពីព្រំដែនអ៊ុយក្រែន មានប្រចាំការ កងទ័ពបារាំង បែលហ្ស៊ិក រូម៉ានី ហូឡង់ អ៊ីតាលី អាល្លឺម៉ង់ និង កងទ័ពអាមេរិកាំងជាង ១ពាន់នាក់ ដែលបានធ្វើដំណើរទៅ រូម៉ានី តាំងពី ខែ កុម្ភៈ។
នៅរូម៉ានី បារាំងនិងបែលហ្សិក គ្រោងនឹងដាក់ទ័ពប្រចាំការយូរអង្វែង ដូចដែលអូតង់កំពុងធ្វើនៅ ភាគខាងជើងអឺរ៉ុប ដូចជានៅ ប៉ូឡូញ នៅក្រុមប្រទេសសមុទ្របាល់ទិក ពោលគឺដើម្បីពង្រឹងការពារសមាជិករបស់អូតង់ នៅភាគខាងត្បូង។
ដោយឡែក ទាក់ទងនឹងប្រទេសអ៊ុយក្រែន រដ្ឋមន្រ្តីការបរទេសអាមេរិក លោកអង់តូនី ប្លីងកិនដែលកំពុងធ្វើទស្សនកិច្ចនៅប្រទេសម៉ុលដាវី ដែលស្ថិតនៅចន្លោះ អ៊ុយក្រែន និងរូម៉ានី បាននិយាយថា អាមេរិកកំពុងធ្វើការយ៉ាងសកម្ម ដើម្បីបង្កើតកិច្ចព្រមព្រៀងជាមួយប៉ូឡូញ ដើម្បីបញ្ចុះបញ្ចូលឲ្យប៉ូឡូញ បញ្ជូនយន្តហោះចម្បាំង ទៅឲ្យកងទ័ពអ៊ុយក្រែន។
កាសែតប៉ូឡូញ ចុះផ្សាយនៅថ្ងៃអាទិត្យថា ទៅតាមកិច្ចព្រមព្រៀងជាមួយអាមេរិក ប៉ូឡូញ អាចបញ្ជូនយន្តហោះដែលផលិតឡើងនៅក្នុងសម័យសហភាពសូវៀត ទៅឲ្យកងទ័ពអ៊ុយក្រែនប្រើសម្រាប់ ប្រយុទ្ធទប់ទល់នឹងការវាយប្រហាររបស់កងទ័ពរុស្ស៊ី។ ជាថ្នូរមកវិញ ប៉ូឡូញនឹងទទួលបានយន្តហោះចម្បាំងអាមេរិក ប្រភេទ F-16មកប្រើជំនួសវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ