ឈ្វេងយល់ពីវិបត្តិអ៊ុយក្រែន៖ ចាប់ពីឯករាជ្យក្រោយដួលរលំសហភាពសូវៀត រហូតដល់ការឈ្លានពានរបស់រុស្ស៊ី
នៅថ្ងៃទី២៤ ខែកុម្ភៈ ឆ្នាំ២០២២ កងទ័ពរុស្ស៊ីបានចូលឈ្លានពានអ៊ុយក្រែន នាំទៅដល់ការប្រឈមមុខដាក់គ្នាដ៏ធំបំផុតមួយ រវាងរុស្ស៊ី និងលោកខាងលិច ចាប់តាំងពីក្រោយសង្គ្រាមត្រជាក់។ ខាងក្រោមនេះ គឺជាការសង្ខេបហេតុការណ៍សំខាន់ៗ ដើម្បីយល់អំពីវិបត្តិអ៊ុយក្រែននៅពេលនេះ។
ចុះផ្សាយនៅថ្ងៃ៖
ថ្ងៃទី១ធ្នូ ឆ្នាំ១៩៩១៖ អ៊ុយក្រែនប្រកាសឯករាជ្យ ក្រោយការដួលរលំនៃសហភាពសូវៀត។ គួរបញ្ជាក់ថា អ៊ុយក្រែន ក៏ដូចជា រុស្ស៊ីដែរ ធ្លាប់ជាសាធារណរដ្ឋមួយ ក្នុងចំណោមសាធារណរដ្ឋទាំង ១៥ ក្នុងសហភាពសូវៀត។
ថ្ងៃទី៥ធ្នូ ឆ្នាំ១៩៩៤៖ អ៊ុយក្រែនបានចុះហត្ថលេខាលើអនុស្សារណៈមួយ នៅក្នុងទីក្រុងប៊ុយដាប៉ែស ប្រទេសហុងគ្រី (Budapest Memorandum on Security Assurances) រួមជាមួយនឹងប្រទេសហត្ថលេខី ៣ផ្សេងទៀត គឺ រុស្ស៊ី សហរដ្ឋអាមេរិក និងអង់គ្លេស។ តាមរយៈអនុស្សារណៈនេះ អ៊ុយក្រែនសុខចិត្តបោះបង់ចោលអាវុធនុយក្លេអ៊ែរ ដែលបន្សល់ទុកពីសម័យសហភាពសូវៀត ដោយផ្ទេរទៅឲ្យរុស្ស៊ី។ ជាថ្នូរមកវិញ រុស្ស៊ី សហរដ្ឋអាមេរិក និងអង់គ្លេស ដែលសុទ្ធសឹងជាមហាអំណាចនុយក្លេអ៊ែរ បានសន្យាគោរពអធិបតេយ្យ និងបូរណភាពដែនដីរបស់អ៊ុយក្រែន។
ខែតុលា-ខែធ្នូ ឆ្នាំ២០០៤៖ ការបោះឆ្នោតប្រធានាធិបតី ដោយមានការប្រជែងគ្នា ពីបេក្ខជនចម្បងៗ ពីររូប គឺលោក វិចទ័រ យូឆិនកូ (Victor Yushchenko) ដែលមាននិន្នាការទៅរកលោកខាងលិច និងលោក វិចទ័រ យ៉ានូកូវិច (Victor Yanukovych) ដែលមាននិន្នាការទៅខាងរុស្ស៊ី។ នៅមុនពេលបោះឆ្នោត លោក វិចទ័រ យូឆិនកូ ត្រូវបានគេលួចដាក់ថ្នាំបំពុល ក៏ប៉ុន្តែ មិនស្លាប់ ហើយនៅតែអាចបន្តចូលរួមប្រកួតប្រជែងក្នុងការបោះឆ្នោត។ លោក វិចទ័រ យូឆិនកូ មានសំឡេងនាំមុខនៅជុំទីមួយ ក៏ប៉ុន្តែ ក្រោយពីឆ្លងកាត់បោះឆ្នោតជុំទីពីរ លោក វិចទ័រ យ៉ានូកូវិច ជាអ្នកបានទទួលជោគជ័យ។ បាតុកម្មតវ៉ាប្រឆាំងនឹងលទ្ធផលក៏បានផ្ទុះឡើង ដែលគេស្គាល់ជាទូទៅថាជា “បដិវត្តន៍ពណ៌ទឹកក្រូច” រហូតនាំទៅដល់ការបោះឆ្នោតឡើងវិញ ដោយនៅក្នុងការបោះឆ្នោតឡើងវិញនេះ លោក វិចទ័រ យូឆិនកូ បានឈ្នះឆ្នោតជាប្រធានាធិបតី។
ឆ្នាំ២០០៨៖ អ៊ុយក្រែន រួមជាមួយ ហ្សកហ្ស៊ី ស្នើសុំចូលជាសមាជិកបក្សសម្ព័ន្ធអូតង់។ នៅក្នុងជំនួបកំពូល ខែមេសា ឆ្នាំ២០០៨ នៅទីក្រុងប៊ុយការ៉េស (ប្រទេសរូម៉ានី) បក្សសម្ព័ន្ធអូតង់បានស្វាគមន៍បំណងចង់ចូលជាសមាជិករបស់ អ៊ុយក្រែន និងហ្សកស៊ី។ ក៏ប៉ុន្តែ ដោយមានការជំទាស់យ៉ាងខ្លាំងក្លាពីសំណាក់រុស្ស៊ី ហើយប្រទេសសំខាន់ពីរក្នុងអូតង់ គឺបារាំង និងអាល្លឺម៉ង់ ក៏មិនគាំទ្រ អូតង់បានបដិសេធមិនចាប់ផ្តើមផែនការប្រតិបត្តិ (Membership Action Plan) ទទួលអ៊ុយក្រែន និងហ្សកហ្ស៊ី ជាសមាជិកនោះទេ តែក្នុងពេលជាមួយគ្នា អូតង់ក៏មិនបិទទ្វារទាំងស្រុងនោះដែរ ដោយទុកលទ្ធភាពឲ្យអ៊ុយក្រែន ចូលជាសមាជិកនៅថ្ងៃណាមួយ។
ខែវិច្ឆិកាឆ្នាំ២០១៣៖ លោក វិចទ័រ យ៉ានូកូវិច ដែលបានឈ្នះឆ្នោតជាប្រធានាធិបតី កាលពីឆ្នាំ២០១០ ហើយដែលធ្លាប់បានសន្យាថានឹងបន្តនយោបាយរបស់លោក វិចទ័រ យូឆិនកូ នាំអ៊ុយក្រែនឲ្យមានទំនាក់ទំនងជាដៃគូជាមួយសហភាពអឺរ៉ុប ស្រាប់តែបានផ្លាស់ប្តូរនយោបាយមកវិញ ដោយបានលុបចោលគម្រោងចុះកិច្ចព្រមព្រៀងដៃគូជាមួយសហភាពអឺរ៉ុប (EU Association Agreement) ហើយចាប់ផ្តើមនាំអ៊ុយក្រែនឲ្យងាកទៅរករុស្ស៊ីវិញម្តង។ វិបត្តិផ្ទៃក្នុងអ៊ុយក្រែនក៏ចាប់ផ្តើមផ្ទុះឡើង រវាងអ្នកមាននិន្នាការទៅខាងអឺរ៉ុប និងអ្នកមាននិន្នាការទៅខាងរុស្ស៊ី។
ខែធ្នូឆ្នាំ២០១៣៖ ក្រុមអ្នកមាននិន្នាការទៅខាងអឺរ៉ុបបានចេញធ្វើបាតុកម្ម នៅទីលានម៉ៃដាន ក្នុងទីក្រុងកៀវ ដើម្បីប្រឆាំងនឹងនយោបាយនិយមរុស្ស៊ី របស់លោកប្រធានាធិបតី វីចទ័រ យ៉ានូកូវិច។
ខែកុម្ភៈឆ្នាំ២០១៤៖ ការប៉ះទង្គិចគ្នាដោយហិង្សា រវាងប៉ូលិស និងបាតុករប្រឆាំង បានបណ្តាលឲ្យមនុស្សជាច្រើននាក់ត្រូវបាត់បង់ជីវិត។ នៅថ្ងៃទី២២កុម្ភៈ សភាអ៊ុយក្រែនក៏បានបោះឆ្នោតទម្លាក់លោកវិចទ័រ យ៉ានូកូវិច ពីតំណែង។ ប៉ុន្មានម៉ោង មុនពេលសភាបោះឆ្នោត លោកវិចទ័រ យ៉ានូកូវិច បានរត់ភៀសខ្លួនចេញពីទីក្រុងកៀវ ទៅកាន់ទីក្រុងមួយទៀត នៅខាងកើតប្រទេស មុននឹងបន្តដំណើរទៅកាន់ប្រទេសរុស្ស៊ី។ ទាំងលោក វិចទ័រ យ៉ានូកូវិច និងលោកវ្ល៉ាឌីមៀរ ពូទីន បានចាត់ទុកការទម្លាក់លោកយ៉ានូកូវិចពីតំណែងជារដ្ឋប្រហារ។
ខែមីនាឆ្នាំ២០១៤៖ រុស្ស៊ីពង្រាយកងទ័ពនៅតំបន់គ្រីមេ ក្នុងហេតុផលថា ដើម្បីការពារប្រជាជនដើមកំណើតរុស្ស៊ី បន្ទាប់មក រៀបចំបោះឆ្នោតប្រជាមតិ ភ្ជាប់តំបន់គ្រីមេជាទឹកដីរបស់រុស្ស៊ី។ ការកាត់យកតំបន់គ្រីមេដោយរុស្ស៊ីត្រូវបានសហគមន៍អន្តរជាតិជាទូទៅ ចាត់ទុកថាជាទង្វើខុសច្បាប់ ហើយមហាសន្និបាតអ.ស.ប បានបោះឆ្នោតនៅឆ្នាំ២០១៤ ក្នុងសំឡេង ១០០ ទល់នឹង ១១ (១៣ប្រទេសអនុប្បវាទ) បដិសេធមិនទទួលស្គាល់ការបោះឆ្នោតប្រជាមតិនៅគ្រីមេ ហើយកំណត់ថា គ្រីមេនៅតែជាដែនដីមួយរបស់អ៊ុយក្រែន។ ចំណែកសហភាពអឺរ៉ុប និងសហរដ្ឋអាមេរិក ព្រមទាំងប្រទេសសម្ព័ន្ធមិត្តលោកខាងលិចបានដាក់ទណ្ឌកម្មលើរុស្ស៊ី ជុំវិញការកាត់យកតំបន់គ្រីមេ។
ខែមេសាឆ្នាំ២០១៤៖ សង្រ្គាមបានផ្ទុះឡើងនៅតំបន់ដុនបាស់ (Donbas) ខាងកើតអ៊ុយក្រែន ហើយក្រុមឧទ្ទាមផ្តាច់ខ្លួន ដោយមានការគាំទ្រពីសំណាក់រុស្ស៊ី បានប្រកាសបង្កើតរដ្ឋឯករាជចំនួនពីរដាច់ពីអ៊ុយក្រែន គឺ ដូណេតស្ក៍ (Donetsk) និង លូហាន់ស្ក៍ (Luhansk)។ ការបោះឆ្នោតប្រជាមតិបង្កើតរដ្ឋឯករាជទាំងពីរ ត្រូវបានរៀបចំធ្វើឡើង នៅថ្ងៃទី១១ ឧសភា ឆ្នាំ២០១៤។ ក៏ប៉ុន្តែ ក្រៅពីរុស្ស៊ី មិនមានប្រទេសណាផ្សេងទៀត ទទួលស្គាល់ការប្រកាសរដ្ឋឯករាជទាំងពីរនេះទេ។
ថ្ងៃទី២៥ ឧសភា ឆ្នាំ២០១៤៖ លោក ប៉េត្រូ ប៉ូរ៉ូឆិនកូ (Petro Poroshenko) បានជាប់ឆ្នោតជាប្រធានាធិបតីអ៊ុយក្រែន ហើយក្រោយមកបានប្រកាសបទឈប់បាញ់ជាឯកតោភាគី នៅតំបន់ដុនបាស់ ក៏ប៉ុន្តែ នៅលើដីជាក់ស្តែង ការវាយប្រយុទ្ធគ្នា រវាងកងកម្លាំងអ៊ុយក្រែន និងក្រុមផ្តាច់ទឹកដី នៅតែបន្ត។
ថ្ងៃទី៦ មិថុនា ឆ្នាំ២០១៤៖ នៅក្នុងឱកាសចូលរួមក្នុងពិធីរំឭកខួប ៧០ឆ្នាំ នៃប្រតិបត្តិការយោធានៅឆ្នេរណរម៉ង់ឌី (ប្រទេសបារាំង) លោកប្រធានាធិបតីបារាំង ហ្វ្រង់ស័រ ហូឡង់ លោកស្រីប្រមុខរដ្ឋាភិបាលអាល្លឺម៉ង់ អង់ហ្កេឡា មែរកិល លោកប្រធានាធិបតីរុស្ស៊ី វ៉្លាឌីមៀរ ពូទីន និងលោកប្រធានាធិបតីអ៊ុយក្រែន ប៉េត្រូ ប៉ូរ៉ូឆិនកូ បានជួបចរចាគ្នា ៤ភាគី ដែលក្រោយមកត្រូវបានគេស្គាល់ជាទូទៅថាជា “ទម្រង់ណរម៉ង់ឌី”។
ថ្ងៃទី២៧ មិថុនា ឆ្នាំ២០១៤៖ អ៊ុយក្រែនចុះកិច្ចព្រមព្រៀងដៃគូជាមួយសហភាពអឺរ៉ុប (EU Association Agreement) ដោយភ្ជាប់ជាមួយនោះ ក៏មានផងដែរ កិច្ចព្រមព្រៀងពាណិជ្ជកម្មសេរីអឺរ៉ុប-អ៊ុយក្រែន។ រុស្ស៊ីបានព្រមានចាត់វិធានការតប ប្រសិនបើកិច្ចព្រមព្រៀងនេះ បង្កនូវផលប៉ះពាល់អវិជ្ជមានណាមួយដល់សេដ្ឋកិច្ចរុស្ស៊ី។
ថ្ងៃទី៥ កញ្ញា ឆ្នាំ២០១៤៖ ក្រោមការសម្របសម្រួលរបស់បារាំង និងអាល្លឺម៉ង់ នៅក្នុងទម្រង់ណរម៉ង់ឌី អ៊ុយក្រែន រុស្ស៊ី មេដឹកនាំផ្តាច់ទឹកដីខាងកើតអ៊ុយក្រែន និងអង្គការសន្តិសុខនិងសហប្រតិបត្តិការអឺរ៉ុប (OSCE) បានចុះកិច្ចព្រមព្រៀង នៅក្នុងទីក្រុងមីនស្ក៍ (ប្រទេសបេឡារុស) ក្នុងគោលដៅឈានទៅបញ្ចប់សង្រ្គាមនៅខាងកើតអ៊ុយក្រែន។ ក៏ប៉ុន្តែ នៅលើសមរភូមិជាក់ស្តែង ការវាយប្រយុទ្ធគ្នា ថ្វីដ្បិតតែមានការថយចុះ តែនៅតែបន្តកើតមាន។
ថ្ងៃទី២៣ ធ្នូ ឆ្នាំ២០១៤៖ សភាអ៊ុយក្រែនបោះឆ្នោតទៅលើសេចក្តីសម្រេច ដែលបង្ហាញពីជំហរចង់ឲ្យអ៊ុយក្រែនចូលជាសមាជិកអូតង់។ រុស្ស៊ីរិះគន់ការបោះឆ្នោតនេះថា នឹងមិនជួយក្នុងការដោះស្រាយវិបត្តិ តែនឹងបង្កើតឲ្យមានបរិយាកាសប្រឈមមុខដាក់គ្នាកាន់តែខ្លាំង ក្នុងវិបត្តិអ៊ុយក្រែន។
ថ្ងៃទី១២ កុម្ភៈ ឆ្នាំ២០១៥៖ ក្រោយពីការវាយប្រយុទ្ធគ្នា នៅតែបន្តកើតមាន នៅខាងកើតអ៊ុយក្រែន ប្រទេសពាក់ព័ន្ធក្នុងកិច្ចព្រមព្រៀងមីនស្ក៍ ក៏បានជួបចរចាគ្នាម្តងទៀត ហើយឈានទៅកែសម្រួលកិច្ចព្រមព្រៀងចាស់ បង្កើតជាកិច្ចព្រមព្រៀងមីនស្ក៍ទី២ ដោយនៅក្នុងនោះ មានការចែងពីបទឈប់បាញ់ ការដកអាវុធធុនធ្ងន់ចេញពីសមរភូមិជួរមុខ ការដោះលែងអ្នកទោស ព្រមទាំងមានការសន្យារៀបចំឲ្យតំបន់ដុនបាស់ ទៅជាតំបន់ស្វ័យ័ត តែស្ថិតក្នុងដែនអធិបតេយ្យរបស់អ៊ុយក្រែន។ ក៏ប៉ុន្តែ សង្រ្គាមនៅខាងកើតអ៊ុយក្រែននៅតែបន្តកើតមាន ដោយឆ្លាស់គ្នា រវាងការវាយប្រយុទ្ធគ្នា និងការប្រកាសបទឈប់បាញ់ ជាច្រើនលើកជាច្រើនសារ។
ថ្ងៃទី២០ ឧសភា ឆ្នាំ២០១៩៖ លោក វ៉ូឡូឌីមៀរ ហ្សេឡេនស្គី (Volodymyr Zelensky) បានជាប់ឆ្នោតជាប្រធានាធិបតីអ៊ុយក្រែន ដោយយកឈ្នះលើលោក ប៉េត្រូ ប៉ូរ៉ូឆិនកូ។ លោក វ៉ូឡូឌីមៀរ ហ្សេឡេនស្គី ដែលជាតារាកំប្លែង ធ្លាប់ចំណាយពេលច្រើននៅក្នុងប្រទេសរុស្ស៊ី ហើយចេះនិយាយភាសារុស្ស៊ីយ៉ាងស្ទាត់ជំនាញផងនោះ ធ្លាប់បានសន្យា នៅក្នុងអំឡុងយុទ្ធនាការឃោសនាបោះឆ្នោតថា ក្រៅពីលុបបំបាត់អំពើពុករលួយក្នុងប្រទេស លោកក៏នឹងខិតខំប្រឹងប្រែងផងដែរបញ្ចប់ភាពតានតឹងជាមួយរុស្ស៊ី និងបញ្ចប់សង្រ្គាមនៅខាងកើតអ៊ុយក្រែន។
ថ្ងៃទី១ តុលា ឆ្នាំ២០១៩៖ តំណាងរដ្ឋាភិបាលអ៊ុយក្រែន និងតំណាងរដ្ឋាភិបាលរុស្ស៊ី ជួបគ្នា នៅក្នុងទីក្រុងមីនស្ក៍ ហើយបានព្រមព្រៀងគ្នាថា នឹងរៀបចំការបោះឆ្នោត នៅតំបន់ដុនបាស់ និងកំណត់លក្ខន្តិកៈពិសេស សម្រាប់តំបន់នេះ។ ក្រោយការព្រមព្រៀងគ្នានេះ បាតុកម្មបានផ្ទុះឡើង នៅទីក្រុងកៀវ ដោយបាតុករបានរិះគន់លោក វ៉ូឡូឌីមៀរ ហ្សេឡេនស្គី ថា ចុះញ៉មសម្ពាធរបស់រុស្ស៊ី។
ថ្ងៃទី១២ មិថុនា ឆ្នាំ២០២០៖ បក្សសម្ព័ន្ធអូតង់ផ្តល់ឲ្យអ៊ុយក្រែននូវឋានៈជាប្រទេសដៃគូ ដែលបើកផ្លូវឲ្យមានកិច្ចសហប្រតិបត្តិការខាងផ្នែកយោធាជាមួយគ្នា ក៏ប៉ុន្តែ នៅតែបដិសេធមិនចាប់ផ្តើមនីតិវិធីទទួលអ៊ុយក្រែនជាសមាជិក ទៅតាមការស្នើសុំរបស់លោក វ៉ូឡូឌីមៀរ ហ្សេឡេនស្គី។
ថ្ងៃទី១ មេសា ឆ្នាំ២០២១៖ លោក វ៉ូឡូឌីមៀរ ហ្សេឡេនស្គី ចោទរុស្ស៊ីថាពង្រាយទ័ពនៅតាមព្រំដែនអ៊ុយក្រែន។ រុស្ស៊ីឆ្លើយតបមកវិញថា ការពង្រាយទ័ពនេះ គឺដើម្បីធ្វើសមយុទ្ធ ឆ្លើយតបទៅនឹងទង្វើបង្កហេតុរបស់អ៊ុយក្រែន។
ថ្ងៃទី៦ មេសា ឆ្នាំ២០២១៖ ប្រឈមនឹងការពង្រាយទ័ពរបស់រុស្ស៊ី លោកវ៉ូឡូឌីមៀរ ហ្សេឡេនស្គី បានប្រកាសជាចំហថា ការចូលជាសមាជិកបក្សសម្ព័ន្ធអូតង់គឺជាមធ្យោបាយតែមួយគត់ ដែលអាចបញ្ចប់សង្រ្គាមនៅតំបន់ដុនបាស់បាន។ លោកប្រធានាធិបតីអ៊ុយក្រែនក៏បានប្រកាសផងដែរ អំពីគោលបំណងចង់ចូលជាសមាជិកសហភាពអឺរ៉ុប។
ខែធ្នូ ឆ្នាំ២០២១៖ ក្រោយពីរុស្ស៊ីពង្រាយទ័ពកាន់តែច្រើន នៅក្បែរព្រំដែនអ៊ុយក្រែន ប្រទេសលោកខាងលិចក៏ចាប់ផ្តើមទាញសញ្ញាអាសន្ន ដោយលើកឡើងថា ជាការពង្រាយទ័ព ក្នុងគោលដៅចូលឈ្លានពានអ៊ុយក្រែន។ លោកវ៉្លាឌីមៀរ ពូទីន បានបដិសេធថារុស្ស៊ីមិនមានចេតនាចូលឈ្លានពានអ៊ុយក្រែននោះទេ ក៏ប៉ុន្តែ ក្នុងពេលជាមួយគ្នា បានដាក់លក្ខខណ្ឌមួយចំនួនចំពោះអាមេរិក និងបក្សសម្ព័ន្ធអូតង់ ក្នុងនោះ រួមមានការទាមទារឲ្យអូតង់ធានាថានឹងមិនឲ្យអ៊ុយក្រែនចូលជាសមាជិក ហើយឲ្យអូតង់ដកកម្លាំងយោធាទាំងអស់ ដែលឈរជើងនៅក្នុងប្រទេសនៅអឺរ៉ុបខាងកើត ហើយដែលចូលជាសមាជិកអូតង់ ក្រោយឆ្នាំ១៩៩៩៧។
លោកបៃដិន បានព្រមានទុកជាមុនថា ប្រសិនបើរុស្ស៊ីចូលឈ្លានពានអ៊ុយក្រែន អាមេរិក និងសម្ព័ន្ធមិត្ត នឹងដាក់ទណ្ឌកម្មយ៉ាងធ្ងន់ធ្ងរបំផុតទៅលើរុស្ស៊ី ក៏ប៉ុន្តែ ក្នុងពេលជាមួយគ្នា លោកប្រធានាធិបតីអាមេរិកក៏បានប្រកាសទុកជាមុនផងដែរថា អាមេរិកនឹងមិនបញ្ជូនកងទ័ពទៅជួយអ៊ុយក្រែននោះទេ ពីព្រោះអ៊ុយក្រែនមិនមែនជាសមាជិកអូតង់។
ខែធ្នូ ឆ្នាំ២០២១-ខែកុម្ភៈ ឆ្នាំ២០២២៖ កិច្ចប្រឹងប្រែងផ្នែកការទូតត្រូវបានគេសម្រុកធ្វើយ៉ាងខ្លាំង ដើម្បីបញ្ចៀសសង្រ្គាមអ៊ុយក្រែន ក្នុងនោះ ក៏រួមមានទាំងជំនួបតាមវីដេអូ រវាងលោកពូទីន និងលោកបៃដិន ជំនួបដោយផ្ទាល់ នៅទីក្រុងម៉ូស្គូ រវាងលោកម៉ាក្រុង និងលោកពូទីន និងជំនួប រវាងលោកពូទីន និងលោកអូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ ដែលទើបនឹងឡើងកាន់តំណែង។
ក៏ប៉ុន្តែ ប្រតិបត្តិការផ្នែកការទូតទាំងនេះ មិនបានទទួលលទ្ធផលជាវិជ្ជមាននោះទេ។ លោកបៃដិន និងសម្ព័ន្ធមិត្តក្នុងបក្សសម្ព័ន្ធអូតង់បដិសេធមិនផ្លាស់ប្តូរគោលនយោបាយបើកទ្វារចំហ ឬ « Open door policy » ពោលគឺ ទុកសិទ្ធិឲ្យប្រទេសនីមួយៗជាអ្នកសម្រេចដោយខ្លួនឯងថាចង់ចូលក្នុងអូតង់ ឬក៏អត់។ នេះមានន័យថា ក្នុងករណីអ៊ុយក្រែន គឺអ៊ុយក្រែនខ្លួនឯងជាអ្នកមានសិទ្ធិសម្រេចថា ចង់ចូលក្នុងអូតង់ ឬក៏អត់ ចំណែកអូតង់មានសិទ្ធិសម្រេចថា ទទួលយកអ៊ុយក្រែនជាសមាជិក ឬមិនទទួល ដោយមើលទៅលើលក្ខខណ្ឌសមាជិកភាពរបស់អូតង់ ក៏ប៉ុន្តែ មិនអាចបិទទ្វារជាមុនថាមិនទទួលយកអ៊ុយក្រែននោះទេ។
ថ្ងៃទី២០ កុម្ភៈ ឆ្នាំ២០២២៖ ក្រោយពីមានជំនួបតាមទូរសព្ទ រវាងលោកម៉ាក្រុង និងលោកពូទីន វិមានប្រធានាធិបតីបារាំងបានចេញសេចក្តីថ្លែងការណ៍ថា លោកពូទីន និងលោកបៃដិន បានព្រមព្រៀងជាគោលការណ៍ថានឹងបើកធ្វើជំនួបកំពូល ជជែកអំពីវិបត្តិអ៊ុយក្រែន។ ក៏ប៉ុន្តែ នៅថ្ងៃទី២១កុម្ភៈ លោកពូទីន បានប្រកាសទទួលស្គាល់ ដូណេតស្ក៍ និង លូហាន់ស្ក៍ ជារដ្ឋឯករាជ្យ ហើយនៅថ្ងៃទី២៤កុម្ភៈ កងទ័ពរុស្ស៊ីក៏បានចាប់ផ្តើមវាយប្រហារទៅលើអ៊ុយក្រែន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ