G៧ ត្រៀមដាក់ទណ្ឌកម្មសេដ្ឋកិច្ច និងហិរញ្ញវត្ថុចាស់ដៃលើរុស្ស៊ី បើរុស្ស៊ីហ៊ានចូលឈ្លានពានអ៊ុយក្រែន
វិបត្តិអ៊ុយក្រែនកំពុងបន្តជាបច្ចុប្បន្នភាណក្តៅគគុករវាងប្រទេសរុស្ស៊ី និងក្រុមបស្ចិមប្រទេស។ ទន្ទឹមនឹងការចោទរុស្ស៊ីពីបទត្រៀមចូលឈ្លានពានអ៊ុយក្រែន ក្រុមបស្ចិមប្រទេសក៏កំពុងត្រៀមយុទ្ធសាស្រ្តត្រជាក់ និងក្តៅដើម្បីត ទល់នឹងរុស្ស៊ី។ យុទ្ធសាស្រ្តត្រជាក់ គឺការបន្តស្វែងរកដំណោះស្រាយឲ្យវិបត្តិតាមផ្លូវទូត។ នាយករដ្ឋមន្រ្តីអាល្លឺម៉ង់លោកអូឡាហ្វ ស្ហុលស៍ធ្វើដំណើរទៅជួបប្រធានាធិបតីអ៊ុយក្រែនក្នុងទីក្រុងកៀវនាថ្ងៃចន្ទ ទី១៤ កុម្ភៈ និងទៅជួបប្រធានាធិបតីរុស្ស៊ីលោកពូទីនក្នុងទីក្រុងមូស្គូនាថ្ងៃអង្គារ ទី១៥ កុម្ភៈ។ ចំណែកយុទ្ធសាស្រ្តក្តៅ គឺការត្រៀមដាក់ទណ្ឌកម្មប្រឆាំងរុស្ស៊ី។ ជាក់ស្តែងក្នុងថ្ងៃចន្ទ ទី១៤ កុម្ភៈ ក្រុមប្រទេស G៧ បានបញ្ជាក់ពីការត្រៀមដាក់ទណ្ឌកម្មសេដ្ឋកិច្ច និងហិរញ្ញវត្ថុចាស់ដៃលើរុស្ស៊ី បើរុស្ស៊ីចូលឈ្លានពានអ៊ុយក្រែន។ លោកយុយលីយៀង តេរ៉ុង សាស្រ្តាចារ្យនៅសាលាវិទ្យាសាស្រ្ត នយោបាយក្រុងប៉ារីសបានមើលឃើញថា រឿងរុស្ស៊ីចូលឈ្លានពានអ៊ុយក្រែនអាចកើតមានឡើង តែលោកបានចោទសួរពីប្រសិទ្ធិភាពនៃអន្តរាគមន៍យោធាតាមផ្លូវគោករបស់រុស្ស៊ី។
ចុះផ្សាយនៅថ្ងៃ៖
ស្តាប់ - ០១:៥៨
« សំណួរទាក់ទងនឹងរឿងយោធានេះជាសំណួរដ៏សំខាន់។ សមត្ថភាពយោធារបស់រុស្ស៊ីថ្ងៃនេះគឺធំធេងណាស់ បើគេធៀបនឹងសមត្ថភាពយោធាដែលរុស្ស៊ីបានប្រើដើម្បីវាយប្រហារប្រទេសហ្សកហ្ស៊ីក្នុងឆ្នាំ ២០០៨។ កាលណោះ គឺដើម្បីគាំទ្រក្រុមអ្នកទាមទារផ្តាច់ទឹកដីនិយមក្នុងតំបន់អូស៊ីធីខាងត្បូងដែលនិយមរុស្ស៊ី។ តែនៅក្នុងការវាយប្រហារហ្សកហ្ស៊ីពេលនោះ ទ័ពរុស្ស៊ីមិនបានវាយចូលដល់ទីក្រុងប៊ីលីស៊ីទេ ពោលបានឈប់ត្រឹមស្រុកហ្គោរី។
កម្មវត្ថុនៃការមិនវាយប្រហារឲ្យហួសឆ្ងាយពីស្រុកហ្គោរីរបស់ទ័ពរុស្ស៊ីកាលណោះ គឺដើម្បីដាក់គំនាបលើហ្សកហ្ស៊ី និងសហគមន៍អន្តរជាតិ។ តែអ្វីដែលគេកំពុងសំឡឹងឃើញពេលនេះ គឺវត្តមានទ័ពរុស្ស៊ី និងគ្រឿងសព្វាវុធ ពិសេសរថក្រោះដ៏ច្រើនសម្បើមដែលរុស្ស៊ីបានដាក់ពង្រាយនៅព្រំដែនអ៊ុយក្រែន។ បន្ថែមពីនេះ គេក៏បានឃើញមានការរៀបចំរចនាសម្ព័ន្ធដើម្បីការពាររថក្រោះប្រឈមនឹងការវាយប្រហារដោយដ្រូនតួកគីដែលអ៊ុយក្រែនបានទិញ។
រូបភាពទាំងអស់នេះនាំឲ្យគេអាចសន្មត់ថា រុស្ស៊ីកំពុងត្រៀមជើងព្រួលវាយប្រហារអ៊ុយក្រែនតាមផ្លូវគោក។ នៅក្នុងករណីនេះ មានការចោទឡើងនូវសំណួរមួយចំនួន ព្រោះបើមានការវាយប្រហារផ្លូវគោកពីរុស្ស៊ីមែន កម្លាំងទាហានអ៊ុយក្រែនក៏បានរៀបចំ និងត្រៀមខ្លួនល្អជាងឆ្នាំ ២០១៤ ដែលរុស្ស៊ីបានវាយក្រសោបយកតំបន់គ្រីមេ។ លើសពីនេះ ប្រជាជនអ៊ុយក្រែនក៏បានរៀបចំ និងត្រៀមខ្លួនដើម្បីធ្វើសង្រ្គាមទ័ពព្រៃដែរ។ បើដូច្នេះមែន កិច្ចសន្ទនាដែលខ្ញុំបានធ្វើនៅក្នុងទីក្រុងកៀវបានបង្ហាញថា រុស្ស៊ីអាចនឹងធ្លាក់ទៅក្នុងស្ថានភាពជាប់ផុងនៅក្នុងសង្រ្គាមអ៊ុយក្រែន។ ដូច្នេះ វាអាចចោទជាសំណួរជុំវិញភាពសមហេតុផលនៃការធ្វើអន្តរាគមន៍យោធាតាមផ្លូវគោក »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ