នាយករដ្ឋមន្ត្រីកាណាដាជំរុញបស្ចិមលោកឲ្យរួបរួមគ្នាប្រឆាំងទល់នឹងចិន
នៅក្នុងបទសម្ភាសន៍មួយជាមួយប្រព័ន្ធផ្សព្វផ្សាយក្នុងស្រុក នាយករដ្ឋមន្ត្រីកាណាដាលោក ហ្សូសស្តាំង ទ្រុយដូ និយាយថាចិនកំពុងតែលេងនយោបាយបំបែកបំបាក់សាមគ្គីភាពរបស់បណ្តាប្រទេសលោកខាងលិច។ ដូច្នោះហើយ មេដឹកនាំកាណាដាបានជំរុញឲ្យប្រទេសសម្ព័ន្ធមិត្តរួបរួមសាមគ្គីគ្នាឲ្យកាន់តែខ្លាំងដើម្បីប្រឆាំងទល់នឹងទីក្រុងប៉េកាំង។
ចុះផ្សាយនៅថ្ងៃ៖
ស្តាប់ - ០២:២៤
“សម្ព័ន្ធមិត្តលោកខាងលិចគួរតែរួបរួមគ្នាឲ្យបានខ្លាំងបន្ថែមទៀតដើម្បីការពារកុំឲ្យចិនអាចបំបែកបំបាក់កម្លាំងសាមគ្គីរបស់យើងបាន”។ នេះគឺជាប្រសាសន៍របស់លោកនាយករដ្ឋមន្ត្រីកាណាដាទ្រុយដូ ប្រាប់ទូរទស្សន៍ Global Television នៅក្នុងបទសម្ភាសន៍មួយដែលចាក់ផ្សាយកាលពីល្ងាចថ្ងៃសៅរ៍ ទី២៤ ធ្នូ ឆ្នាំ២០២១។
បើតាមលោកទ្រុយដូ បញ្ហាប្រឈមមួយសម្រាប់ក្រុមលោកខាងលិចគឺការប្រកួតប្រជែងគ្នាក្នុងចំណោមសម្ព័ន្ធមិត្តពីព្រោះថាក្នុងនាមជាប្រទេសប្រជាធិបតេយ្យមូលធននិយម ប្រទេសទាំងនោះ ត្រូវខំព្យាយាមធ្វើឲ្យបានល្អ ជាពិសេសនៅពេលមានឱកាសសេដ្ឋកិច្ចហុចឲ្យនៅក្នុងប្រទេសចិន ជាទីដែលវណ្ណៈកណ្តាលកំពុងកើនឡើងច្រើន។
លោកនាយករដ្ឋមន្ត្រីកាណាដា បានលើកឡើងជាឧទាហរណ៍ជាក់ស្តែងដូចក្នុងករណីដែលកាដាណា កំពុងព្យាយាមសម្លឹងមើលពីវិធីនាំចេញសាច់គោរបស់ខ្លួនឲ្យបានច្រើនជាងសាច់គោអូស្ត្រាលីចូលទៅកាន់ទីផ្សាររបស់ចិន។ និន្នាការនេះអនុញ្ញាតឲ្យទីក្រុងប៉េកាំងអាចបំបែកបំបាក់ប្រទេសទាំងពីរនេះបាន។ ប៉ុន្តែលោកទ្រុយដូមិនបានបញ្ជាក់ប្រាប់នោះទេពីសកម្មភាពណាមួយរបស់ប្រទេសចិនដែលជំរុញឲ្យលោកលើកឡើងបែបនេះ។
ដើម្បីជាការឆ្លើយតប លោកនាយករដ្ឋមន្ត្រីកាណាដាលើកឡើងថាបណ្តាប្រទេសលោកខាងលិច ត្រូវតែត្រូវរួមកម្លាំងគ្នាឲ្យខ្លាំងជាងមុនដើម្បីការពារកុំឲ្យប៉េកាំងអាចបំបែកបំបាក់សម្ព័ន្ធមិត្តលោកខាងលិច និងអាចប្រើការបង្ខិតបង្ខំការទូតបាន។
គួរបញ្ជាក់ថា ការអត្ថាធិប្បាយរបស់មេដឹកនាំកាណាដាខាងលើនេះបានកើតឡើងស្របពេលកំពុងមានបញ្ហានឹងគ្នាជាមួយរដ្ឋាភិបាលក្រុងប៉េកាំង។ កាលពីចុងឆ្នាំ ២០១៨ ទំនាក់ទំនងទ្វេភាគីកាណាដា-ចិន បានធ្លាក់ចុះខ្លាំងបន្ទាប់ពីប្រធានផ្នែកហិរញ្ញវត្ថុក្រុមហ៊ុន Huawei ត្រូវបានចាប់ខ្លួននៅកាណាដា និងក្រោយចិនចាប់ឃុំខ្លួនជនជាតិកាណាដាពីរនាក់ពីបទថាបានធ្វើឲ្យប៉ះពាល់សន្តិសុខជាតិចិន ហើយនិងបានហាមឃាត់ការនាំចូលមួយចំនួនពីកាណាដាទៀតផង។
គួរជ្រាបដែរថា ថ្មីៗនេះកាណាដាបានចូលរួមពហិការការទូតមួយដឹកនាំមុខដោយអាមេរិកក្នុងកម្មវិធីកីឡាអូឡាំពិករដូវរងារនៅប៉េកាំងនាខែកុម្ភៈខាងមុខដើម្បីប្រឆាំងនឹងអំពើរំលោភសិទ្ធិមនុស្សនៅចិន។ រដ្ឋបាលរបស់លោកនាយករដ្ឋមន្ត្រីទ្រុយដូ ឥឡូវនេះក៏កំពុងពិចារណាដែរពីការហាមឃាត់បច្ចេកវិទ្យា5G របស់ក្រុមហ៊ុន Huawei នៅក្នុងប្រទេសកាដាណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ