ដាណឺម៉ាក ចង់បញ្ជូនអ្នកទោសបរទេសទៅ ឃុំឃាំងនៅកូសូវ៉ូ
សហភាពអឺរ៉ុបនឹងផ្តល់កុងទឺនឺរ ចំនួន ១៥០ សម្រាប់យកទៅធ្វើជាជម្រកឱ្យជនភៀសខ្លួនសុំសិទ្ធិជ្រកកោន ដែលមានចំនួនកាន់តែច្រើនឡើងៗនៅប៊ែលហ្សិក។ ចំណែកនៅដាណឺម៉ាកវិញ រដ្ឋាភិបាលកំពុងរងវិធីគ្រប់យ៉ាងសម្រាប់បំបាក់ទឹកចិត្តជនអន្តោប្រវេសន៍។ បន្ទាប់ពីសម្រេចបញ្ជូនជនអន្តោប្រវេសន៍ដែលសិទ្ធិសុំជ្រកកោនរួច ទៅមណ្ឌលទទួលជនភៀសខ្លួននៅក្រៅទឹកដីសហភាពអឺរ៉ុប ដាណឺម៉ាក នឹងបញ្ជូនទណ្ឌិតបរទេសទៅឃុំឃាំងក្នុងពន្ធនាគារនៅប្រទេសកូសូវ៉ូ។
ចុះផ្សាយនៅថ្ងៃ៖
ស្តាប់ - ០២:២១
ប្រទេសទាំងពីរទើបបានបញ្ជាក់ព័ត៌មានស្តីពី ចុះកិច្ចព្រមព្រៀងទទួលទណ្ឌិត ដែលត្រូវឆ្លងកាត់ការព្រមព្រៀងពីសភាដាណឺម៉ាក ក្នុងសំឡេងពីរភាគបី។
បើតាមកិច្ចព្រមព្រៀង ដាណឺម៉ាក អាចបញ្ជូនអ្នកទោសបរទេសចំនួន៣០០នាក់ ទៅឃុំឃាំងក្នុងពន្ធនាគារដែលស្ថិតនៅប៉ែកខាងកើតប្រទេសកូសូវ៉ូ។ នៅពេលចូលដល់ពន្ធនាគារ អ្នកទោសត្រូវគោរពតាមច្បាប់របស់ដាណឺម៉ាក តែការរក្សាសន្តិសុខនិងសុខុមាលភាពអ្នកទោសជាភារៈកិច្ចរបស់អាជ្ញាធរពន្ធនាគារកូសូវ៉ូ។ នៅពេលទណ្ឌិតអនុវត្តទោសចប់សព្វគ្រប់ជនទាំងនោះនឹងត្រូវបណ្តេញទៅប្រទេសកំណើតវិញភ្លាម។
តើអ្នកទោសប្រភេទណាដែលនឹងត្រូវបញ្ជូនទៅកូសូវ៉ូ ? បើតាមក្រសួងយុត្តិធម៌កូសូវ៉ូ ទណ្ឌិតទាំងនោះមិនមែនជាភេរវជន និងមិនមែនជាអ្នកទោសគ្រោះថ្នាក់ទេ។ ជាថ្នូរនឹងបន្ទុកមើលអ្នកទោស កូសូវ៉ូ នឹងទទួលបានថវិកាចំនួន ២១០លានអឺរ៉ូពីដាណឺម៉ាក។ ដាណឺម៉ាក បានថែមទាំងបានសន្យាផ្តល់ហិរញ្ញវត្ថុចំនួន៦លានអឺរ៉ូក្នុងមួយឆ្នាំៗ សម្រាប់កូសូវ៉ូធ្វើអន្តរកាលថាមពលទៀត។
ល្បីឈ្មោះខាងមានពន្ធនាគារ ទូលាយសម្រាប់អ្នកទោសក្រោម៥ឆ្នាំ ដាណឺម៉ាកចង់ធ្វើកំណែទម្រង់ប្រព័ន្ធពន្ធនាគារ និងដំឡើងសមត្ថភាពឃុំឃាំងអ្នកទោស ព្រោះតាំងពីឆ្នាំ២០១៥មក ចំនួនទណ្ឌិតក្នុងពន្ធនាគារដាណឺម៉ាក បានកើនឡើង១៩% ពោលគឺដាណឺម៉ាកមានអ្នកទោសសរុបជាង ៤០០០នាក់ គិតត្រឹមដើមឆ្នាំ២០២១ និងឡើងពេញណែនពន្ធនាគារ (លើសសមត្ថភាពរបស់ពន្ធនាគារទៅទៀត)។ នេះបើតាមស្ថិតិជាតិស្តីពីអត្រាអ្នកទោសជាប់ឃុំឃាំង។ ហើយទន្ទឹមពេលជាមួយគ្នានេះ ចំនួនបុគ្គលិកយាមពន្ធនាគារបានធ្លាក់ចុះអស់១៨%។
សេចក្តីសម្រេចរបស់ដាណឺម៉ាក បានក្លាយជារឿងអាស្រូវមួយ។ ប៉ុន្តែកិច្ចព្រមព្រៀងនេះជា ជំហរបន្តពី ពិធីសារយោគយល់គ្នាចុះហត្ថលេខាកាលពីខែមេសា ២០២១ ដែលសភាដាណឺម៉ាក បានអនុម័តក្នុងសំឡេងភាគច្រើនខ្លាំង ឱ្យមានការបញ្ជូនជនអន្តោប្រវេសន៍ចុះឈ្មោះសុំសិទ្ធិជ្រកកោនហើយទៅឃុំទុកក្នុងមណ្ឌលជនភៀសខ្លួននៅកូសូវ៉ូ។
ពេលនេះ ដាណឺម៉ាកបានក្លាយជាសមាជិកសហភាពអឺរ៉ុបដំបូងគេបង្អស់ដែលគ្រោងនឹងបញ្ជូនអ្នកទោសបរទេសទៅឃុំឃាំងក្នុងពន្ធនាគារនៅកូសូវ៉ូ។ ប៉ុន្តែការបញ្ជូនទណ្ឌិតទៅអនុវត្តទោសនៅបរទេសមិនមែនជាករណីថ្មីស្រឡាងទេ។ ន័រវែសធ្លាប់បានបញ្ជូនអ្នកទោសទៅឃុំឃាំងនៅប្រទេសហូឡង់ អូស្ត្រាលីខ្ចប់ជនអន្តោប្រវេសន៍ខុសច្បាប់ទៅឃុំនៅលើកោះមួយជារបស់ប៉ាពូអាស៊ីនូវែលហ្គីណេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ