លោកម៉ាក្រុង ធ្វើសន្និសីទកាសែត បង្ហាញពីកាលវិភាគការងារ សម្រាប់អាណត្តិជាប្រធានវិលជុំនៃសហភាពអឺរ៉ុប
ចាប់ពីថ្ងៃទី១មករា ឆ្នាំ២០២២ រហូតដល់ដាច់ខែមិថុនា បារាំងនឹងត្រូវដល់វេនជាប្រធានវិលជុំ ដឹកនាំសហភាពអឺរ៉ុប។ ក្នុងនាមជាអ្នកនយោបាយ និយមអឺរ៉ុបខ្លាំងបំផុតនោះ លោកម៉ាក្រុង ប្រធានាធិបតីបារាំង បានធ្វើសន្និសីទកាសែត រយៈពេលជាង១ម៉ោង កាលពីថ្ងៃព្រហស្បតិ៍ទី៩ធ្នូ ដើម្បីបង្ហាញអំពីផែនការការងារ ព្រមទាំងកម្មវត្ថុរបស់បារាំង ក្នុងការដឹកនាំអឺរ៉ុបរយៈពេល៦ខែទៅមុខ។ លោក ម៉ាក្រុង បានលើកឡើង អំពីចំណុចគ្រោងឆ្ឆឹងធំៗចំនួន៣ នៃកម្មវត្ថុរបស់លោក ទីមួយ គឺការកសាងពង្រឹងអធិបតេយ្យភាពរបស់សហភាពអឺរ៉ុប ទី២គឺពិចារណាគូសវាសគម្រូសេដ្ឋកិច្ចថ្មី សម្រាប់អឺរ៉ុប ហើយទី៣នោះ គឺលោកម៉ាក្រុងបានលើកឡើង អំពីការកសាងមហាគ្រួសារអឺរ៉ុប ដែលមានទំនោរមនុស្សជាតិនិយម។
ចុះផ្សាយនៅថ្ងៃ៖
ស្តាប់ - ០៣:២៦
NEWS-MACRON-EU-10122021
"បើខ្ញុំត្រូវសង្ខេបឲ្យខ្លី នូវកម្មវត្ថុ របស់បារាំង ក្នុងនាមជាប្រធានវិលជុំនៃសហភាពអឺរ៉ុប ចាប់ពីថ្ងៃទី១មករា រហូតដល់ដាច់ខែមិថុនា ឆ្នាំ២០២២ គឺយើងត្រូវតែប្រឹងប្រែង បោះជំហាន ឈានពីអឺរ៉ុបដែលធ្លាប់តែជាចំណងសហប្រតិបត្តិការផ្ទៃក្នុងព្រំដែន ឲ្យក្លាយទៅជាអឺរ៉ុបដែលមានកម្លាំងឥទ្ធិពល មានអធិបតេយ្យភាពរឹងមាំ មានភាពជាម្ចាស់ការក្នុងការសម្រេចចិត្ត និងកសាងជោគវាសនាដោយខ្លួនឯង។
ដើម្បីសម្រេចកម្មវត្ថុនេះ ជំហានទីមួយ គឺយើងត្រូវតែកសាងអឺរ៉ុប ឲ្យមានអធិបតេយ្យភាព។ អឺរ៉ុបមានអធិបតេយ្យភាព គឺទាល់តែអឺរ៉ុប អាចចាត់ចែង និងគ្រប់គ្រង ព្រំដែនរបស់ខ្លួន ដោយប្រសិទ្ធភាព។ នៅក្នុងន័យនេះ នៅអាណត្តិរបស់បារាំង ជាប្រធានវិលជុំ គឺបារាំងនឹងដឹកនាំផ្តួចផ្តើមការចរចាគ្នា ដើម្បីធ្វើកំណែទម្រង់ តំបន់ឆិនហ្កិន។
ផ្នែកទី២ នៃកម្មវត្ថុរបស់យើង គឺយកពេលនេះ ជជែកគ្នា គូសវាស កសាងទំរង់ថ្មី នៃការរីកចម្រើនសេដ្ឋកិច្ចរបស់អឺរ៉ុប។ និយាយឲ្យខ្លី ថាតើពីនេះដល់ឆ្នាំ២០៣០ យើងចង់ឲ្យសេដ្ឋកិច្ចអឺរ៉ុប រីកចម្រើនដោយរបៀបណា ដើរបត់ទៅផ្លូវណា។ គម្រូសេដ្ឋកិច្ចថ្មីរបស់អឺរ៉ុប ដែលបារាំង ជឿថា មិនអាចពឹងផ្អែកតែទៅលើ ការផលិតទេ តែត្រូវផ្តោតការយកចិត្តទុកដាក់ ទៅលើការសាមគ្គី បែងចែងគ្នា នឹងការពង្រឹងអន្តរាគមន៍ កំណត់វិធានរួមជាស្តង់ដារ។
អឺរ៉ុបផលិត ដើម្បីពង្រីកប្រាក់ចំណូលធនធាន តែអឺរ៉ុបត្រូវតែគិតគូរការពារ គម្រូសង្គមកិច្ចរបស់ខ្លួន ព្រោះយើងមានការចង់បាន និងមានកម្មវត្ថុ ខុសពីអាមេរិក ឬក៏ខុសពីប្រទេសនៅអាស៊ី។ ហើយគម្រូសេដ្ឋកិច្ចថ្មីរបស់យើងនេះ ត្រូវតែឆ្លើយតបទៅនឹង កាលវិភាគនយោបាយ ដែលផ្តល់អាទិភាពដល់ការដោះស្រាយវិបត្តិអាកាសធាតុ ថែមទៀតផង។ ហេតុដូច្នេះ នៅថ្ងៃទី១០មីនា ឆ្នាំក្រោយ បារាំងនឹងដឹកនាំជំនួបកំពូលពិសេសមួយ នៅបារីស ជាមួយប្រទេសសមាជិកអឺរ៉ុបទាំង២៧ ដើម្បីពិចារណា គិតគូរ អំពីគម្រូសេដ្ឋកិច្ច និងការរីកចម្រើនរបស់អឺរ៉ុបនេះ។
ផ្នែកទី៣ចុងក្រោយដែលសំខាន់ដែរ គឺបំណងរបស់ខ្ញុំចង់កសាងអឺរ៉ុប ឲ្យក្លាយជាមហាគ្រួសារមួយ ដែលមានគំនិតមនុស្សនិយម។ នៅលើផ្ទៃដីដ៏តូចរបស់យើង យើងបានរួមគ្នា បង្កើតចងក្រងទ្រឹស្តីលទ្ធិប្រជាធិបតេយ្យ មនសិកាមនុស្សធម៌ ស្មារតីស្រលាញ់រាប់អានគ្នា ស្មារតីនៃគំនិតចំណេះដឹងដែលជាពន្លឺ និងការគោរពសិទ្ធិមនុស្ស។ ទាំងអស់នេះគឺជាតម្លៃរបស់យើង។
អឺរ៉ុបមនុស្សនិយម អាចសម្រេចទៅបាន តាមរយៈវិធានការ និងគំនិតល្អៗជាច្រើន ដែលយើងនឹងដាក់ចុះអនុវត្ត ដើម្បីធ្វើយ៉ាងណា ឲ្យប្រជាជនអឺរ៉ុប យុវជនអឺរ៉ុបស្រលាញ់រាប់អានគ្នា យល់ពីគ្នា។ តាមរយៈការសហការ ផ្លាស់ប្តូរគ្នាក្នុវិស័យអប់រំ វិស័យវប្បធម៌ ការចូលរួមធ្វើការងារស្ម័គ្រចិត្តក្នុងកិច្ចការសង្គម រវាងយុវជនអឺរ៉ុប វាគឺជាការរួមចំណែក ប្រឹងប្រែងកសាងគ្រួសារអឺរ៉ុប។ ការចូលរួមប្រឹងប្រែងនេះ គឺដើម្បីឲ្យប្រជាជនអឺរ៉ុបយល់ពីតម្លៃមិនអាចកាត់ថ្លៃបាននៃគ្រួសារអឺរ៉ុបរឹងមាំ និងត្រូវ ដឹងថា គ្មានអ្វីមួយកើតឡើងដោយឯកឯង ដោយគ្មានការចូលរួមកសាង នោះទេ។ ដូច្នេះ ផ្នែកនេះ វាក៏គឺជាការងារមួយដ៏សំខាន់ណាស់ដែរ បើប្រៀបទៅនឹងបញ្ហាកសាងអធិបតេយ្យភាព និង ការរៀបចំគំរូសេដ្ឋកិច្ចថ្មី ដើម្បីការរីកចម្រើនរបស់សហភាពអឺរ៉ុប៕"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ