Sipri៖វិបត្តិសេដ្ឋកិច្ចបង្កដោយកូវីដ១៩ មិនបានប៉ះពាល់ដល់ទីផ្សារអាវុធក្នុងឆ្នាំ ២០២០ ទេ
នៅថ្ងៃចន្ទ ទី៧ ធ្នូ វិទ្យាស្ថានស្រាវជ្រាវសន្តិភាពអន្តរជាតិស្តុកខុលហៅកាត់ Sipri បានផ្សព្វផ្សាយរបាយការណ៍មួយស្តីពីការជួញដូរអាវុធនៅក្នុងលោកនាឆ្នាំ ២០២០។ របាយការណ៍បានបញ្ជាក់ថា ការជួញដូរអាវុធក្នុងលោកក្នុងឆ្នាំ ២០២០ បន្តមានកំណើន ទោះពិភពលោកបានស្គាល់វិបត្តិសេដ្ឋកិច្ចដែលបង្កឡើងដោយកូវីដ១៩ ក៏ដោយ។ តាម Sipri ទឹកប្រាក់បានពីការលក់អាវុធក្នុងឆ្នាំ ២០២០ របស់ក្រុមហ៊ុនអាវុធចំនួន ១០០ក្រុមហ៊ុននាំមុខគេមាន ៥៣១ ០០០លានដុល្លារ ក្នុងនោះ មានជាងពាក់កណ្តាលជារបស់ក្រុមហ៊ុនអាវុធអាមេរិក។
ចុះផ្សាយនៅថ្ងៃ៖
ស្តាប់ - ០១:៥១
បើគិតក្នុងរយៈពេល ១ឆ្នាំ ការលក់អាវុធក្នុងឆ្នាំ ២០២០ មានការកើនឡើងចំនួន ១,៣%។ តែខណៈដែលការជួញដូរអាវុធក្នុងលោកបន្តមានកំណើននៅក្នុងបរិបទនៃវិបត្តិកូវីដ១៩ សេដ្ឋកិច្ចសកលបានដាំក្បាលចុះជាង ៣% ដោយវិបត្តិកូវីដ១៩។ ក៏ដូចជារបាយការណ៍នៅរៀងរាល់ឆ្នាំ វិទ្យាស្ថានស្រាវជ្រាវសន្តិភាពអន្តរជាតិស្តុកខុលហៅកាត់ Sipri បានផ្តោតសំខាន់លើក្រុមហ៊ុនផលិតអាវុធគ្រាក់ៗនាំមុខគេទាំង ១០០ក្រុមហ៊ុន។ តាម Sipri ទឹកប្រាក់បានពីការលក់អាវុធរបស់ក្រុមហ៊ុនទាំង ១០០ បានកើនឡើងតាំងពីឆ្នាំ ២០១៥ មកម្ល៉េះ ពោលកើនចំនួន ១៧%។
ដោយឡែក នៅក្នុងលេខរៀងនៃចំណាត់ថ្នាក់របស់ក្រុមហ៊ុនផលិតអាវុធគ្រាក់ៗនាំមុខគេទាំង ១០ ក្នុងលោក អាមេរិកស្ថិតលំដាប់លើគេដោយមាន ៥ក្រុមហ៊ុន អង់គ្លេសស្ថិតនៅលេខរៀងទី៦ ដោយមាន ១ក្រុមហ៊ុន ចិនស្ថិតនៅលេខរៀងទី៧ ទី៨ និងទី៩ ដោយមាន ៣ក្រុមហ៊ុន និងមានក្រុមហ៊ុនអាមេរិកមួយទៀតស្ថិតនៅលេខរៀងទី១០។ តែក្រុមហ៊ុនអាមេរិក Lockheed-Martin បន្តស្ថិតចំណាត់ថ្នាក់ទី១ ដោយទទួលបានប្រាក់ពីការលក់អាវុធក្នុងឆ្នាំ ២០២០ ចំនួន ៥៨ ២០០លានដុល្លារ។ តាម Sipri វិស័យអាវុធបន្តមានកំណើនក៏ដោយសារតែមានតម្រូវការ និងការបន្តកម្ម៉ង់ទិញគ្រឿងសព្វាវុធពីបណ្តាប្រទេសមួយចំនួន។
តែ Sipri ក៏បានមើលឃើញពីឧបសគ្គមួយចំនួនដែលឧស្សាហកម្មអាវុធបានជួបប្រទះដោយវិបត្តិកូវីដ១៩។ ឧបសគ្គទាំងនោះ គឺវិធានការទប់ស្កាត់នឹងការឆ្លងរាលដាលកូវីដ១៩ ដែលបង្កឲ្យមានភាពរអាក់រអួលនៅក្នុងខ្សែសង្វាក់ផលិតកម្ម និងការដឹកជញ្ជូន។ តាម Sipri ឧបសគ្គដូចគ្នានេះក៏នឹងអាចកើតមានសម្រាប់ឆ្នាំ ២០២១។ សរុបមកវិញក្នុងឆ្នាំ ២០២០ ទីផ្សារអាវុធក្នុងលោកបន្តមានសុខភាពល្អ ទោះសុខភាពសេដ្ឋកិច្ចសកលបានទ្រុឌទ្រោមដោយវិបត្តិកូវី១៩ ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ