សហភាពអឺរ៉ុបបង្ហាញគម្រោងយុទ្ធសាស្រ្តសកលដើម្បីប្រជែងនឹងគម្រោងយុទ្ធសាស្រ្តរបស់ចិន
នៅថ្ងៃពុធ ទី១ ធ្នូ សហភាពអឺរ៉ុបបានបង្ហាញចេញនូវគម្រោងយុទ្ធសាស្រ្តសកលមួយឈ្មោះ « Global Gateway » ដើម្បីប្រជែងនឹងគម្រោងយុទ្ធសាស្រ្តរបស់ចិនឈ្មោះ « ផ្លូវ និងខ្សែក្រវ៉ាត់ »។ តាមរយៈគម្រោងយុទ្ធសាស្រ្ត « Global Gateway » មួយនេះ សហភាពអឺរ៉ុបចង់ប្រមូលថវិកាឲ្យបានចំនួន ៣០០ ០០០លានអឺរ៉ូពីពេលនេះទៅឆ្នាំ ២០២៧ ដោយមានការចូលរួមពីវិស័យសាធារណៈ និងវិស័យឯកជន។
ចុះផ្សាយនៅថ្ងៃ៖
ស្តាប់ - ០១:៥១
គម្រោងយុទ្ធសាស្រ្តសកល « Global Gateway » ជាគម្រោងហេដ្ឋារចនាសម្ព័ន្ធដែលអឺរ៉ុបចង់ធ្វើនៅក្នុងបណ្តាប្រទេសមួយក្នុងលោក។ ប្រភពថវិកាចំនួន ៣០០ ០០០លានអឺរ៉ូដែលអឺរ៉ុបចង់បានសម្រាប់គម្រោងយុទ្ធសាស្រ្តសកលមួយនេះ គឺប្រមូលពីសមាជិកអឺរ៉ុបទាំង ២៧ប្រទេស ពីស្ថាប័នហិរញ្ញវត្ថុអឺរ៉ុប ពីវិទ្យាស្ថានអភិវឌ្ឍជាតិ និងការចូលរួមពីវិស័យឯកជន នេះបើតាមការបញ្ជាក់របស់គណៈកម្មការអឺរ៉ុបនៅក្នុងសេចក្តីប្រកាសព័ត៌មានមួយ។ ចំណែកវិស័យដែលស្ថិតនៅក្នុងគម្រោងវិនិយោគត្រូវបានគណៈកម្មការអឺរ៉ុបគូសបញ្ជាក់ថា មានវិស័យឌីជីថល ស្រាវជ្រាវ សុខាភិបាល អាកាសធាតុ ថាមពល ដឹកជញ្ជូន និងវិស័យអប់រំ។
លោកស្រីអួរស៊ូឡា វ៉ុនឌែរ ឡេយែន ប្រធានគណៈកម្មការអឺរ៉ុបបានថ្លែងនៅក្នុងសន្និសីទកាសែតថា អឺរ៉ុបចង់បានការអនុវត្តន៍លើគម្រោងនេះជាមួយនឹងកម្រិតតម្លាភាពខ្ពស់ មានអភិបាលកិច្ចល្អ និងប្រកបដោយគុណភាព។ គេបានមើលឃើញថា គម្រោងយុទ្ធសាស្រ្ត « Global Gateway » របស់អឺរ៉ុបមានគោលដៅប្រជែងនឹងគម្រោងយុទ្ធសាស្រ្តរបស់ចិនឈ្មោះ « ផ្លូវ និងខ្សែក្រវ៉ាត់ »។ គម្រោងរបស់ចិនមួយនេះសំដៅអភិវឌ្ឍហេដ្ឋារចនាសម្ព័ន្ធផ្លូវថ្នល់ និងផ្លូវសមុទ្រដើម្បីត ភ្ជាប់រវាងចិនជាមួយអាស៊ី អឺរ៉ុប និងអាហ្រ្វិក។
តែក្រោមភ្នែកច្រមុះរបស់បស្ចិមលោក គម្រោង « ផ្លូវ និងខ្សែក្រវ៉ាត់ » របស់ចិនជាឧបករណ៍ដែលចិនប្រើដើម្បីដាក់ឥទ្ធិពលទៅលើក្រុមប្រទេសក្រីក្រ និងបានស្តីបន្ទោសចិនពីការប្រើគម្រោងនេះដើម្បីបង្ខំឲ្យប្រទេសទាំងនោះជំពាក់បំណុលខ្លួនកាន់តែច្រើន។ គេនៅមិនទាន់ដឹងថា តើគម្រោងយុទ្ធសាស្រ្តសកល « Global Gateway » របស់អឺរ៉ុបនឹងចេញរូបរាងផ្លូវការនៅពេលណាទេ។ តែសម្រាប់គម្រោង « ផ្លូវ និងខ្សែក្រវ៉ាត់ » របស់ចិនកំពុងមានដំណើរការដោយចិនបានចំណាយលុយជិត ១២៤ ០០០លានអឺរ៉ូហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ