រដ្ឋបារាំងសម្រេចបញ្ជូនកងកម្លាំងពិសេស ក្រោយផ្ទុះអំពើហិង្សាទប់មិនឈ្នះ នៅកោះហ្ក័រឌឺលូព
ប៉ុន្មានថ្ងៃចុងក្រោយនេះ មានផ្ទុះអំពើហិង្សាកាន់តែខ្លាំង នៅកោះហ្ក័រឌឺលូព ដែលជាកោះនាយសមុទ្រមួយរបស់បារាំង ស្ថិតនៅតំបន់សមុទ្រការ៉ាអ៊ីប។ អំពើហិង្សាដែលបានកើតឡើង បន្ទាប់ពីមានបាតុកម្ម ប្រឆាំងនឹងការដាក់កំហិត ឲ្យបុគ្គលិកពេទ្យមានកាតព្វកិច្ចចាក់វ៉ាក់សាំងបង្ការកូវីដ១៩។ ជាមួយការផ្ទុះអំពើហិង្សា កាន់តែខ្លាំងឡើងៗបែបនេះ ក្រសួងមហាផ្ទៃបារាំង បានបញ្ជូនកងកម្លាំងពិសេសជាង៥០នាក់ ទៅកាន់កោះនេះ ដើម្បីបង្រ្កាប និងទប់ស្កាត់សកម្មភាពរបស់ក្រុមជនជ្រុលនិយម។
ចុះផ្សាយនៅថ្ងៃ៖
ស្តាប់ - ០៣:០៧
ក្រោយចប់ការប្រជុំបន្ទាន់ នៅល្ងាចថ្ងៃសៅរ៍ទី២០វិច្ឆិកា លោក Gérald Darmanin រដ្ឋមន្ត្រីក្រសួងមហាផ្ទៃបារាំង បានសម្រេចបញ្ជូនកងកម្លាំងពិសេស ចំនួនជាង៥០នាក់ ទៅកាន់កោះហ្ក័រឌឺលូព (Guadeloupe) ដើម្បីបង្ក្រាបស្ថានការណ៍ចលាចលហិង្សា។ ចំណែកលោក Sébastien Lecornu រដ្ឋមន្ត្រីទទួលបន្ទុកដែនដីនាយសមុទ្របារាំង បានប្រកាសថា នៅថ្ងៃចន្ទទី២២វិច្ឆិកា នឹងនឹងមានការប្រជុំ រវាងលោកនាយករដ្ឋមន្ត្រីបារាំង ជាមួយសមាជិកសភា តំណាងអាជ្ញាធរមូលដ្ឋាន តំបន់ហ្ក័រឌឺលូព និងលោករដ្ឋមន្ត្រីសុខាភិបាលបារាំងផងដែរ។
គួរបញ្ជាក់ថា ករណីផ្ទុះអំពើហិង្សាចលាចល វាយបំផ្លាញទ្រព្យសម្បត្តិសាធារណៈ និងឯកជន បានកើតឡើង នៅតាមទីប្រជុំជនធំៗ ជាច្រើនកន្លែងនៅលើកោះនេះ ប្រមាណ៣ថ្ងៃមកហើយ។ បើទោះបីជា ក្រសួងមហាផ្ទៃបារាំង បានចេញបញ្ជាដាក់បំរាមគោរចរ ហាមចេញដើរ ចាប់ពីម៉ោង៦ល្ងាច ដល់ម៉ោង៥ព្រឹក តែអំពើហិង្សា នៅតែបន្តមាន នៅរវាងយប់ថ្ងៃសៅរ៍ ឈានចូលថ្ងៃអាទិត្យ។ រថយន្តនគរបាល ត្រូវបានក្រុមជនជ្រុលនិយម យកដុំថ្ម និងដបភ្លើងគុប ហាងលក់គ្រឿងអល្លង្ការ ធនាគារ និងផ្សារទំនើប ជាង២០ទីតាំង ត្រូវបានជនឆក់ឱកាសប៉ុនប៉ង វាយបំផ្លាញលួចទំនិញ។ ក្រុមបាតុករ ក៏បានដាក់រនាំង ឃាំងការធ្វើចរាចរណ៍ តាមបណ្តោយផ្លូវសំខាន់ៗ មួយចំនួនផងដែរ។
សហជីពគ្រូពេទ្យកោះហ្ក័រឌឺលូព បានអំពាវនាវ ឲ្យប្រជាជន រក្សាភាពស្ងៀមស្ងាត់ ដោយបានរំលឹកថាប្រព័ន្ធសុខភិបាលកោះនេះ អាចប្រឈមនឹងគ្រោះថ្នាក់ ក្នុងករណីមានការឆ្លងរាលខ្លាំងនូវជំងឺកូវីដ១៩។ សហជីពនេះ ក៏បានថ្កោលទោសផងដែរ អំពីករណីបាតុករជ្រុលនិយមខ្លះ បានរារាំងអ្នកជំងឺ និងបុគ្គលិកពេទ្យ មិនឲ្យចូលទៅក្នុងមន្ទីរពេទ្យ។
សូមរំលឹកថា បាតុកម្មហិង្សាចលាចល បានផ្ទុះឡើងនៅលើកោះហ្ក័រឌឺលូព បន្ទាប់ពីក្រុមមួយឈ្មោះ សហជីពពលរដ្ឋប្រឆាំងកាតព្វកិច្ចចាក់វ៉ាក់សាំង បានចាប់ផ្តើមធ្វើបាតុកម្មតវ៉ា ប្រឆាំងនឹងការដាក់កំហិត ឲ្យបុគ្គលិកពេទ្យត្រូវចាក់វ៉ាក់សាំងបង្ការកូវីដ១៩។ គួួរបញ្ជាក់ថា យោងតាមតួលេខផ្លូវការ នៅលើកោះហ្ក័រឌឺលូព ក្នុងចំនោមមនុស្សអាយុលើសពី១៨ឆ្នាំ មានតែប្រមាណ៤៦.៤%ប៉ុណ្ណោះ ដែលបានចាក់វ៉ាក់សាំង យ៉ាងហោចមួយដូស។ តួលេខដែលទាបខ្លាំង បើប្រៀបធៀបនឹងតួលេខមធ្យម ទូទាំងប្រទេសបារាំង។ អាជ្ញាធរសុខាភិបាលបារាំង កំពុងតែភ័យបារម្ភ ពីករណីផ្ទុះរលកឆ្លងរាលដាលសារជាថ្មីទៀត នៅលើកោះនេះ។
គួរកត់សំគាល់ដែរថា បាតុកម្មដែលដំបូងឡើយ មានកម្មវត្ថុប្រឆាំងវិធានការសុខាភិបាលនេះ បានឈានក្លាយទៅជាបាតុកម្ម ដែលមានលក្ខណៈជាការប្រឆាំងរដ្ឋាភិបាលបារាំង។ កោះហ្ក័រឌឺលូប ជាដែនដីបារាំង ដែលមានវិបត្តិសង្គម និងសេដ្ឋកិច្ចក្រីក្រ ព្រមទាំងហេដ្ឋារចនាសម្ព័ន្ធសាធារណៈទ្រុឌទ្រោមខ្លាំង។ អ្នកនយោបាយបារាំងមួយចំនួន បានអំពាវនាវ ឲ្យរដ្ឋាភិបាលត្រូវតែរៀបចំយន្តការចរចា និងស្តាប់ការទាមទារចង់បានរបស់ប្រជាពលរដ្ឋលើកោះនេះ ជាជាងការប្រើកម្លាំងបង្ក្រាប ដែលមិនខុសពីការយកសាំងទៅចាក់លើភ្លើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ