ប្រឈមនឹងរលកទី៥នៃជំងឺកូវីដ អូទ្រីសប្រកាសបិទខ្ទប់ប្រទេស មុនគេ នៅទឹកដីអឺរ៉ុប
ជំងឺរាតត្បាតកូវីដបានបង្កើនល្បឿនឆ្លងខ្លាំង នៅសហរដ្ឋអាមេរិក និងនៅទឹកដីអឺរ៉ុបនៅសប្តាហ៍នេះ។ ជាលទ្ធផល ប្រទេសនៅអឺរ៉ុបដែលកំពុងមានករណីឆ្លងកូវីដកាន់តែច្រើនបានចាត់វិធានការរឹតបន្តឹងឡើងវិញ ដើម្បីទប់ស្កាត់រលកទី៥នៃជំងឺកូវីដ។ នៅអូទ្រីសរដ្ឋាភិបាលបានសម្រេចកាលពីថ្ងៃសុក្រ បិទខ្ទប់ប្រទេសទាំងស្រុងចាប់ពីថ្ងៃចន្ទ ទី២២វិច្ឆិកា ចំណែកអាល្លឺម៉ង់បានសម្រេចហាមមិនឲ្យអ្នកដែលគ្មានបណ្ណវ៉ាក់សាំង ចេញចូលកន្លែងសាធារណៈ ឬភោជនីយដ្ឋាន។
ចុះផ្សាយនៅថ្ងៃ៖
អូទ្រីសជាប្រទេសអឺរ៉ុបដំបូងគេ ដែលវិលត្រលប់ទៅចាត់វិធានការបិទខ្ទប់ប្រទេសសាជាថ្មី ដើម្បីទប់ស្កាត់ការឆ្លងរាតត្បាតនៃជំងឺកូវីដ។ នៅ៥ថ្ងៃក្រោយបិទខ្ទប់អ្នកដែលគ្មានចាក់វ៉ាក់សាំងឲ្យនៅតែក្នុងផ្ទះ រដ្ឋាភិបាលអូទ្រីសបានសម្រេចកាលពីថ្ងៃសុក្រ បិទខ្ទប់ប្រទេស រយៈពេល ២០ ថ្ងៃ គិតចាប់ពីថ្ងៃចន្ទ ដើមសប្តាហ៍ក្រោយ។ ប្រឈមនឹងរលកឆ្លងថ្មីនៃជំងឺកូវីដ១៩ និងសម្ពាធលើមន្ទីរពេទ្យ ដោយសារចំនួនកើនឡើងនៃអ្នកជំងឺកូវីដ ដែលមិនបានចាក់វ៉ាក់សាំង រដ្ឋាភិបាលអូទ្រីសបានសម្រេចផងដែរ កាតព្វកិច្ចចាក់វ៉ាក់សាំង បង្កាជំងឺកូវីដ សម្រាប់គ្រប់ពលរដ្ឋអូទ្រីស ចាប់ពីដើមខែកុម្ភៈ ឆ្នាំក្រោយ។
នៅអាល្លឺម៉ង់ ជាមួយករណីឆ្លងថ្មី កើនឡើងខ្ពស់ជាងគេ ក្នុងរង្វង់សហភាពអឺរ៉ុប (ប្រមាណ ៤៣០០០នាក់ ក្នុងមួយថ្ងៃ) រដ្ឋាភិបាល បានចាត់វិធានការរឹតបន្តឹងការធ្វើដំណើររបស់អ្នកដែលមិនបានចាក់វ៉ាក់សាំងដូចអូទ្រីសដែរ។ នៅសប្តាហ៍នេះ អាជ្ញាធរសុខភាពអាល្លឺម៉ង់បានវាយតម្លៃថា វិធានការបិទខ្ទប់តែ អ្នកដែលមិនបានចាក់វ៉ាក់សាំង គ្មានប្រសិទ្ធិភាពគ្រប់គ្រាន់ ទៅកាច់បំបាក់រលកឆ្លងថ្មីនៃជំងឺកូវីដនោះទេ។
អឺរ៉ុបកំពុងជួបការផ្ទុះជំងឺកូវីដសាជាថ្មី។ នៅក្រោយ បានករណីឆ្លងបានថយចុះនៅបណ្តាប្រទេសអឺរ៉ុបខាងកើត អឺរ៉ុបខាងលិច ជាទីដែល ៦០%នៃប្រជាជនបានចាក់វ៉ាក់សាំងបង្ការជំងឺកូវីដ កំពុងប្រឈមនឹងការកើនឡើងខ្លាំងនៃករណីឆ្លងកូវីដ នៅសប្តាហ៍នេះ។ ជាក់ស្តែង ក្នុងចំណោមប្រទេសចំនួន១០នាំមុខគេ ខាងមានចំនួនអ្នកឆ្លងថ្មីកើនឡើងខ្លាំង នៅសប្តាហ៍នេះ មានប្រទេស៩ (អាល្លឺម៉ង់ អង់គ្លេស អូទ្រីស បារាំង អេស្ប៉ាញ ព័រទុយហ្កាល់ ស្វ៊ីស ហូឡង់ ដាណឺម៉ាក )ដែលស្ថិតនៅក្នុងទ្វីបអឺរ៉ុប។
បន្ទាប់មក គឺអាមេរិក ដែលមានអ្នកឆ្លងកូវីដ ច្រើនជាងគេក្នុងពិភពលោក (៩៧០០០នាក់ ក្នុងមួយថ្ងៃ)។ អាមេរិកដែលមានអ្នកស្លាប់ដោយសារជំងឺកូវីដច្រើនជាងគេ (១២៨១នាក់ក្នុងមួយថ្ងៃ) ដោយនាំមុខរុស្ស៊ី (១២៣៥នាក់) បានចាប់ផ្តើម យុទ្ធនាការចាក់វ៉ាក់សាំង ដូសទី៣ សម្រាប់ពលរដ្ឋទូទៅ ដែលបានចាក់វ៉ាក់សាំង ២ដូសរួចហើយ។
នៅទូទាំងពិភពលោក ជំងឺកូវីដឆ្លងទៅមនុស្សជាង ៥សែននាក់ និងសម្លាប់មនុស្ស ជាង ៧៤៣៩នាក់ ក្នុងមួយថ្ងៃ។ នេះបើតាមទិន្នន័យចុះផ្សាយដោយទីភ្នាក់ងារព័ត៌មានបារាំង AFP។
នៅថ្ងៃសុក្រ ទីភ្នាក់ងារឱសថអឺរ៉ុប ទើបសម្រេចផ្តល់ភ្លើងខៀវឲ្យគេប្រើថ្នាំគ្រាប់របស់ក្រុមហ៊ុនMerck សម្រាប់ព្យាបាលជំងឺកូវីដ និងកំពុងពិចារណាលើបេក្ខភាពរបស់ថ្នាំព្យាបាលជំងឺកូវីដរបស់ក្រុមហ៊ុនPfizerមួយទៀត។
បន្ថែមពីលើវ៉ាក់សាំងបង្ការជំងឺកូវីដ១៩ ថ្នាំគ្រាប់ព្យាបាលជំងឺកូវីដ របស់ក្រុមហ៊ុនPfizer និងMerck ដែលមានប្រសិទ្ធិភាព កាត់បន្ថយស្ថានភាពធ្ងន់ធ្ងរ និងអត្រាមរណភាពរបស់អ្នកជំងឺ កូវីដ ត្រូវបានអ្នកវិទ្យាសាស្ត្រចាត់ទុកជាក្តីសង្ឃឹមសំខាន់មួយដើម្បី ដោះស្រាយវិបត្តិកូវីដបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ